ខេត្តបាត់ដំបង ៖ ព្រះរាជអាជ្ញាអមសាលាដំបូងខេត្ត លោក នួន សាន បានចុះទៅពិនិត្យទីតាំង ដែលក្រុមជនទុច្ចរិតប៉ុនប៉ងជីកកកាយរកកំណប់ នៅក្បែរសំណង់អាងកំពីងកំពួយ ស្ថិតក្នុងឃុំតាគ្រាម ស្រុកបានន់ នៅព្រឹកថ្ងៃទី២៥ តុលានេះ បន្ទាប់ពីសំណុំរឿងដ៏រំជើបរំជួលនេះបានផ្ទុះឡើង ធ្វើឱ្យភ្ញាក់ផ្អើលពេញខេត្តបាត់ដំបង នាប៉ុន្មានថ្ងៃកន្លងទៅនេះ ។
រណ្តៅជីកកំណប់នេះ ត្រូវគេជីកនៅក្នុងក្រោមតូបលក់ម្ហូបអាហារ ដែលមានចម្ងាយពីសំណង់ទី១ នៃអាងកំពីងកំពួយប្រហែល៥០ម៉ែត្រ តែត្រូវសមត្ថកិច្ចបញ្ជាឱ្យម្ចាស់តូបយកក្តារវ៉ៃបិទជិតវិញហើយ ។ ប៉ុន្តែមានមនុស្សជាច្រើនកំពុងតាមឃ្លាំមើលសកម្មភាពមនុស្សប្លែកៗ ដែលចេញចូលទៅកាន់ទីនោះ ខណៈកម្លាំងសមត្ថកិច្ចបានដេកយាមជារៀងរាល់យប់យ៉ាងប្រុងប្រយ័ត្នបំផុត ។
លោក នួន សាន មានប្រសាសន៍ថា ដើម្បីកុំឱ្យបញ្ហាកំណប់នេះ បង្កការរំជើបរំជួលកាន់តែខ្លាំង យើងគួរតែបង្កើតក្រុមគណៈកម្មការមួយជីកកកាយរកកំណប់នេះតែម្តង ។ ហើយបើសិនជាមានកំណប់មែន គួរតែប្រើប្រាស់សម្រាប់អភិវឌ្ឍន៍ ឫកសាងនូវអ្វីជាមួយជាសម្បត្តិសាធារណៈ ដើម្បីទុកសម្រាប់ឱ្យកូនចៅជំនាន់ក្រោយៗបានដឹងនិងឃើញ ។ លោកថា យើងមិនគួរធ្វើអ្វីដែលនាំឱ្យមានការភ្ញាក់ផ្អើលនោះទេ ៕
ចែករំលែកព័តមាននេះ