រាជធានីភ្នំពេញ ៖ ស្រ្តីម្នាក់ត្រូវបុរសពិការជើងម្នាក់ យកឈើច្រត់វាយបណ្តាលឱ្យសន្លប់ស្តូកស្តឹងបន្ទាប់ពីមានជម្លោះពាក្យសម្តីគ្នា ក្នុងវង់ផឹកស៊ី។ ហេតុការណ៍នេះកើតឡើងកាលពីវេលាម៉ោង ១០ យប់ថ្ងៃទី២៤ តុលា ២០១៤ នៅក្រោមស្ពានអាកាសក្បាលថ្នល់ ស្ថិតក្នុងសង្កាត់ចាក់អង្រែលើ ខណ្ឌមានជ័យ ។
ប្រភពព័ត៌មានពីប្រជាពលរដ្ឋដែលបានឃើញហេតុការណ៍បានឱ្យដឹងថា មុនពេលកើតហេតុគេឃើញបុរសពិការជើងម្នាក់អង្គុយផឹកស៊ីជាមួយមនុស្សបី បួននាក់ទៀតដែលក្នុងនោះមានស្រ្តីរងគ្រោះផងដែរ បានអង្គុយផឹកស៊ីជុំគ្នាក្រោមស្ពានអាកាសក្បាលថ្នល់ មួយសន្ទុះក្រោយមកស្រាប់តែគេឃើញបុរសពិការជើងខាងលើមានជម្លោះពាក្យសម្តីគ្នាជាមួយស្រ្តីរងគ្រោះ ហើយបុរសពិការជើងក៏បានទាញឈើច្រត់របស់ខ្លួនវាយទៅស្រ្តីរងគ្រោះ៤ទៅ៥ ឈើច្រត់បណ្តាលស្រ្តីរងគ្រោះសន្លប់ស្តូកស្តឹង ។ បន្ទាប់ពីវាយស្រ្តីរងគ្រោះឱ្យសន្លប់ហើយនោះ ក្រុមក្មេងស្ទាវដែលបានឃើញហេតុការណ៍ខឹងនិងបុរសពិការនោះក៏បានយកដុំថ្មគប់បុរសនោះបែកក្បាល ហើយក្រុមក្មេងស្ទាវបានគេចខ្លួនបាត់ស្រមោល ។
ក្រោយពេលកើតហេតុសមត្ថកិច្ចបានចុះមកពិនិត្យកន្លែងកើតហេតុ និងបានបញ្ជូនស្រ្តីរងគ្រោះទៅព្យាបាលនៅមន្ទីរពេទ្យ ។
ចែករំលែកព័តមាននេះ