រាជធានីភ្នំពេញ ៖ នៅលើសង្វៀនទូរទស្សន៍ស៊ីធីអិន នាថ្ងៃសៅរ៍ ទី១ វិច្ឆិកា ខាងមុខនេះ គូប្រកួតប្រដាល់ដណ្តើមខ្សែក្រវាត់របស់ក្រុមហ៊ុនស្រាបៀរលីអូ ត្រូវបានផ្អាកជំនួសដោយគូកិត្តិយសចំនួន២គូវិញ ។ គូកិត្តិយសរបស់ក្រុមហ៊ុនស្រាបៀរលីអូលើកនេះមាន សូត្រ ប៊ុនធី មកពីក្លិបបក្សីស្លាបដែក ប្រកួតជាមួយ វៀត ប៊ុនឌឿន មកពីសមាគមកីឡាប្រដាល់ក្រសួងការពារជាតិ និងវៀង សាវ៉ន (សឹង្ហ សាវ៉ន) មកពីក្លិបកងពលធំអន្តរាគមន៍លេខ៣ ព្រះវិហារ ប្រកួតជាមួយ ហឹុម សារ៉ាន់ មកពីសមាគមកីឡាប្រដាល់ក្រសួងការពារជាតិ ។
ប៊ុនធី និងប៊ុនឌឿន បាត់មុខពីលើសង្វៀនស៊ីធីអិនអស់រយៈពេលជាច្រើនខែមកហើយ ដូច្នេះមិនដឹងថា សមត្ថភាពប្រកួតរបស់ពួកគេនៅល្អដូចមុនទៀត ឬយ៉ាងណានោះទេ។ បើតាមការសន្និដ្ឋាន ពួកគេអាចធ្លាក់ដៃជាងមុនបន្តិចដោយសារមិនមានឱកាសប្រកួតញឹកញាប់ ។ ទោះបីយ៉ាងណា ការប្រកួតរបស់ពួកគេអាចនឹងល្អមើលជាងគូដណ្តើមខ្សែក្រវាត់ផងក៏មិនដឹង ដោយសារកីឡាករទាំង២ មិនធ្លាប់សាកកណ្តាប់ដៃគ្នា ពេលបានប៉ះគ្នាជាលើកដំបូងភាគីម្ខាងៗច្បាស់ជាវាយអស់ដៃដណ្តើមជ័យជម្នះដើម្បីបង្កើនក្រេឌីតរៀងខ្លួនមិនខាន ។
ចំណែក វៀង សាវ៉ន និងហ៊ឹម សារ៉ាន់ មានសមត្ថភាពមិនដូចគ្នាទេ ។ សាវ៉ន ជាអ្នកប្រដាល់ដែលអត់ចេះប្រើស្នៀតកែង និងជង្គង់ទេ រីឯចិត្តក៏តូចថែមទៀត ដូច្នេះការមកជួប សារ៉ាន់ លើកនេះអាចជួបការលំបាកបន្តិចហើយ ។ សារ៉ាន់ ពីមុនគឺជាជើងខ្លាំងម្នាក់ដែលមិនងាយទប់ទល់ឡើយ ដោយសារកីឡាកររូបនេះស្នៀតអី ក៏ចេះប្រើដែរ ទាំងស្នៀតកែង និងជង្គង់ឡើងទៅ រីឯចិត្តក៏សឿងទៀត ។ ទោះបីយ៉ាងណា សារ៉ាន់ មិនហ៊ានអះអាងទុកមុនពីជ័យជម្នះរបស់ខ្លួនឡើយពេលជួប សាវ៉ន លើកនេះ ដូច្នេះចាំមើលគូនេះ នរណាជាអ្នកសម្រេចគោលដៅ ៕
ចែករំលែកព័តមាននេះ