បណ្តាអ្នកទទួលខុសត្រូវអាមេរិកគូសបញ្ជាក់កាលពីថ្ងៃទី២៣ តុលា ថា កងទ័ពអីុរ៉ាក់ពុំបានត្រៀមខ្លួនបើកការវាយលុកចម្បងមួយប្រឆាំងពួកជីហាដនៃក្រុមរដ្ឋអ៊ិស្លាមដើម្បីដណ្តើមយកមកវិញនូវបណ្តាដែនដី ឬទីតាំងដែលបាត់បង់ឡើយ ។
អ្នកទទួលខុសត្រូវម្នាក់ក្នុងចំណោមអ្នកទទួលខុសត្រូវទាំងនេះដែលមិនបញ្ចេញឈ្មោះនិយាយថា កងកម្លាំងសន្តិសុខអីុរ៉ាក់រៀបចំធ្វើតែការវាយប្រហារតូចៗប្រឆាំងក្រុមរដ្ឋអ៊ិស្លាម ក៏ប៉ុន្តែត្រូវការពេលវេលាមុនត្រៀមសម្រាប់ប្រតិបត្តិការទ្រង់ទ្រាយធំនានា ទោះបីជាមានជំនួយខាងអាកាសរបស់ក្រុមចម្រុះអន្តរជាតិក្តី ។ តាមពិតទៅកងទ័ពអីុរ៉ាក់មានសមត្ថភាពធ្វើការវាយបកនោះ តែត្រូវការពេលវេលារាប់ខែ ពុំមែនរាប់ឆ្នាំទេ ។
ចំពោះសំណួរសួរថា តើពេលណាទៅកងទាហានអីុរ៉ាក់អាចធ្វើប្រតិបត្តិការមួយដើម្បីវាយយកទីក្រុងម៉ុសស៊ុលមកវិញ អ្នកទទួលខុសត្រូវរូបនោះយល់ថា រង់ចាំដល់១ឆ្នាំទៀតឯណោះ ។
បណ្តាអ្នកទទួលខុសត្រូវអាមេរិកនៃទីបញ្ជាការដ្ឋានយោធា ទទួលបន្ទុកតំបន់មជ្ឈឹមបូព៌ាយល់ឃើញថា សង្វាក់នៃការវាយប្រហារតាមអាកាសរបស់អាមេរិកនៅអីុរ៉ាក់មានព្រំដែនកំណត់ ព្រោះកងទ័ពអីុរ៉ាក់ពុំសូវធ្វើការចល័តទ័ពច្រើនឡើយ រួចជាពិសេសស្ថិតក្នុងបណ្តាទីតាំងការពារប៉ុណ្ណោះ ។ ចាប់តាំងពីថ្ងៃទី៨ សីហាមក មានការវាយប្រហារតាមអាកាសរបស់អាមេរិកនៅអីុរ៉ាក់ និងនៅស៊ីរីប្រឆាំងពួករដ្ឋអ៊ិស្លាមចំនួនជាង៦០០លើក ។
ក្រោមរដ្ឋាភិបាលអតីតនាយករដ្ឋមន្ត្រីអីុរ៉ាក់ លោកនូរីអាល់ ម៉ាលីគី កងទ័ពអីុរ៉ាក់បាត់បង់ប្រសិទ្ធភាព ដោយប្រសិទ្ធភាពប្រយុទ្ធត្រូវបានជំនួសដោយបណ្តាមិត្តខាងនយោបាយ ។ អ្នកទទួលខុសត្រូវអាមេរិកទាំងនោះនិយាយទៀតថា វាជាការប្រញាប់ពេកក្នុងការវាយតម្លៃថា តើយុទ្ធសាស្ត្ររបស់លោកបារ៉ាក់ អូបាម៉ា ដើម្បីកម្ទេចក្រុមរដ្ឋអ៊ិស្លាមមានប្រសិទ្ធភាពដែរឬអត់ជាមួយការវាយប្រហារតាមអាកាសជួយគាំទ្រដល់កងទ័ពជើងគោកអីុរ៉ាក់ ។
និយាយពីកងទ័ពអីុរ៉ាក់ កងទ័ពនេះធ្លាប់ចូលរួមក្នុងជម្លោះធំៗ និងតតាំងប្រឆាំងការបះបោរជាច្រើនចាប់តាំងពីប្រទេសទទួលបានឯករាជ្យមក ។ កងទ័ពនេះត្រូវរំលាយកាលពីថ្ងៃទី២៣ ឧសភា ឆ្នាំ២០០៣ ដោយលោក PAUL BREMER អ្នកគ្រប់គ្រងប្រទេសអីុរ៉ាក់ បន្ទាប់ពីប្រតិបត្តិការរំដោះអីុរ៉ាក់ ដែលការរំលាយនោះក្រោយមកត្រូវបានលោក PAUL BREMER ចាត់ទុកថា ជាការខុសឆ្គងយ៉ាងធំមួយ ។ បន្ទាប់មកកងទ័ពថ្មីអីុរ៉ាក់ត្រូវបានជ្រើសរើសជាបន្តបន្ទាប់ឈរលើមូលដ្ឋានថ្មីទាំងស្រុងដោយកងកម្លាំងចម្រុះអន្តរជាតិនៅអីុរ៉ាក់ ។
ជាមួយទាហាន២៦០.០០០នាក់ គិតត្រឹមថ្ងៃទី១ មករា ២០០៩ កងទ័ពអីុរ៉ាក់ គឺជាកងកម្លាំងសន្តិសុខរបស់ប្រទេសដែលរួមមានប៉ូលិសជាតិ ប៉ូលិសមូលដ្ឋាន និងកងជីវពលស្វ័យការពារ (មានចំនួន៨០.០០០នាក់ក្នុងខែកុម្ភៈ ២០០៨ និង៩២.០០០នាក់ នាដើមខែមេសា ឆ្នាំ២០០៨ ។ ហើយកងទ័ពនេះទទួលការទ្រទ្រង់ដោយកងកម្លាំងយោធាចម្រុះនៅអីុរ៉ាក់។ នាដើមឆ្នាំ២០១២ កងកម្លាំងសន្តិសុខអីុរ៉ាក់មានមនុស្សដល់ទៅ៩០០.០០០នាក់ ក្នុងនោះមានទាហាន២៧១.០០០នាក់ ប៉ូលិស៦៥០.០០០នាក់ ហើយថវិកាការពារសរុបក្នុងឆ្នាំ២០១២ មានដល់១៤,៦ពាន់លានដុល្លារ ពោលគឺ១៥% នៃការចំណាយរបស់រដ្ឋ ៕
ចែករំលែកព័តមាននេះ