រាជធានីភ្នំពេញ ៖ កំណាត់ផ្លូវជាតិលេ៤ ត្រូវបានបិទចរាចរណ៍ទាំងស្រុងអស់មួយកំណាត់ថ្ងៃ មិនអាចធ្វើដំណើរបានឡើយ ដោយសារតែកម្មករ-កម្មការិនីរោងចក្រកាត់ដេរហ្គ្រែនធ្វីង(ឃ្យូអឹមអាយ) ចំនួន ៥.៥០០នាក់ បានធ្វើកូដកម្មបិទផ្លូវទាមទារលក្ខខណ្ឌការងារ ។ បើទោះបីជាអាជ្ញាធរនិងសមត្ថកិច្ចខណ្ឌពោធិ៍សែនជ័យ ចុះទៅធ្វើការណែនាំនិងសំណូមពរឲ្យបើកផ្លូវឡើងវិញក៏កម្មករទាំងនោះមិនព្រមដែរ ។
ការបិទផ្លូវជាតិលេខ៤ដែលជាផ្លូវដ៏មមាញឹកបំផុតមួយ បង្កឲ្យមានការកកស្ទះចរាចរណ៍ កាលពីថ្ងៃទី២៤ តុលា ចាប់ពីម៉ោង៧និង៣០នាទី នៅត្រង់ចំណុចកែងផ្លូវបេតុងចូលរោងចក្រខាងលើ ស្ថិតក្នុងភូមិជម្ពូវ័ន សង្កាត់ចោមចៅ ខណ្ឌពោធិ៍សែនជ័យ ។ ក្រុមកម្មករបានឲ្យដឹងថា ការធ្វើកូដកម្មនោះ ដើម្បីទាមទារលក្ខខណ្ឌការងារចំនួន៥ចំណុចសំខាន់គឺ ៖
១-សុំឲ្យក្រុមហ៊ុនផ្តល់លុយបាយថ្ងែត្រង់៥.០០០រៀល ។
២-សុំឲ្យក្រុមហ៊ុនដំឡើងលុយថ្លៃបាយ ធ្វើការថែមម៉ោងក្នុង១ម៉ោងចំនួន២.០០០រៀល ។
៣-សុំឲ្យក្រុមហ៊ុនផ្តល់លុយបាយធ្វើការថែម ម៉ោងនៅថ្ងៃបុណ្យនិងថ្ងៃអាទិត្យក្នុង១ម៉ោង២០០០រៀល ។
៤-សុំឲ្យក្រុមហ៊ុនផ្តល់លុយលើកទឹកចិត្តដល់កម្មករណាដែលបំពេញការងារបានពេញចំនួន២៦ថ្ងែមិនដែលឈប់សោះចំនួន១០ដុល្លារក្នុង១ខែ ។
៥-ស្នើសុំឲ្យក្រុមហ៊ុនដំឡើងប្រាក់សោហ៊ុយថ្លៃស្នាក់នៅក្នុង១ខែ១៥ដុល្លារ ។
ក្រុមកម្មករបានបន្តថា រោងចក្រកាត់ដេរហ្គ្រែនធ្វីង (ឃ្យូអឹមអាយ) មានទីតាំងស្ថិតនៅក្នុងភូមិត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ មានកម្មករបម្រើការងារចំនួន៥.៥០០នាក់ ។ ការតវ៉ានេះមានរយៈពេល៤ថ្ងៃមកហើយគឺចាប់តាំងពីថ្ងៃទី២១ ខែតុលា មកម្លេ៉ះ ប៉ុន្តែដោយសារមិនមានដំណោះស្រាយតាមការទាមទារខាងលើនោះ ទើបពួកគេនាំគ្នាធ្វើការតវ៉ារហូតមក ។ មិនតែប៉ុណ្ណោះពេលនេះការបិទផ្លូវក៏មិនមានបំណងបង្កឲ្យមានការកកស្ទះចរាចរណ៍នោះទេ គឺដើម្បីពន្លឿនឲ្យមានការដោះស្រាយឲ្យបានឆាប់តែប៉ុណ្ណោះ ។
