រាជធានីភ្នំពេញ ៖ បន្ទាប់ពីទទួលបានជ័យជំនះ ជាពិសេសដណ្តើមបានមេដាយរហូតដល់ទៅ១៥គ្រឿងនោះ នាវេលាម៉ោង៣រសៀល ថ្ងៃទី២៦ តុលា នេះ ក្រុមអត្តពលិកជម្រើសជាតិវ៉ូវីណាមកម្ពុជា និងគណៈប្រតិភូដឹកនាំនឹងធ្វើមាតុភូមិនិវត្ដន៍មកកាន់ប្រទេសកម្ពុជាវិញហើយ។
មេដាយចំនួន១៥គ្រឿងដែលកម្ពុជាឈ្នះពីព្រឹត្តការណ៍កីឡាអាស៊ីអាគ្នេយ៍ Asian Vovinam Championship លើកទី៣ដែលធ្វើឡើងនៅប្រទេសមីយ៉ាន់ម៉ា ដោយមាន ប្រទេសចំនួន៧ចូលរួមនោះ គឺមេដាយមាស៣គ្រឿង ប្រាក់៣គ្រឿង និងសំរិទ្ធ៩គ្រឿង។
នេះគឺជាជោគជ័យដ៏ធំមួយទៀតរបស់កីឡាវ៉ូវីណាមដែលជាកីឡាដ៏មានសក្តានុពលរបស់កម្ពុជា តែអ្វីដែលគួរឱ្យសោកស្តាយនោះ ព្រឹត្តិការណ៍អាស៊ានហ្គេមដែលធ្វើឡើងនៅឆ្នាំ២០១៥ខាងមុខនៅប្រទេសសិង្ហបុរីនោះ វ៉ូវីណាមមិនត្រូវបានប្រទេសម្ចាស់ផ្ទះមួយនេះដាក់បញ្ចូលជាវិញ្ញាសាសម្រាប់ប្រកួតឡើយ។
បើនិយាយពីការរកមេដាយពីព្រឹត្តការណ៍អន្តរជាតិនានាដែលកីឡាវ៉ូវីណាមដណ្តើមបានមកដល់ពេលនេះមានចំនួនសរុប៩៣គ្រឿងហើយ ដោយក្នុងនោះមេដាយមាសមានចំនួន១៦គ្រឿង ប្រាក់៣១គ្រឿង និងសំរិទ្ធ៤៦គ្រឿង។
សូមបញ្ចាក់ផងដែរថា ព្រឹត្តិការណ៍ វ៉ូវីណាមប្រចាំតំបន់នេះមានការចូលរួមពីអត្តពលិកនៃបណ្តាប្រទេសចំនួន៧ ដែលក្នុងនោះរួមមាន ម្ចាស់ផ្ទះមីយ៉ាន់ម៉ា កម្ពុជា វៀតណាម ឡាវ ឥណ្ឌូនេស៊ី ហ្វីលីពីន និងថៃ៕
ចែករំលែកព័តមាននេះ