ខេត្តប៉ៃលិន ៖ មានករណីគ្រោះថ្នាក់ចរាចរណ៍មួយបានកើតឡើង បណ្តាលឱ្យបុរសម្នាក់រងរបួសធ្ងន់ធ្ងរសន្លប់បាត់ស្មារីនៅនឹងកន្លែង ត្រូវគេដឹកតាមរថយន្តសង្គ្រោះយកទៅមន្ទីរពេទ្យខេត្តបាត់ដំបង ដោយសារស្រវឹងជោគជាំ ជិះម៉ូតូក្នុងល្បឿនលឿនពេលយប់ ក៏ជ្រុលទៅបុកគូទរថយន្តឈប់ចតស្ងៀមនៅលើចិញ្ចើមផ្លូវពេញទំហឹង បណ្តាលឱ្យរងរបួសធ្ងន់តែម្តង ដែលហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៨ និង២៥នាទីយប់ថ្ងៃទី២៤ តុលា ២០១៤ស្ថិតនៅបណ្តោយផ្លូវជាតិលេខ៥៧ ក្នុងភូមិបរឌិននៀវ សង្កាត់ប៉ៃលិន ក្រុងប៉ៃលិន ។
ជនបង្កហេតុដែលបើកបរម៉ូតូបុកគូទរថយន្តចតស្ងៀម ឈ្មោះ អឿប កូឡា ភេទប្រុស អាយុ២៥ឆ្នាំ រងរបួសបែកក្បាលផ្នែកខាងមុខ រយះមុខសន្លប់នៅនឹងកន្លែង ត្រូវក្រុមគ្រួសារយកទៅសង្គ្រោះនៅមន្ទីរពេទ្យខេត្តបាត់ដំបង រស់នៅភូមិសួនអំពៅលិច សង្កាត់ប៉ៃលិន ក្រុងប៉ៃលិន បើកបរម៉ូតូម៉ាកវ៉េវអាល់ហ្វាពណ៌ខ្មៅ ពាក់ស្លាកលេខ ក្រុងព្រះសីហនុ 1A-4165 រងការខូចខាតផ្នែកខាងមុខធ្ងន់ធ្ងរ ។ ចំណែកម្ចាស់រថយន្ត ឈ្មោះ ចាន់ ពៅ ភេទស្រី អាយុ៤៥ឆ្នាំ រស់នៅភូមិវាលចំបាំង ឃុំព្រៃធំ ស្រុកបាណន់ ខេត្តបាត់ដំបង និងបើកបររថយន្ត មិនស្គាល់អត្តសញ្ញាណ ដោយរថយន្តម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខ កំពត 3A-0021 អត់រងការខូចខាតទេ ។
ប្រភពព័ត៌មានពីលោកអនុេសេនីយ៍ទោ ឃ្លោក សាឡន នាយការិយាល័យចរាចរជើងគោកនៃស្នងការនគរបាលខេត្តប៉ៃលិន បានឱ្យដឹងថា មុនពេលកើតហេតុ មានបុរសមិនស្គាល់អត្តសញ្ញាណម្នាក់ បានបើកបររថយន្តមួយគ្រឿងម៉ាកហ៊ីយ៉ាន់ដាយពណ៌ខៀវ ក្នុងទិសដៅពីជើងទៅត្បូង តាមបណ្តោយផ្លូវជាតិលេខ៥៧ ហើយក៏បានចតនៅលើចិញ្ចើមផ្លូវដើម្បីចូលទិញម្ហូប ដោយស៊ីញ៉ូភ្លើងខាងស្តាំដៃ ។ ប្រភពបន្តទៀតថា លុះខណៈអ្នកបើកបរមិនទាន់ត្រឡប់មកវិញផង ស្រាប់តែម៉ូតូមួយគ្រឿងបើកបរដោយបុរសម្នាក់ ស្ថិតក្នុងសភាពស្រវឹងជោគជាំ ដោយបើកបរក្នុងទិសដៅពីជើងទៅត្បូងដូចគ្នាក្នុងល្បឿនលឿន ក៏ជ្រុលទៅបុកគូទរថយន្តយ៉ាងពេញទំហឹង បណ្តាលឱ្យម្ចាស់ម៉ូតូបោកខ្ទប់នឹងគូទរថយន្ត រួចធ្លាក់ទៅបោកក្បាលនឹងថ្នល់រងរបួសបែកក្បាលផ្នែកខាងមុខ រយះចិញ្ចើមសន្លប់នៅនឹងកន្លែង ត្រូវសមត្ថកិច្ចទាក់ទងរកបងប្អូនឱ្យ ដឹកតាមរថយន្តសង្គ្រោះយកទៅមន្ទីរពេទ្យខេត្តបាត់ដំបងភ្លាមៗ ។
ក្រោយពេលវាស់វែងម៉ូតូបង្កហេតុ និងរថយន្តខាងលើត្រូវសមត្ថកិច្ចចរាចរជើងគោក យកទៅរក្សាទុកនៅស្នងការដ្ឋាននគរបាលខេត្តប៉ៃលិន រង់ចាំធ្វើការដោះស្រាយតាមផ្លូវច្បាប់ ។
ចែករំលែកព័តមាននេះ