ប៉ូលិសបានឲ្យដឹងថា ប៉ុន្មានថ្ងៃកន្លងមកនេះក្រុមកម្មករទាំងនោះធ្វើការតវ៉ាតែនៅខាងមុខរោងចក្រប៉ុណ្ណោះ ហើយក៏មានការដោះស្រាយជាបន្តបន្ទាប់ដែរ ប៉ុន្តែមិនត្រូវគ្នា ទើបក្រុមកម្មករចេះតែបន្តធ្វើការតវ៉ារហូតមកដល់ពេលនេះរហូតនាំគ្នាឡើងបិទផ្លូវជាតិលេខ៤តែម្ដង។ ក្រុមកម្មករទាំងនោះបាននាំគ្នាកាន់បដាឈរត្រៀបត្រានៅលើផ្លូវ និងដាក់មេក្រូស្រែកទាមទារលក្ខខណ្ឌការងារនៅលើផ្លូវជាតិលេខ៤នោះបណ្ដាលឱ្យកំណាត់ផ្លូវជាតិនេះត្រូវស្ទះចរាចរណ៍អស់មួយកំណាត់ថ្ងៃ ។
ប៉ូលិសបានឲ្យដឹងទៀតថា ចាប់តាំងពីម៉ោង៧និង៣០នាទីព្រឹករហូតដល់ម៉ោងជាង១១ព្រឹកថ្ងៃដដែល ទើបក្រុមកម្មករនាំគ្នារំសាយបើកផ្លូវឡើងវិញ រង់ចាំស្ដាប់ការដោះស្រាយ ហើយចរាចរណ៍នៅលើកំណាត់ផ្លូវនោះបានរលូនឡើងវិញដែរ ។ ប៉ុន្តែក្រុមកម្មករបានព្រមានថានឹងបន្តធ្វើការបិទផ្លូវជាថ្មីម្ដងទៀត ប្រសិនបើមិនមានដំណោះស្រាយទៅតាមការទាមទារនោះទេ។ មិនតែប៉ុណ្ណោះនៅក្នុងពេលដែលក្រុមកម្មករធ្វើការតវ៉ាបិទផ្លូវនោះ យានយន្តគ្រប់ប្រភេទមួយចំនួនត្រូវជាប់គាំង និងមួយចំនួនទៀតបានបង្វែរទិសទៅតាមផ្លូវផ្សេងៗទៀត។ ប៉ុន្តែទោះបីជាបែបណាការបិទផ្លូវនេះបានបង្កការប៉ះពាល់ដល់អ្នកដទៃរាប់ពាន់នាក់ ដូច្នេះសូមសំណូមពរដល់កម្មករទាំងអស់ត្រូវតែអត់ធ្មត់ធ្វើការតវ៉ាទៅតាមច្បាប់ កុំធ្វើអ្វីនាំឲ្យប៉ះពាល់ដល់អ្នកដទៃបែបនេះ ។
កម្មកររោងចក្រស្បែកជើងហ៊ុយ ចៀន លើកគ្នាទៅតវ៉ានៅក្រសួងការងារជាថ្មីដើម្បីទាមទារប្រាក់អតីភាពការងារ
ក្នុងព្រឹត្តិការណ៍ដាច់ដោយឡែកមួយទៀត កម្មករ-កម្មការីនីរោងចក្រស្បែកជើងហ៊ុយ ចៀន ដែលមានទីតាំងនៅភូមិជ្រោយអម្ពិល សង្កាត់ក្បាលកោះ ខណ្ឌច្បារអំពៅ នៅព្រឹកថ្ងៃទី២៤ តុលា បាននាំគ្នាជិះរថយន្តមកកាន់ក្រសួងការងារ និងបណ្តុះបណ្តាលវិជ្ជាជីវៈ ដែលមានទីតាំងនៅតាមបណ្តោយមហាវិថីសហព័ន្ធរុស្ស៊ី ក្នុងសង្កាត់ទឹកល្អក់ទី១ ខណ្ឌទួលគោក ជាថ្មីទៀតដើម្បីទាមទារប្រាក់អតីតភាពការងារ បន្ទាប់ពីរោងចក្រនេះបានប្តូរឈ្មោះពី«ហ៊ុយ ចៀន» ទៅជា «ចៀន ឡឹ» ។ ការលើកគ្នាមកតវ៉ានេះគឺក្រុមកម្មករបានជិះរថយន្តមកដល់មុខក្រសួងនៅវេលាម៉ោង៩ព្រឹក ហើយលើកបដា និងរូបសម្តេចតេជោ សម្តេចកិត្តិព្រឹទ្ធបណ្ឌិត ព្រមទាំងខ្លះបានកាន់ចាន ឆ្នាំង ស្លាបព្រា ឈរនិងអង្គុយ វាយលាន់រំពងក្នុងគោលបំណងស្វែងរកកិច្ចអន្តរាគមន៍និងបញ្ជាក់ថា ពួកគេកំពុងតែប្រឈមមុខនឹងបញ្ហាជីវភាព ខណៈពេលដែលការធ្វើកូដកម្មនេះមានរយៈពេលជាង២ខែមកហើយនៅតែពុំទាន់មានដំណោះស្រាយ។
