អ្នកពុលរថយន្តភាគច្រើនតែងតែសម្ដែងនូវភាពខ្លាចរអានៅពេលជិះរថយន្តផ្លូវឆ្ងាយពីព្រោះថាការវិលមុខអស់កម្លាំងនិងមានអារម្មណ៍ធីងធោងរកកល់ក្អួតចង្អោរដែលជាអាការៈនៃជំងឺនេះបាននាំឱ្យការធ្វើដំណើរប្រែក្លាយជាក្ដីទុក្ខសោកដ៏យ៉ាប់យឺនទៅវិញហើយមានពេលខ្លះថែមទាំងខាត់បង់ពេលវេលានិងប្រាក់កាសទៀតផង ។ ដោយមើលឃើញកត្ដាអវិជ្ជមានទាំងនេះទើបក្រុមអ្នកប្រាជ្ញពិភពលោកបានពាំនាំមកនូវវិធីសាស្ត្រមួយចំនួនដើម្បីកុំឱ្យអ្នកជិះរថយន្តពុលនៅពេលធ្វើដំណើរ៖
១-ត្រូវដឹងពីមូលហេតុបណ្ដាលឱ្យអ្នកពុល ៖ រាល់អាការៈរោគនៃការពុលនៅពេលជិះក្នុងរថយន្តគឺដោយសារតែវិញ្ញាណនៃសព៌៌ាង្គកាយរបស់អ្នកបានយល់ដឹងពីភាពខុសប្លែកគ្នារវាងអ្វីដែលអ្នកមើលឃើញនិងអ្វីដែលអារម្មណ៍របស់អ្នកបានដឹងដែលបានបញ្ជូនព័ត៌មានទៅប្រព័ន្ធខួរក្បាលក្នុងពេលរថយន្តកំពុងមានចលនា ។ ការប៉ះទង្គិចរវាងកត្ដាទាំងពីរនេះនឹងធ្វើឱ្យសព៌៌ាង្គកាយអ្នកមានភាពមិនប្រក្រតីដូចជាការបង្ហាញសញ្ញានៃការពុលដោយមមើមមាយអស់កម្លាំងវិលមុខរកកល់ក្អួតចង្អោរជាដើម ។
២-ក្រឡេកមើលទៅកញ្ចក់មុខ ៈ ការសម្លឹងមើលទៅលើទិដ្ឋភាពនៃផ្នែកខាងមុខអាចធានាបាននូវការអង្កេតមើលចលនានៃប្រព័ន្ធតុល្យភាពរបស់អ្នកហើយវាក៏ជួយដោះស្រាយនូវភាពមិនសីុមេទ្រីគ្នាដែលបណ្ដាលឱ្យកើតជំងឺពុលរថយន្តទៀតផង ។ លើសពីនេះគឺអ្នកត្រូវផ្ដោតទៅលើវត្ថុដែលមិនមានចលនានៅខាងមុខ ។ កុំព្យាយាមធ្វើអ្វីមួយដែលពាក់ព័ន្ធនឹងការផ្ដោតលើចំណុចដែលស្ថិតនៅមួយកន្លែងដូចជាការអានសៀវភៅ ឬលេងបៀជាដើម ។ កុំងាកជុំវិញខ្លួន ឬសម្លឹងសងខាងផ្លូវច្រើនពេកនាំឱ្យវិលមុខ ។
៣-អង្គុយកៅអីមុខប្រសិនជាអាចធ្វើទៅបាន ៖ អ្នកបើកបរកម្រនឹងពុលរថយន្តណាស់ដោយសារតែជានិច្ចកាលពួកគេផ្ដោតលើដងផ្លូវ មួយវិញទៀតការអង្គុយនៅផ្នែកខាងមុខក៏អាចឱ្យអ្នកមើលទិដ្ឋភាពតាមកញ្ចក់មុខបានច្បាស់និងស្រឡះភ្នែកផងដែរ ដូច្នេះវាអាចការពារឬសម្រាលអារម្មណ៍ពីការក្អួតចង្អោរបាន ។
