រាជធានីភ្នំពេញ ៖ មានករណីផ្ទុះអាវុធមួយគ្រាប់នៅក្នុងភោជនីយដ្ឋាន សួនរីករាយដែលបង្កឱ្យមានការភ្ញាក់ផ្អើលដល់ប្រជាពលរដ្ឋ និង កម្លាំងកងរាជអាវុធចុះអន្តារគមន៍ទាំងយប់ ។ ហេតុការណ៍នេះកើតឡើងកាលពីវេលាម៉ោង១០ និង ៥០នាទីយប់ថ្ងៃទី២៥ តុលា ២០១៤ នៅផ្លូវលេខ៦៣ កែងនិងផ្លូវលេខ២១៤ ស្ថិតក្នុងសង្កាត់បឹងរាំង ខណ្ឌដូនពេញ ។
យោងតាមប្រភពព័ត៌មានពីប្រជាពលរដ្ឋនៅក្បែរកន្លែងកើតហេតុបានលួចបង្ហើបឱ្យដឹងថា នៅមុនពេលកើតហេតុមានបុរសមួយក្រុមចូលទៅផឹកស៊ីក្នុងភោជនីយដ្ឋានខាងលើ មួយសន្ទុះក្រោយមកស្រាប់តែឮសម្លេងផ្ទុះអាវុធមួយគ្រាប់ ដែលគេដឹងថាជនបង្កបាញ់ទម្លុះសាឡុង ។ ភ្លាមៗប្រជាពលរដ្ឋបានរាយការណ៍ទៅកាន់កម្លាំងកងរាជអាវុធហត្ថ ហើយកម្លាំងកងរាជអាវុធខណ្ឌ៧មករា ក៍បានចុះមកត្រួតពិនិត្យកន្លែងកើតហេតុខាងលើតែម្ចាស់ភោជនីយដ្ឋានខាងលើ មិនបានចូលរួមសហការជាមួយកម្លាំងកងរាជអាវុធហត្ថទេដោយខំព្យាយាមលាក់បាំងព័ត៌មាននោះទោះបីជាប្រជាពលរដ្ឋក្បែរខាងបានឮក៏ដោយ ។
យ៉ាងណាក៏ដោយកម្លាំងកងរាជអាវុធហត្ថនៅតែបន្តសាកសួរព័ត៌មានទាក់ទិននឹងរឿងរ៉ាវខាងលើ រហូតម្ចាស់ហាងបានបង្ហើបឱ្យដឹងថាគ្រាន់តែរឿងតិចតួចគាត់ខ្ជិលខ្វល់ពីព្រោះថាក្រុមខាងលើទៅអស់បាត់ហើយនិងមិនទាន់ឱ្យលុយគាត់ផង ។ ទោះបីជាយ៉ាងណាសមត្ថកិច្ចបានបញ្ជាក់ថា គឺពិតជាមានករណីផ្ទុះអាវុធមែន ។ ពេលនេះកម្លាំងកងរាជអាវុធហត្ថ បាននិងកំពុងសាកសួរម្ចាស់ហាងខាងលើ ដើម្បីចង់ដឹងប្រភពព័ត៌មានឱ្យបានច្បាស់ ។
ចែករំលែកព័តមាននេះ