តាមតំណាងកម្មករបានឱ្យដឹងថា កម្មករ-កម្មការីនីរោងចក្រហ៊ុយ ចៀន មានចំនួនជាង១.២០០នាក់ បានផ្ទុះការតវ៉ាកាលពីថ្ងៃទី១៥ ខែកញ្ញា ឆ្នាំ២០១៤ បន្ទាប់ពីថៅកែរោងចក្រនេះបានប្តូរឈ្មោះរោងចក្រពី«ហ៊ុយ ចៀន »ទៅជា«ចៀន ឡឹ» ។ ការប្តូរឈ្មោះរោងចក្រនេះត្រូវបានក្រុមកម្មករចោទប្រកាន់ថា នេះជាល្បិចរបស់ថៅកែរោងចក្រដែលមានបំណងបញ្ចប់កិច្ចសន្យា ទើបក្រុមកម្មករទាំងអស់បានផ្ទុះការតវ៉ាឡើងដើម្បីទាមទារប្រាក់អតីតភាពការងារ ។
តាមតំណាងកម្មករបន្តទៀតថា នៅក្នុងការតវ៉ានេះក្រុមកម្មករបានតវ៉ានៅមុខរោងចក្រនិងលើកគ្នាជាបន្តបន្ទាប់មកកាន់ក្រសួងការងារនិងបណ្តុះបណ្តាលវិជ្ជាជីវៈ រដ្ឋសភា ស្ថានទូតចិន និងសមាគមរោងចក្រកាត់ដេរជាច្រើនលើកហើយត្រូវបានអង្គភាពពាក់ព័ន្ធក៏ដូចលោករដ្ឋមន្ត្រី អុិត សំហេង សន្យាថា នឹងជួយជំរុញឱ្យថៅកែរោងចក្រគិតប្រាក់អតីតភាពតាមច្បាប់ការងារខណៈពេលរោងចក្រនេះបានប្តូរឈ្មោះតែនៅតែគ្មានដំណោះស្រាយ ។ ដោយសារតែគ្មានដំណោះស្រាយទើបពួកគេលើកគ្នាមកក្រសួងការងារ និងបណ្ដុះបណ្ដាលវិជ្ជាជីវៈ ជាថ្មីម្តងទៀត ។ នៅព្រឹកនោះ ក្រុមការងារគណៈកម្មការដោះស្រាយកូដកម្ម បាតុកម្មនៅគ្រប់មុខសញ្ញា ក៏បានហៅតំណាងកម្មករ-កម្មការីនីចំនួន១០នាក់ ទៅជួបប្រជុំក្រោមអធិបតីភាពលោកប្រាក់ ចាន់ធឿន អគ្គលេខាធិការនៃគណៈកម្មការសម្រាប់ដោះស្រាយបញ្ហាកូដកម្ម បាតុកម្មនៅតាមគ្រប់មុខសញ្ញា ។ នៅក្នុងជំនួបនោះអង្គប្រជុំបានសម្រេចដូចខាងក្រោម៖
១-ក្រុមការងារនឹងបង្កើតគណៈកម្មាធិការចម្រុះដែលមានការចូលរួមពីគ្រប់ភាគីនិងអាជ្ញាធរពាក់ព័ន្ធ ដើម្បីដោះស្រាយសំណើរបស់បងប្អូនកម្មករនិយោជិតទៅតាមច្បាប់ការងារ។
២-អង្គប្រជុំស្នើឱ្យបងប្អូនកម្មករ និយោជិតអត់ធ្មត់ រក្សាសណ្តាប់ធ្នាប់សាធារណៈនិងរបៀបរៀបរយសង្គម ដើម្បីរង់ចាំការសម្រេចរបស់ក្រុមប្រឹក្សាអាជ្ញាកណ្តាល ។
ទោះបីជាយ៉ាងណា ក្រុមកម្មករ-កម្មការីនីហាក់ដូចជាគ្មានជំនឿ ព្រោះកន្លងមកថៅកែរោងចក្រហាក់ដូចគ្មានចេតនាក្នុងការដោះស្រាយ ។ ក្រុមកម្មករបានបន្តប្រមូលផ្តុំគ្នារហូតដល់ម៉ោងប្រមាណ១រសៀលទើបបំបែកគ្នាធ្វើដំណើរត្រឡប់ទៅលំនៅឋានវិញ។
កម្មករស្បែកជើងជូហួយបន្តធ្វើកូដកម្មទាមទារលក្ខខណ្ឌការងារ១២ចំណុច
