ខេត្តកំពង់ចាម ៖ ដើម្បីជួយសម្រាលទុក្ខលំបាករបស់ប្រជាពលរដ្ឋ និងផ្សារភ្ជាប់ការងារក្នុងមូលដ្ឋាន កាលថ្ងៃទី២៥ តុលា ២០១៤ លោក មិន ឃិន ប្រធានក្រុមការងារថ្នាក់ជាតិចុះជួយស្រុកកងមាស រួមដំណើរដោយលោក Lavern Kohls ប្រធានអង្គការព្រះយេស៊ូគ្រិស្តនៃពួកបរិសុទ្ធថ្ងៃចុងក្រោយ បាននាំយកជំនួយរបស់សប្បុរសជនយកទៅចែកជូនប្រជាពលរដ្ឋចំនួន៧០០គ្រួសារដែលជួបការលំបាកក្នុងជីវភាពប្រចាំថ្ងៃ និងកំពុងរស់នៅក្នុងឃុំព្រែកក្របៅ ឃុំរកាគយ ឃុំពាមជីកង ឃុំអង្គរបាន និងឃុំសូរគង ស្រុកកងមាស ខេត្តកំពង់ចាម។
លោក មិន ឃិន បានថ្លែងអំណរគុណចំពោះ អង្គការព្រះយេស៊ូគ្រិស្តនៃពួកបរិសុទ្ធថ្ងៃចុងក្រោយក្នុងការបំពេញការងារមនុស្សធម៌ប្រកបដោយទឹកចិត្តជ្រះថ្លាដើម្បីជួយប្រជាពលរដ្ឋដោយមិនរើសអើងពណ៌សម្បុរអ្វីឡើយ។ ការនាំអំណោយយកមកចែកជូនដល់ប្រជាពលរដ្ឋដោយផ្ទាល់ដៃនាពេលនេះ គឺជាការចែករំលែកមួយក្នុងពេលដែលប្រជាពលរដ្ឋទាំងអស់ជួបការខ្វះខាត ហើយក៏ជាការអនុវត្តទៅតាមការណែនាំរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលតែងតែគិតគូរខ្ពស់ចំពោះសុខទុក្ខប្រជាពលរដ្ឋមិនទុកឲ្យនរណាម្នាក់ស្លាប់ដោយឥតបាយដោយយើងមិនបានដឹងនោះឡើយ។
លោកបញ្ជាក់ថា ពិតណាស់ហើយរាជរដ្ឋាភិបាលកម្ពុជាក្រោមការដឹកនាំប្រកបដោយគតិវៀងវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា តែងតែគិតគូជានិច្ចចំពោះប្រជាពលរដ្ឋដែលជួបការលំបាកតាមរយៈការចូលរួមពីសប្បុរសជននានា ដែលនេះជាការចូលរួមមួយមិនអាចខ្វះបាន ។ អំណោយដែលនាំមកចែកជូនប្រជាពលរដ្ឋទាំង៧០០គ្រួសារ ក្នុងមួយគ្រួសារទទួលបានអង្ករ១៦គីឡូក្រាម, មី១កេស, ទឹកត្រីពីរដប, ប្រេងឆា១ដប៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