មានការបុកគ្នាមួយទៀតដែលនឹកស្មានមិនដល់នៅរុស្ស៊ី ដូចជាករណីយន្តហោះប្រធានអគ្គនាយកក្រុមហ៊ុនតូតាល់ បុករថយន្តសម្អាតព្រិលនៅក្រុងមូស្គូ បណ្តាលឱ្យលោកស្លាប់ដែរ តែការបុកលើកនេះសំណាងល្អពុំមានជនរងគ្រោះ ។
លើកនេះ គឺរថយន្តសម្រាប់ដឹកអីវ៉ាន់ដែលយន្តហោះមួយគ្រឿងរបស់ក្រុមហ៊ុនអាកាសចរណ៍រុស្ស៊ី URAL Airlines បានបុកកាលពីថ្ងៃទី២៤ តុលា នៅទីក្រុង Iekaterinbourg ភាគខាងលិចរុស្ស៊ី ។
យោងតាមទីភ្នាក់ងារព័ត៌មានរុស្ស៊ី Itar-Tass ថា សំណាងណាស់ដែលពុំមានអ្នកដំណើរណាម្នាក់ជិះក្នុងយន្តហោះនោះត្រូវរបួសឡើយ ។ ផ្នែកខាងបច្ចេកទេសរបស់ព្រលានយន្តហោះ និងរបស់ក្រុមហ៊ុនបានធ្វើការត្រួតពិនិត្យយន្តហោះនេះ ហើយពួកគេពុំបានឃើញអ្វីដែលអាចគំរាមកំហែងដល់សន្តិសុខនៃការហោះហើរឡើយ ។ យន្តហោះនោះអាចហោះមកកាន់ក្រុងមូស្គូ គ្រាន់តែយឺតពេល២ម៉ោងប៉ុណ្ណោះ ។
លោក Christophe De Margerie ប្រធានអគ្គនាយករបស់ក្រុមហ៊ុនប្រេងតូតាល់បារាំង បានស្លាប់កាលពីយប់ថ្ងៃទី២០ តុលា ពេលយន្តហោះធុន Falcon របស់លោកបុក ពេលចាប់ផ្តើមហោះឡើង ជាមួយរថយន្តសម្អាតព្រិលមួយ នៅព្រលានយន្តហោះក្រុងមូស្គូ Vnoukovo ដែលក៏បណ្តាលឱ្យអ្នកបើកបរ២នាក់ និងស្ត្រីអ្នកបម្រើក្នុងយន្តហោះម្នាក់ត្រូវស្លាប់ដែរ ។ ពួកអ្នកស៊ើបអង្កេតកាលពីថ្ងៃទី២១ តុលា បានបរិហារចំពោះគ្រោះថ្នាក់នេះថា មកពីការធ្វេសប្រហែសរបស់ថ្នាក់ដឹកនាំព្រលានយន្តហោះ Vnoukovo ៕
ចែករំលែកព័តមាននេះ