ខេត្តឧត្តរមានជ័យ ៖ ក្រុមទាហានឈុតខ្មៅថៃបាញ់ពលរដ្ឋខ្មែរស្លាប់ម្នាក់ក្នុងចំណោម២នាក់ខណៈពលរដ្ឋខ្មែរទាំងនោះឆ្លងដែនចូលទៅលួចម៉ូតូប្រជាពលរដ្ឋថៃកាលពីវេលាម៉ោង៣ និង ៣៥នាទីរសៀលថ្ងៃទី២៣ តុលា២០១៤កន្លងទៅនេះហើយក្រុមទាហានឈុតខ្មៅថៃបានបញ្ជូនសាកសពពលរដ្ឋខ្មែរប្រគល់ឲ្យសមត្តកិច្ចកម្ពុជាវិញតាមមាត់ច្រកទ្វារអន្តរជាតិអូរស្មាច់នៅវេលាម៉ោង៩យប់ ថ្ងៃខែដដែល ស្ថិតនៅក្នុងភូមិអូរស្មាច់សង្កាត់អូរស្មាច់ ក្រុងសំរោង ខេត្តឧត្តរមានជ័យ។
លោក ជ័យ វាស្នា នាយប៉ុស្កិ៍រដ្ឋបាលអូរស្មាច់បានឱ្យដឹងថា សាកសពពលរដ្ឋខ្មែរដែលទាហ៊ានថៃបាញ់ស្លាប់ឈ្មោះ ហេង មេងអ៊ី ភេទប្រុស អាយុ២៤ឆ្នាំ រស់នៅភូមិព្រែកតាឡី ឃុំព្រែកអំបិល ស្រុកស្អាង ខេត្តកណ្តាលដែលត្រូវក្រុមទាហានថៃបាញ់ស្លាប់នៅវេលាម៉ោង ៣និង៣៥នាទីរសៀលទី២៣ ខែតុលា ឆ្នាំ២០១៤ ហើយក្រុមទាហានថៃបានបញ្ជូនសាកសពខ្មែរមកប្រគល់ឱ្យសមត្ថកិច្ចកម្ពុជាតាមច្រកអន្តរជាតិអូរស្មាច់នៅវេលាម៉ោង៩ យប់ថ្ងៃដដែល ។
លោកនាយប៉ុស្តិ៍បានបន្តថា សមត្ថកិច្ចយើងបានធ្វើការត្រួតពិនិត្យសាកសពពលរដ្ឋខ្មែរដែលស្លាប់នោះឃើញមានស្លាកស្នាម ត្រូវគ្រាប់កាំភ្លើងចំនួន៣គ្រាប់ គឺបាញ់ចំក្បាល១គ្រាប់ និងខ្លួនមួយគ្រាប់ នឹងត្រូវចំភ្លៅ១គ្រាប់លោកបានបញ្ចាក់ថា តាមរបាយការណ៍របស់ទាហានថៃបានផ្តល់មកឱ្យសមត្ថកិច្ចខាងកម្ពុជាឱ្យដឹងថា មានពលរដ្ឋខ្មែរ២នាក់បាននាំគ្នាចូលទៅតាមច្រកអូរខ្លាឃ្មុំ ប្រមាណជាង៤០០ម៉ែត្រ ពីព្រំដែនចូលទៅលួចម៉ូតូអ្នកភូមិថៃ ហើយប្រជាពលរដ្ឋថៃ បានប្តឹងទៅទាហានថៃបន្ទាប់មកក្រុមទាហានថៃស្ទាក់បាញ់ស្លាប់ម្នាក់ ចំណែកឯម្នាក់ទៀតបានរត់គេចខ្លួនរួចផុតពីសេចក្តីស្លាប់បាត់បង់ជីវិត ។សាកសពពលរដ្ឋខ្មែរបន្ទាប់ពីបានធ្វើការត្រួតពិនិត្យរួចត្រូវបានប្រគល់ទៅឲ្យឪពុកម្តាយសាច់ញាតិឲ្យទៅធ្វើបុណ្យទៅតាមប្រពៃណី ។
ព័ត៌មានលម្អិតនឹងមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