៤-បិទភ្នែករបស់អ្នកឬដេកតែម្ដងប្រសិនជាអាចធ្វើទៅបាន ប្រសិនបើភ្នែកទាំងគូរបស់អ្នកបិទទៅហើយនោះនឹងមិនអាចមើលឃើញពីអ្វីៗឬចលនាបំលាស់ទីដែលបណ្ដាលឱ្យពុលរថយន្តបានឡើយ ។
៥-បើកបង្អួចរថយន្ត ៈ មនុស្សម្នាជាច្រើនតែងតែស្វែងរកនូវក្លិនស្រស់ស្រាយឬខ្យល់ត្រជាក់ដើម្បីជួយឱ្យពួកគេមានអារម្មណ៍ប្រសើរឡើងបើទោះជាហេតុផលដែលនៅពីក្រោយបញ្ហានេះមិនទាន់ច្បាស់លាស់នៅឡើយក៏
ដោយ ។ ប្រសិនបើក្នុងលក្ខខណ្ឌដែលបង្អួចមិនអាចបើកឬបើកបានពាក់កណ្ដាលនោះគឺអ្នកត្រូវទម្រេតខ្លួនទៅនឹងផ្នែកខាងក្រោមនៃស៊ុមកញ្ចក់ដើម្បីស្រូបយកខ្យល់បក់ផាត់តាមប្រឡោះនោះ។ ចំណែកអ្នកខ្លះអាចនឹងចាញ់ក្លិនមួយចំនួនដែលធ្វើឱ្យគេពុលដូចជា ក្លិនម៉ាសីុនត្រជាក់ ទឹកអប់ បារី និងអាហារជាដើម ។ ប្រសិនជាអាចត្រូវយកប្រភពនៃក្លិនទាំងអស់នោះចេញឬបាញ្រ់ស្ពាយ៍ដែលមានក្លិនស្រស់ស្រាយជំនួសវិញក៏ជាការល្អ ។
៦-ឈប់សម្រាក ៈ ចេញក្រៅរថយន្តដើម្បីសណ្ដូកជើងពត់ខ្លួនប្រាណបន្តិច ។ អង្គុយលើជើងម៉ាឬក្រោមដើមឈើហើយដកដង្ហើមឱ្យវែងៗតាមមាត់និងដកដង្ហើមវែងៗចេញពីក្រពះរបស់អ្នកដើម្បីឱ្យមានការធូរស្រាល ។ គួរអនុវត្តបែបនេះជាពិសេសនៅក្នុងអំឡុងពេលធ្វើដំណើរផ្លូវឆ្ងាយនិងមានផ្លូវបត់បែនច្រើន ។
៧-ការប្រកាន់យកគោលជំហរការពារការក្អួតចង្អោរ ៈ មើមខ្ញីគឺជាឱសថបុរាណដែលមានប្រសិទ្ធភាពពីព្រោះវាត្រូវបានគេទទួលស្គាល់ថាជាថ្នាំទប់កម្អួតដ៏មានប្រសិទ្ធភាព ។ ទោះជាយ៉ាងណាឱសថខ្លះក៏អាចមានប្រសិទ្ធភាពទប់ទល់នឹងជំងឺនេះដែរ ។
៨-ប្រើប្រាស់ឱសថដែលអាចការពារនូវជំងឺពុលរថយន្ត ៈ ពិនិត្យមើលប្រសិទ្ធភាពរបស់ថ្នាំមុននឹងអ្នកប្រើប្រាស់ពិសេសគប្បីសួរវេជ្ជបណ្ឌិតក្នុងករណីនេះ ។ ពីព្រោះថ្នាំមួយចំនួនមានប្រសិទ្ធភាពតែមួយផ្នែកប៉ុណ្ណោះហើយខ្លះទៀតគឺមានប្រយោជន៍ច្រើនដូច្នេះអ្នកត្រូវកត់សម្គាល់លើចំណុចនេះទើបជាការប្រសើរ ៕
ចែករំលែកព័តមាននេះ