រាជធានីភ្នំពេញ ៖ បុរសម្នាក់អាយុប្រមាណ៣០ឆ្នាំអះអាងថា ជាអង្គរក្សបន្ទាប់ពីផឹកស៊ីស្រវឹងបានចាប់អូសដៃកុមារីអាយុ៨ឆ្នាំម្នាក់ចូលក្នុងបន្ទប់ប៉ុនប៉ងរំលោភមិនបានសំរេច បង្កឱ្យមានការភ្ញាក់ផ្អើលកាលពីវេលាម៉ោង៥ល្ងាច ថ្ងៃទី២៤ តុលា នៅមុខផ្សារទំនើបសុវណ្ណា ក្នុងភូមិ៥ សង្កាត់ទំនប់ទឹក ខណ្ឌចំការមន ។
កុមារីរងគ្រោះស្នាក់នៅក្បែរកន្លែងកើតហេតុ មានឪពុកជាអង្គរក្ស ។ ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុកុមារីរងគ្រោះបានរត់លេងជាមួយក្មេងៗជាច្រើននាក់ទៀតមានប្រុសមានស្រីនៅមុខផ្ទះ លុះពេលរត់លេងដល់មុខផ្ទះកើតហេតុជាមួយក្មេងទាំងអស់៣នាក់ ស្រាប់តែជនបង្កមានអាយុប្រមាណ៣០ឆ្នាំ ជាអង្គរក្ស ទើបនឹងមកពីផឹកស៊ីស្រវឹង ហើយបានមកលេងផ្ទះមិត្តភក្កិបានចាប់ទាញដៃក្មេងស្រីរងគ្រោះចូលក្នុងបន្ទប់ ហើយខ្ទាស់គន្លឹះពីខាងក្នុងធ្វើឱ្យក្មេង២នាក់ទៀតដែលរត់លេងជាមួយគ្នារត់ទៅគោះទ្វារ តែជនបង្កមិនព្រមបើកទេ ។
បន្ទាប់មកស្ត្រីជាម្ចាស់ផ្ទះបានត្រឡប់មកពីផ្សារត្រូវក្មេង២នាក់ដែលនៅមុខផ្ទះប្រាប់ថា ជនបង្កបានចាប់ដៃក្មេងស្រីរងគ្រោះអូសចូលទៅក្នុងបន្ទប់បាត់ហើយ ទើបស្ត្រីរូបនោះដើរទៅគោះទ្វារប្រាប់ថា គាត់ជាម្តាយមីងរបស់មិត្តភក្កិជនបង្កនោះ ទើបបើកទ្វារឲ្យឃើញជនបង្កកំពុងតែចាប់ទាញជើងក្មេងស្រី ចំណែកក្មេងស្រីនោះវិញភ័យរហូតមុខស្លេកស្លាំង ។
ប្រភពព័ត៌មានបានឲ្យដឹងទៀតថា ភ្លាមៗនោះស្ត្រីខាងលើបានយកក្មេងស្រីនោះទៅប្រគល់ឲ្យឪពុកម្តាយធ្វើការចរចាគ្នា ដោយសារតែភាគីទាំងសងខាងសុទ្ធតែស្គាល់គ្នា ហើយជាអង្គរក្សដូចគ្នាទៀតមិនបានធ្វើការប្តឹងប្តល់ទេ គ្រាន់តែហៅលោកនាយប៉ុស្តិ៍ទំនប់ទឹកទៅជួយអន្តរាគមន៍ ។ ក្រោយពេលកើតហេតុភាគីទាំងពីរចរចាគ្នាដោយស្ងាត់ៗមិនបានធ្វើការប្តឹងប្តល់ទេ ៕
ចែករំលែកព័តមាននេះ