ខេត្តបាត់ដំបង ៖ តាមរយៈមន្ត្រីនៃមន្ទីរធនធានទឹក និងឧតុនិយមខេត្តបានឱ្យដឹងថា ក្រសួងធនធានទឹក និងឧតុនិយមបានព្រមានចាប់ខ្លួនជនណាដែលព្យាយាមជីកកកាយស្វែងរកកំណប់ធ្វើឱ្យប៉ះពាល់ដល់ទំនប់សំណង់អាងកំពីងពួយ បើទោះជាជននោះជាមន្ត្រីមានអំណាចក្នុងខេត្ត ឬមកពីក្រៅខេត្តក្ដី ព្រោះតំបន់សំណង់អាងកំពីងពួយ ស្ថិតក្រោមការអភិរក្សរបស់ក្រសួងធនធានទឹក និងឧតុនិយម ។
ខេត្តបាត់ដំបង ៖ តាមរយៈមន្ត្រីនៃមន្ទីរធនធានទឹក និងឧតុនិយមខេត្តបានឱ្យដឹងថា ក្រសួងធនធានទឹក និងឧតុនិយមបានព្រមានចាប់ខ្លួនជនណាដែលព្យាយាមជីកកកាយស្វែងរកកំណប់ធ្វើឱ្យប៉ះពាល់ដល់ទំនប់សំណង់អាងកំពីងពួយ បើទោះជាជននោះជាមន្ត្រីមានអំណាចក្នុងខេត្ត ឬមកពីក្រៅខេត្តក្ដី ព្រោះតំបន់សំណង់អាងកំពីងពួយ ស្ថិតក្រោមការអភិរក្សរបស់ក្រសួងធនធានទឹក និងឧតុនិយម ។
លោក ឃុន សេង អនុប្រធានការិយាល័យអភិរក្សធនធានទឹក នៃមន្ទីរធនធានទឹកនិងឧតុនិយមខេត្ត បានប្រាប់តាមទូរស័ព្ទកាលពីព្រឹកថ្ងៃទី២៤ តុលា ថា ទីតាំងដែលជនមួយក្រុមប៉ងជីកកកាយរកកំណប់នៅក្បែរសំណង់អាងកំពីងពួយនោះ ត្រូវគេបិទក្ដារជិតវិញហើយ បន្ទាប់ពីបែកធ្លាយផ្អើលពេញខេត្ត ។ លោកថា របាយការណ៍ស្ដីអំពីជនមួយក្រុមដែលដឹកនាំដោយអ្នកមានអំណាចក្នុងខេត្ត ចង់ជីកកកាយរកកំណប់ធ្វើឱ្យប៉ះពាល់ដល់ទំនប់សំណង់អាងកំពីងពួយនេះ លោកបានរៀបចំបញ្ជូនទៅក្រសួងរួចរាល់ហើយ ហើយខាងក្រសួងក៏មានវិធានការតាមផ្លូវច្បាប់ផងដែរចំពោះជនប្រព្រឹត្ត ។
លោក ឃុន សេង បានបញ្ជាក់ថា ក្រសួងបានព្រមានចាប់ខ្លួនបុគ្គលឬក្រុមណាដែលហ៊ានជីកកកាយធ្វើឱ្យប៉ះពាល់ដល់ទំនប់សំណង់កំពីងពួយ បើទោះជាជីករកកំណប់ ឬមិនរកកំណប់ក្ដី ព្រោះតំបន់សំណង់អាងកំពីងពួយទាំងមូល ដែលជាតំបន់ទេសចរណ៍ដ៏ល្បីផងនោះ គឺស្ថិតក្រោមការអភិរក្សនិងការទទួលខុសត្រូវរបស់មន្ទីរធនធានទឹកនិងឧតុនិយមខេត្ត ។ ប៉ុន្តែរហូតមកដល់ពេលនេះសកម្មភាពក្រុមអ្នកស្វែងរកកំណប់ក្បែរសំណង់អាងកំពីងពួយនេះ បានស្ងប់ស្ងាត់បន្តិចហើយ ។
