រាជធានីភ្នំពេញ ៖ យុវជនម្នាក់ជិះម៉ូតូទៅបុករបាំងថ្មខណ្ឌចែកទ្រូងផ្លូវបណ្តាលដួលម៉ូតូរងរបួសធ្ងន់ បន្ទាប់ពីយុវជនរូបនោះរួមជាមួយមិត្តភក្តិមួយក្រុមទៀតបើកម៉ូតូដេញវាយ យុវជនពីរនាក់បង្កការភ្ញាក់ផ្អើលដល់ប្រជាពលរដ្ឋដែលធ្វើដំណើរតាមផ្លូវ ។ ហេតុការណ៍នេះកើតឡើងកាលពីវេលាម៉ោង១២ អាធ្រាត្រថ្ងៃទី២៦ តុលា ២០១៤ នៅចំណុចស្តុបណូគៀរ ស្ថិតនៅសង្កាត់ទឹកថ្លា ខណ្ឌសែនសុខ។
យុវជនរងគ្រោះដែលត្រូវគេជិះម៉ូតូដេញវាយនោះមានទី១.ឈ្មោះមៀច រ៉ាឌី ភេទប្រុស អាយុ២៦ឆ្នាំ និងទី២.ឈ្ម៉ មៀច សុធា ភេទប្រុស អាយុ២២ឆ្នាំ ។ជនរងគ្រោះទាំងពីរនាក់គឺជាបងប្អូនបង្កើតនិងគ្នា ស្នាក់នៅផ្ទះជួលក្នុងភូមិអូរបែកក្អម សង្កាត់ទឹកថ្លា ខណ្ឌសែនសុខ ។ ចំណេកជនសង្ស័យមានគ្នា៦នាក់ មិនស្គាល់អត្តសញ្ញាណ ជិះម៉ូតូបីគ្រឿងគឺមានម៉ូតូ ម់ាក អាយខុន ម៉ូូតូម៉ាកMSX និងម៉ូតូម៉ាក DUKE ៣៩០។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតគឺជនរងគ្រោះពីរនាក់បងប្អូនបានជិះម៉ូតូម៉ាក ឃ្លីក មួយគ្រឿងឌុបគ្នា មកពីញាំមី នៅសាលាបឹងត្របែកដោយធ្វើដំណើរតាមផ្លូវលេខ២៧១ ក្នុងទិសដៅពីត្បូង ទៅជើង ខណៈមកដល់ចំណុចស្តុបណូគៀរ ក៏ត្រូវបានក្រុមយុវជនមួយក្រុមទៀតជិះម៉ូតូបីគ្រឿង មានគ្នា៦នាក់ ដែលក្នុងដៃមានសុទ្ធ តែដុំថ្ម និងខ្សែក្រវ៉ាត់ បានបើកម៉ូតូដេញវាយក្រុមជនរងគ្រោះពីរនាក់ បងប្អូនបាន ៥ទៅ៦ខ្សែក្រវ៉ាត់ ។ ពេលនោះជនរងគ្រោះពីរនាក់បងប្អូនបានបើកម៉ូតូត្រូវឡប់ទៅ ខារ៉ាអូរខេញូស្តា ហើយក្រុមជនសង្ស័យ ក៏បានជិះម៉ូតូដេញតាម សំណាងអាក្រក់ជនសង្ស័យដែលជិះម៉ូតូម៉ាក DUKE 390 ពណ៌ខ្មៅ ទឹកក្រូចពាក់ស្លកលេខភ្នំពេញ1CJ-6101 បានបើកម៉ូតូជ្រុលទៅបុករបាំងថ្ម បណ្តាលឱ្យដួលម៉ូតូបោកទៅលើថ្នល់របួសអ្នកបើកម៉ូតូធ្ងន់ធ្ងរ ចំណែកអ្នកជិះពីក្រោយ និង មិត្តភក្តិចំនួន២ម៉ូតូ រត់គេចខ្លួនបាត់ស្រមោល ។
ក្រោយពេលកើតហេតុជនរងគ្រោះត្រូវបានគេបញ្ជូនទៅសង្រ្គោះនៅមន្ទីរពេទ្យ ចំណែកម៉ូតូត្រូវសមត្ថកិច្ចយកទៅរក្សាទុកនៅប៉ុស្តិ៍នគរបាលរដ្ឋបាលទឹកល្អក់២ ដើម្បីដោះស្រាយគ្នាតាមផ្លូវច្បាប់ ។
ប្រភពព័ត៌មាន
ចែករំលែកព័តមាននេះ