រាជធានីភ្នំពេញ ៖ ការប្រកួតប្រដាល់វគ្គជម្រុះចុងក្រោយឈានទៅដណ្តើមពានរង្វាន់ក្រុមហ៊ុនស្រាបៀរលីអូ ក្នុងប្រភេទទម្ងន់៦០គីឡូក្រាម រវាង រឿម វណ្ណៈ មកពីសមាគមកីឡាប្រដាល់ក្រសួងការពារជាតិ និងពៅ ស៊ីយ៉េត មកពីក្លិបក្រុងប៉ោយប៉ែតនៅលើសង្វៀនទូរទស្សន៍ស៊ីធីអិន កាលពីថ្ងៃសៅរ៍ ទី២៥ តុលា កន្លងមកនេះ គឺធ្វើឡើងដើម្បីបង្គ្រប់កិច្ចប៉ុណ្ណោះ ហើយជាលទ្ធផល រឿម វណ្ណៈ ឈ្នះ ពិន្ទុ ពៅ ស៊ីយ៉េត ទាំងវេទនា ។
រឿម វណ្ណៈ និងពៅ ស៊ីយ៉េត ថ្វីដ្បិតឡើងប្រកួតបង្គ្រប់កិច្ចមែន ប៉ុន្តែធ្វើឱ្យអ្នកមើលមានការចាប់អារម្មណ៍យ៉ាងខ្លាំងដោយសារតែពួកគេវាយគ្នាអស់ពីសមត្ថភាពចាប់តាំងពីទឹកទី១រហូតដល់ចប់ទឹកទី៥ ។ ជាពិសេស រឿម វណ្ណៈ ត្រូវបានអ្នកគាំទ្រភាគច្រើនកោតសរសើរមិនដាច់ពីមាត់ថា គេវាយបានល្អខ្លាំងណាស់ទាំងស្នៀតកែង ជង្គង់ និងម៉ាត់ ធ្វើឱ្យពៅ ស៊ីយ៉េត ជួបការលំបាកច្រើនគួរសម ។ សូម្បីតែលោក មាស សុគ្រី ក៏បានលួចសរសើរថែមទាំងបាននិយាយថា បើសិនជាកូនសិស្សលោកប្រកួតល្អបែបនេះតាំងពីដើមរហូតមកនោះប្រហែលជាមិនជ្រុះចេញពីវគ្គប្រកួតជម្រុះវិលជុំដោយងាយបែបនេះឡើយ ។
ចំណែក ពៅ ស៊ីយ៉េត ក៏មិនជាអន់ប៉ុន្មានដែរ គេបានប្រើគ្រប់ល្បិច និងបច្ចេកទេសធ្វើការវាយបកសងវិញ ដោយមិនប្រណីដៃឡើយ ។ ប៉ុន្តែ រឿម វណ្ណៈ ត្រូវលោកអាជ្ញាកណ្តាលព្រមានជាច្រើនលើកផងដែរ ដោយសារការវាយបំពានទៅលើ ពៅ ស៊ីយ៉េត ហើយលទ្ធផលចុងក្រោយគេបានឈ្នះ ពៅ ស៊ីយ៉េត ទាំងវេទនា ។
ទោះបី រឿម វណ្ណៈ ឈ្នះក៏ដោយ ក៏មិនមានសំណាងបានឡើងទៅប្រកួតនៅវគ្គពាក់កណ្តាលផ្តាច់ព្រ័ត្រដែរ ដោយសារឱកាសនេះត្រូវកីឡាករ៤រូបដណ្តើមយកបាត់ទៅហើយ ។ កីឡាករទាំង៤រូបនោះគឺ ទេស សំខាន់ មកពីក្លិបកងពលតូចលេខ៧០, ង៉ែត្រ រដ្ឋា មកពីសមាគមកីឡាប្រដាល់ក្រសួងមហាផ្ទៃ, អឹុង បូរា៉ មកពីក្លិបគជសារកីឡា និងថុល មករា មកពីក្លិបឃ្លាំងមឿងកីឡា ៕
ចែករំលែកព័តមាននេះ