សូមបញ្ជាក់ថា ជនមួយក្រុមដែលមជ្ឈដ្ឋាននានាសង្ស័យថាដឹកនាំដោយលោក ជាម ច័ន្ទសោភ័ណ្ឌ អភិបាលរងខេត្ត បានព្យាយាមប្រើប្រាស់គ្រប់មធ្យោបាយជាងមួយសប្ដាហ៍កន្លងទៅនេះ ក្នុងការធ្វើសកម្មភាពជីកកកាយរកកំណប់នៅខាងក្រោមតូបលក់ម្ហូបអាហារមួយកន្លែងចម្ងាយ៥០ម៉ែត្រ ពីសំណង់ទី១ នៃទំនប់អាងកំពីងពួយ ដែលជាតំបន់ទេសចរណ៍ប្រវត្តិសាស្ត្រដ៏ល្បីល្បាញ នៅក្នុងឃុំតាគ្រាម ស្រុកបាណន់។ ក្រុមជនទុច្ចរិតនេះ បានប៉ុនប៉ងជីករកកំណប់នោះក្នុងទ្រង់ទ្រាយធំ និងឱ្យបានសម្រេច នៅយប់ថ្ងៃទី២២តុលា តែចៃដន្យគម្រោងការដ៏ខ្មៅងងឹតនេះត្រូវបានបែកធ្លាយ ដល់មន្ទីរធនធានទឹក និងស្នងការដ្ឋាននគរបាលខេត្ត ទើបលោកស្នងការខេត្តបញ្ជាឱ្យកម្លាំងសមត្ថកិច្ចសហការជាមួយមន្ត្រីធនធានទឹក ចុះតាមឃ្លាំមើល និងព្រមានចាប់ខ្លួនជនប្រព្រឹត្តទៀតផង ខណៈលោក ជាម ច័ន្ទសោភ័ណ្ឌ និងកម្លាំងរបស់គាត់មួយចំនួន ត្រូវគេដឹងថាបានជួបជុំពិភាក្សាគ្នានៅក្នុងសាលាឃុំតាគ្រាម រីឯកម្លាំងស៊ីឈ្នួលមួយចំនួនទៀត ត្រូវបានគេបង្កប់ជាស្រេចនៅតាមផ្ទះអ្នកស្រុក ក្បែរទីតាំងជីកកំណប់នោះ ដើម្បីរង់ចាំបញ្ជាពីមេកើយឱ្យធ្វើសកម្មភាព ។
តាមប្រភពព័ត៌មានពីតំបន់ទេសចរណ៍អាងកំពីងពួយ នៅព្រឹកថ្ងៃទី២៤ តុលា ថា មួយថ្ងៃមុនពេលក្រុមជនទុច្ចរិតរៀបគម្រោងជីករកកំណប់ក្នុងទ្រង់ទ្រាយធំ នារាត្រីថ្ងៃទី២២ តុលា គឺមានមនុស្សមកហាមប្រាមមិនឱ្យប្រជាពលរដ្ធដែលរស់នៅក្បែរកន្លែងជីកកំណប់នោះ មានការភ្ញាក់ផ្អើលឬដើរចេញពីផ្ទះទេ គឺត្រូវស្ថិតក្នុងភាពស្ងាត់ស្ងៀម ទោះជាឃើញមានកម្លាំងសមត្ថកិច្ច ឬមានមនុស្សទៅជីកកកាយដីនៅក្បែរសំណង់ទី១ នៃអាងកំពីងពួយនេះក្ដី ។ ប្រភពដដែលបញ្ជាក់ថា តាមពិតគម្រោងទុច្ចរិតនោះត្រូវបានមនុស្សមួយចំនួន ចុះទៅស្ទាបស្ទង់ទឹកចិត្តប្រជាពលរដ្ឋនៅក្បែរនោះច្រើនថ្ងៃកន្លងមកហើយ មុនពេលធ្វើសកម្មភាព តែសំណាងល្អដែលសមត្ថកិច្ចខេត្ត ចុះរារាំងនិងទប់ស្កាត់ទាន់ពេលវេលា ។
