ខេត្តក្រចេះ ៖ អំពើឃាតកម្មសម្លាប់ស្ត្រីកូនខ្ចីម្នាក់ ដោយមួលបំបាក់ក ត្រូវនគរបាលស្រាវជ្រាវចាប់បានជនដៃដល់ និងបក្សពួកម្នាក់ ទើបបំបែកសំណុំរឿងនេះ គឺជាការស៊ីឈ្នួលសម្លាប់មនុស្សក្នុងតម្លៃយ៉ាងថោកត្រឹម២៥ម៉ឺនរៀល ។ ម្យា៉ងទៀត ស្របពេលដែលជនដៃដល់ក៏មានការគុំកួននឹងស្ត្រីរងគ្រោះ ដោយចោទយ៉ាងអគតិថា ស្ត្រីរងគ្រោះធ្វើអំពើអាបធ្មប់ឱ្យម្តាយគេស្លាប់ កាលពីប៉ុន្មានខែមុន ។
តាមការបញ្ជាក់របស់លោកវរសេនីយ៍ឯក អ៊ុំ ភី ស្នងការរងនគរបាលខេត្តឱ្យដឹងនៅថ្ងៃទី២៤ តុលា នៅក្នុងសន្និសីទកាសែតថា ដោយសារតែគំនុំ ពីរនាក់ប្តីប្រពន្ធឈ្មោះ ប្រែ យ៉ន អាយុ៥៦ឆ្នាំ ជាប្តី និងប្រពន្ធឈ្មោះ យ៉យ អេន អាយុ៥៧ឆ្នាំ បានខឹងប្តីស្ត្រីរងគ្រោះពីការទិញគោយន្តកន្ត្រៃឱ្យជារបស់មិនល្អយកមកប្រើមិនកើត ។ លោកស្នងការរងបានបញ្ជាក់ថា បន្ទាប់ពីមានការគុំកួនបែបនេះ ពីរនាក់ប្តីប្រពន្ធដែលមានទីលំនៅភូមិស្រែស្រែង ឃុំក្បាលដំរី ស្រុកសំបូរ ក៏បានទៅញុះញង់ជនដៃដល់ឈ្មោះ ចក់ ណែន អាយុ២៦ឆ្នាំ មានទីលំនៅក្បែរគ្នាថា ម្តាយរបស់ឯងដែលស្លាប់ គឺដោយសារតែស្ត្រីរងគ្រោះជាអ្នកធ្វើអំពើអាបធ្មប់ដាក់ ហើយក៏បានជួលជននេះក្នុងតម្លៃ២៥ម៉ឺនរៀលឱ្យទៅសម្លាប់ស្ត្រីនោះតែម្តង ។
ទោះបីជាយ៉ាងណា គម្រោងការរបស់ពួកគេដែលប៉ងសម្លាប់ស្ត្រីម្នាក់នេះ គឺបានរៀបចំជាច្រើនលើកច្រើនសាមកហើយ តែមិនបានសម្រេច ខណៈដែលប្តីស្ត្រីរងគ្រោះនៅជាមួយក្រុមគ្រួសារ មិនទាន់ចូលទៅក្នុងព្រៃ ។ស្ត្រីរងគ្រោះដែលត្រូវគេសម្លាប់យ៉ាងព្រៃផ្សៃនេះឈ្មោះ អំ ផាចមុំ អាយុ៣២ឆ្នាំ ជាស្ត្រីសរសៃខ្ចីទើបសម្រាលកូនស្រីបាន២ខែ ហើយកាលពីយប់កើតហេតុ ថ្ងៃទី២២ តុលា ស្ត្រីរងគ្រោះនៅផ្ទះម្នាក់ឯងជាមួយកូនតូចៗ៣នាក់ ខណៈប្តីចូលទៅក្នុងព្រៃ ។
អធិការនគរបាលស្រុកសំបូរ លោកវរសេនីយ៍ត្រី ប៊ុន ឈឿន បានឱ្យដឹងថា កាលពីយប់ថ្ងៃកើតហេតុក្រុមជនដៃដល់មានគ្នាពីរនាក់ បានមកជួបជុំគ្នានៅផ្ទះពីរនាក់ប្តីប្រពន្ធដែលជាអ្នកញុះញង់ និងរៀបចំគម្រោងសម្លាប់ស្ត្រីរងគ្រោះ ។ ក្នុងសកម្មភាពនោះ គឺជនដៃដល់មានគ្នា២នាក់ ដោយម្នាក់ឡើងតាមជណ្តើរមុខ និងម្នាក់ចូលតាមជញ្ជាំងខាងក្រោយ ហើយចាប់ស្ត្រីរងគ្រោះយកក្រមារុំមាត់ និងចងស្លាបសេកចាប់អូសបណ្តើរកាត់ព្រៃដំឡូងខាងក្រោយផ្ទះ សំដៅមកបឹងដែលមានចម្ងាយជាង២គីឡូម៉ែត្រ ទើបសម្លាប់ដោយមួលបំបាក់.ក រួចទម្លាក់ទៅក្នុងបឹងដែលមានព្រៃត្រែងនិងស្មៅ ។
លោកស្នងការរង អ៊ុំ ភី បានបញ្ជាក់ទៀតថា ក្រោយពីទទួលបានព័ត៌មានពីករណីបាត់មនុស្ស កម្លាំងនគរបាលជំនាញជាច្រើននាក់ ក្រោមការចង្អុលបង្ហាញពីលោកឧត្តមសេនីយ៍ស្នងការ លន់ សុផាត បានចុះទៅធ្វើការសើុបអង្កេតដល់ទីកន្លែងកើតហេតុ និងឈានដល់ការឃាត់ខ្លួនមុខសញ្ញាជាបន្តបន្ទាប់ក្នុងថ្ងៃតែមួយ គឺថ្ងៃទី២៣ ខែតុលា ។
លោកស្នងការរងបញ្ជាក់ថា ជនសង្ស័យប្រុសស្រីទាំងបីនាក់នេះ ត្រូវបានកសាងសំណុំរឿងពីបទអំពើឃាតកម្មគិតទុកជាមុន ។ រីឯបក្ខពួកជនដៃដល់ម្នាក់ទៀតដែលបានរត់គេចខ្លួនបន្ទាប់ពីធ្វើសកម្មភាពរួច និងបានចែកលុយគ្នាហើយនោះ គឺកម្លាំងនគរបាលបានកំណត់មុខសញ្ញាច្បាស់ហើយ និងកំពុងតែតាមប្រមាញ់ ៕
ចែករំលែកព័តមាននេះ