រាជធានីភ្នំពេញ ៖ ទីតាំងក្រុមហ៊ុន សិនជូរី ខេមបូឌា ជ្រើសរើសពលការនីទៅធ្វើការនៅប្រុសទេសម៉ាឡេស៊ីត្រូវបានកម្លាំងសមត្ថកិច្ចចម្រុះបើកប្រតិបត្តិការឡោមព័ទ្ធបន្ទាប់ពីទទួលបានពាក្យបណ្តឹងរបស់ពលការិនីម្នាក់ ថាក្រុមហ៊ុនបង្ខាំងទុករូបនាង និងពលការិនីដៃទៀតដើម្បីបញ្ជូនទៅធ្វើការនៅប្រទេសម៉ាឡេស៊ី ។ ប្រតិបត្តិការនេះធ្វើឡើងនៅម៉ោង ៣និង ៤០នាទីរសៀល ថ្ងៃទី២៤ តុលា ២០១៤ នៅចំណុចផ្ទះលេខ២៤៤ ផ្លូវបេតុង ភូមិជ្រៃកោង សង្កាត់ចោមចៅ ខណ្ឌពោធិ៍សែនជ័យ ។
ប្រភពព័ត៌មានបានឱ្យដឹងថា មុននឹងឈានទៅធ្វើការឡោមព័ទ្ធទីតាំងជ្រើសរើសពលការិនីខាងលើ គឺមានស្រ្តីម្នាក់មានឈ្មោះ ញ៉ុញ ហេង អាយុ៣១ឆ្នាំ ជាកម្មករធ្វើចម្ការនៅឃុំសាស្តា ស្រុកសំពៅលូន ខេត្តបាត់ដំបង ហើយមានស្រុកកំណើតនៅភូមិបឹងខ្នា ឃុំបឹងខ្នា ស្រុងបានកាន ខេត្តពោធិ៍សាត់ ត្រូវបានស្រ្តីមេខ្យល់ម្នាក់ អាយុ៤០ឆ្នាំ ជាកម្មករធ្វើចម្ការជាមួយគ្នា បាននាំនាងមកកាន់ក្រុមហ៊ុន ខាងលើដោយប្រាប់ថា ក្រុមហ៊ុនរើសពលការិនីទៅធ្វើការនៅប្រទេសម៉ាឡេស៊ី ទទួលបានប្រាក់ឈ្នួលក្នុងមួយខែ៣០០ ដុល្លារ ហើយនាងក៏ព្រមមកជាមួយ ។ ពេលមកដល់ក្រុមហ៊ុនខាងលើបានរយៈពេលពីរថ្ងៃ ខាងក្រុម ហ៊ុនបានដកទូរស័ព្ទ ពីនាងនិងពីពលការិនីជិត១០នាក់ទៀត មិនឱ្យប្រើប្រាស់ និងបានបង្ខាំងទុកនាង និង ពលការិនីដ៍ទៃទៀតមិនឱ្យចេញទៅក្រៅនោះទេ សូម្បីទៅបង្គន់ក៏មានមនុស្សទៅតាមដែរ ។
មកដល់ម៉ោង១សៀលថ្ងៃទី ២៤ តុលា ២០១៤នេះនាងបានរកល្បិចធ្វើជាឈឺពោះចូលបង្គន់ពេលនោះនាងក៏បានឱកាសលួចរត់ចេញពីទីតាំងខាងលើ ដោយលោតឡើងលើរបងថ្មដែលមានព័ទ្ធបន្លាលោះទាំងត្រាដាបត្រដួសដើម្បីផ្លោះចេញមកខាងក្រៅ ។ ពេលដែលនាងផ្លោះរបងថ្មខាងលើចេញមកខាងក្រៅហើយនោះក៏មាន បុរសជាអ្នកប៉ះ អ៊ុតកង់ម៉ូតូ បានមកជួយនាងនិងបាននាំនាងទៅប្តឹងសមត្ថកិច្ច ។ រហូតមកដល់វេលាម៉ោង ៣ និង៤០នាទីរសៀល ថ្ងៃដដែលកម្លាំងសមត្ថកិច្ចចម្រុះបានបើកប្រតិបត្តិការឡោមព័ទ្ធទីតាំងក្រុមហ៊ុនជ្រើសរើសពលការិនីខាងលើ តែយឺតពេលបន្តិចហើយព្រោះប្រធានក្រុមហ៊ុនខាងលើហាក់ដូចជាដឹងខ្លួនជាមុនក៏បានរៀបចំដឹកជញ្ជូនពលការិនីជិត១០នាក់ តាមរថយន្តទួសរីសចេញពីទីតាំងខាងលើ ប៉ុន្តែមិនដឹងជាបើកទៅកាន់ទិសដៅណានោះទេ ។ ពេលនេះកម្លាំងសមត្ថកិច្ចកំពុងតែធ្វើការស្រាវជ្រាវផងដែរ ។
ចែករំលែកព័តមាននេះ