ខេត្តកំពង់ចាម ៖ ដោយសារតែថៅកែមិនព្រមដោះស្រាយនូវលក្ខខណ្ឌការងារចំនួន១២ចំណុចនោះ ទើបនៅព្រឹកថ្ងៃទី២៤ តុលា ក្រុមកម្មករ កម្មការិនីរោងចក្រស្បែកជើងជូហួយ ដែលមានទីតាំងនៅឃុំខ្នុរដំបង ស្រុកជើងព្រៃជាច្រើនរយនាក់នាំគ្នាធ្វើកូដកម្ម និងបុកបារ៉ាស់ទម្លាយចំនួន២កន្លែង ថែមទាំងបានប្រើដុំថ្មគប់ចូលទៅក្នុងបរិវេណរោងចក្រ បុ៉ន្តែមិនមានអ្នកណាម្នាក់រងរបួសក្នុងបាតុភាពទេ ។
លោកវរសេនីយ៍ត្រី យ៉ែម សុផល អធិការរងនគរបាលស្រុកជើងព្រៃ បានឱ្យដឹងថា រយៈពេលជាង១ខែមកហើយដែលក្រុមកម្មករ កម្មការិនីរោងចក្រស្បែងជើងជួហួយ នាំគ្នាតវ៉ាទាមទារលក្ខខណ្ឌការងារពីថៅកែរោងចក្រដែលមានចំនួនរហូតដល់ជាង១០ចំណុច ហើយពេលកន្លងមកក៏ធ្លាប់បិទផ្លូវជាតិមិនឱ្យរថយន្តបើកឆ្លងកាត់ និងដាក់ធុងបាស់រាំលេងមិននាំគ្នាចូលធ្វើការដែរ ។
លោកអធិការរងបន្តថា ជាមួយនេះ ក្រុមកម្មករ កម្មការិនីក៏ធ្លាប់នាំគ្នាមកតវ៉ាដល់មន្ទីរការងារខេត្តឱ្យជួយអន្តរាគមន៍ទៀតផង បុ៉ន្តែនៅតែមិនមានដំណោះស្រាយចេញតាមការទាមទារដដែល ។ ចំពោះសកម្មភាពតវ៉ាធ្វើកូដកម្មមានជាច្រើនលើក ហើយធ្លាប់បានផ្ទុះហិង្សាបណ្តាលឱ្យជនជាតិចិនចំនួន២នាក់រងរបួសថែមទៀត ។
លុះមកដល់ព្រឹកថ្ងៃទី២៤ តុលា ក្រុមកម្មករ កម្មការិនីជាច្រើនរយនាក់ នាំគ្នាតវ៉ានៅខាងមុខរោងចក្រ និងបានបុកទម្លាយបារ៉ាស់ទី១ និងទី២ ចូលដល់ក្នុងបរិវេណរោងចក្រដើម្បីទាមទារលក្ខខណ្ឌការងារពីថៅកែរោងចក្រ បុ៉ន្តែមិនបានលទ្ធផល ។ ការតវ៉ានេះដឹកនាំដោយតំណាងកម្មករចំនួន១៥នាក់ដែលត្រូវសាលាដំបូងខេត្តកោះហៅសួរនាំ តែក្រុមនោះមិនបានទៅទេ ។
លោកឧត្តមសេនីយ៍ត្រី បែន រ័ត្ន ស្នងការនគរបាលខេត្តមានប្រសាសន៍ឱ្យដឹងដែរថា នៅព្រឹកថ្ងៃទី២៤ តុលា រូបលោកបានចាត់ឱ្យកម្លាំងនគរបាលចំនួន១០០នាក់សហការជាមួយនឹងកម្លាំងកងរាជអាវុធហត្ថទៅការពាររោងចក្រជូហួយ ។ លុះនៅម៉ោងជាង១១ព្រឹក ក្រុមកម្មករ កម្មការិនី ក៏បានទាមទារឱ្យតំណាង១៥នាក់នោះដែលជាសមាជិកសហជីពស៊ីខៅឌូ ដែលត្រូវបណ្តេញចេញ ឱ្យបានចូលធ្វើការវិញ ព្រមទាំងបានអុកឡុកកម្មករផ្សេងដែលចូលធ្វើការផងដែរ ព្រោះពេលនោះមានអ្នកខ្លះធ្វើបាតុកម្ម អ្នកខ្លះអត់ចូលរួមធ្វើទេ គិតតែពីបំពេញការងាររបស់ខ្លួន ៕
ចែករំលែកព័តមាននេះ