លោក ជេត វណ្ណនី ស្នងការរងខេត្តបានថ្លែងពីការកត់់សម្គាល់របស់លោកដែរថា នៅយប់ថ្ងៃទី២២ តុលា ប្រជាពលរដ្ឋដែលរស់នៅក្បែរសំណង់ទី១ ពិតជាស្ថិតក្នុងស្ថានភាពស្ងប់ស្ងាត់គ្មានមនុស្សដើរចេញពីផ្ទះមែន បើទោះជាកម្លាំងរបស់លោកដើរចុះឡើងព្រោងព្រាតពេញលើសំណង់អាងកំពីងពួយក្ដី ។ លោកថា នៅយប់ថ្ងៃទី២៣ តុលា លោកស្នងការខេត្តក៏បានបញ្ជាឱ្យលោកដឹកនាំកម្លាំងចុះទៅដេកយាមទីតាំងជីកកំណប់នោះបន្តទៀត ស្រាប់តែគេពិនិត្យឃើញនៅតាមផ្ទះអ្នកភូមិក្បែរនោះបានបើកបំភ្លឺភ្លើង និងមានមនុស្សរស់នៅព្រោងព្រាតខុសពីយប់ដំបូង ដែលក្នុងផ្ទះងងឹត ហើយស្ងាត់ជ្រងំដូចគ្មានមនុស្សរស់នៅ ។ លោកសង្ស័យថា ប្រហែលជាមានមនុស្សរៀបចំមុនមែនហើយ ។
លោកស្នងការរងបានបញ្ជាក់ដែរថា លោកស្នងការខេត្តបានចេញបញ្ជារួចហើយ ដោយឱ្យកម្លាំងសមត្ថកិច្ចត្រូវតែចាំឃ្លាំមើលសកម្មភាពក្រុមអ្នកស្វែងរកកំណប់នេះបន្តទៀត ដើម្បីចាត់ការតាមផ្លូវច្បាប់ ។ លោក ឃុន សេង អនុប្រធានការិយាល័យអភិរក្សធនធានទឹក នៃមន្ទីរធនធានទឹកនិងឧតុនិយមខេត្ត ដែលគ្រប់គ្រងតំបន់អាងកំពីងពួយក៏បញ្ជាក់ដែរថា ក្រោយពីទទួលបានបញ្ជាពីក្រសួងធនធានទឹកនិងឧតុនិយម ខាងមន្ទីរធនធានទឹកខេត្តក៏បានរៀបវិធានការក្នុងការតាមឃ្លាំមើលសកម្មភាពក្រុមជនទុច្ចរិតមួយក្រុមនេះជាប្រចាំផងដែរ ។ លោកថា ក្រសួងបានបញ្ជាឱ្យចាប់ខ្លួនតែម្ដង ចំពោះជនណាដែលថ្លើមធំហ៊ានលួចជីកកកាយដីធ្វើឱ្យប៉ះពាល់ដល់ទំនប់ឬសំណង់អាងកំពីងពួយ ។
ទោះជាយ៉ាងណា បើតាមប្រភពព័ត៌មាននៅព្រឹកថ្ងៃទី២៤ តុលា បានឱ្យដឹងថា ក្រុមអ្នកស្វែងរកកំណប់កំពុងព្យាយាមបិទបាំងរឿងអាស្រូវរបស់ខ្លួន និងរកវិធីសាស្ត្រឆ្លើយដោះបន្ទុក ដោយឆ្លើយបដិសេធថា ខ្លួនមិនបានជួបជុំគ្នានៅក្នុងសាលាឃុំតាគ្រាម ទេ ។ ប៉ុន្តែចម្លើយប្រដេញដាក់គ្នានេះ ហាក់ដូចមិនស៊ីសង្វាក់គ្នាទេ ព្រោះមានជនខ្លះឆ្លើយជាន់កែងខ្លួនឯងទៀតផង ។ ដូច្នេះបើចង់ស្រាវជ្រាវឱ្យដឹងការពិត ប្រហែលត្រូវសួរនាំលោកមេឃុំ ឬសមត្ថកិច្ចមូលដ្ឋានហើយ ទើបដឹងការពិត ៕
ចែករំលែកព័តមាននេះ