ការស្រាវជ្រាវថ្មីមួយបានបង្ហាញថា កង្វះវីតាមីនB1អាចបណ្តាលឱ្យកើតមានជំងឺខួរក្បាលធ្ងន់ធ្ងរដែលប្រហាក់ប្រហែលឬស្រដៀងទៅនឹងជំងឺវង្វេង ឬក៏ជំងឺសរសៃប្រសាទដទៃទៀត ។ ចុះផ្សាយនៅក្នុងព្រឹត្តិបត្រ Scientific American Medicine ក្រុមអ្នកជំនាញសរសៃប្រសាទនៃមជ្ឈមណ្ឌលវេជ្ជសាស្ត្រសាកលវិទ្យាល័យវេជ្ជសាស្ត្រ Loyola សហរដ្ឋអាមេរិកបានរាយការណ៍ថា វីតាមីនB1 (Thiamine)កម្រិតទាប អាចបណ្តាលឱ្យកើតមានលក្ខខណ្ឌមួយឈ្មោះ Wernicke encephalopathy គឺជាជំងឺដែលបណ្តាលឱ្យមានការភាន់ច្រឡំ ការមមើមមាយ ការសន្លប់ធំ ការបាត់បង់នៃការសម្របសម្រួលផ្នែកសាច់ដុំ និងបញ្ហាចក្ខុវិញ្ញាណ ។
ជាធម្មតា បញ្ហាខាងដើម កើតឡើងលើបណ្តាបុគ្គលដែលមានជំងឺមួយចំនួនដូចជា ជំងឺញៀនស្រា និងជំងឺតមអាហារ(anorexia)ហើយដែលទាំងនេះនាំទៅដល់ការកង្វះសារធាតុចិញ្ចឹមរាងកាយ ។ ប្រសិនជាមិនព្យាបាល នោះលក្ខខណ្ឌទាំងនេះអាចនាំឱ្យខូចខាតខួរក្បាល និងចុងក្រោយឈានទៅរកការស្លាប់ជៀសមិនរួច ។ ឱសថការីឧត្តមលោក Sean Ruland លោក Jose Biller និងលោក Mathew McCoyd ជាអ្នកជំនាញផ្នែករោគសរសៃប្រសាទនៅសាកលវិទ្យាល័យ Loyolaយល់ឃើញដូចគ្នាថា Encephalopathy ពុល និងEncephalopathy រំលាយអាហារអាចបង្កើតឱ្យមានបញ្ហាធ្ងន់ធ្ងរច្រើនយ៉ាង រាប់ចាប់ពីសភាពភាន់ច្រឡំទៅដល់ការសន្លប់ធំ ។ ពួកគេបានបន្តថា ខណៈរបួសជាអចិន្ត្រៃយ៍អាចកើតឡើង វិធីសាស្ត្រដែលរៀបចំដ៏ជាក់លាក់មួយចាំបាច់ត្រូវបង្កើតដើម្បីធ្វើរោគវិនិច្ឆ័យឱ្យបានរហ័សនិងត្រឹមត្រូវ ។
ក្រុមអ្នកស្រាវជ្រាវបាននិយាយថា លក្ខខណ្ឌនៃកង្វះខាតវីតាមីនB1ត្រូវបានធ្វើរោគវិនិច្ឆ័យយឺត ខណៈដែលការសិក្សាពិសោធន៍លើមនុស្សផ្ទាល់បង្ហាញថា វាប៉ះពាល់តិចជាង១ភាគរយ ។ ប៉ុន្តែ ការសិក្សាពិសោធន៍ដោយធ្វើកោសល្យវិច័យលើសាកសពមនុស្សផ្ទាល់បង្ហាញនូវអត្រាប្រេវ៉ាឡង់ខ្ពស់ដល់ទៅ២,៨ភាគរយ ៕
ចែករំលែកព័តមាននេះ