ខេត្តបាត់ដំបង ៖ តាមរយៈមន្ត្រីនៃមន្ទីរធនធានទឹក និងឧតុនិយមខេត្តបានឱ្យដឹងថា ក្រសួងធនធានទឹក និងឧតុនិយមបានព្រមានចាប់ខ្លួនដល់ជនណា ដែលព្យាយាមជីកកកាយស្វែងរកកំណប់ធ្វើឱ្យប៉ះពាល់ដល់ទំនប់សំណង់ អាងកំពីងពួយ បើទោះបីជាជននោះជាមន្ត្រីមានអំណាចក្នុងខេត្ត ឬមកពីក្រៅខេត្តក្ដី ព្រោះតំបន់សំណង់អាងកំពីងពួយនេះ ស្ថិតក្រោមការអភិរក្សរបស់ក្រសួងធនធានទឹក និងឧតុនិយម ។
លោក ឃុន សេង អនុប្រធានការិយាល័យអភិរក្សធនធានទឹកនៃមន្ទីរធនធានទឹក និងឧតុនិយមខេត្តបានប្រាប់តាមទូរស័ព្ទកាលពីព្រឹកថ្ងៃទី២៤ តុលា នេះថា ទីតាំងដែលជនមួយក្រុមប៉ងជីកកកាយរកកំណប់នៅក្បែរសំណង់អាង កំពីងពួយនោះ ត្រូវបានគេបិទ
ក្ដារជិតវិញហើយ បន្ទាប់ពីបែកធ្លាយផ្អើលពេញខេត្ត ។
លោក បន្តថា របាយការណ៍ស្ដីអំពីជនមួយក្រុមដែលដឹកនាំដោយអ្នកមានអំណាច ក្នុងខេត្ត ចង់ជីកកកាយរកកំណប់ធ្វើឱ្យប៉ះពាល់ដល់ទំនប់សំណង់អាងកំពីងពួយ នេះ លោកបានរៀបចំបញ្ជូនទៅកាន់ក្រសួងរួចរាល់ហើយ ហើយខាងក្រសួង ក៏មានវិធានការតាមផ្លូវច្បាប់ផងដែរ ចំពោះជនប្រព្រឹត្ត ។
លោក ឃុន សេង បានបញ្ជាក់ទៀតថា ក្រសួងបានព្រមានចាប់ខ្លួនបុគ្គល ប្ញក្រុមណាដែលហ៊ានជីកកកាយដីដែលធ្វើឱ្យប៉ះពាល់ដល់ទំនប់ សំណង់កំពីងពួយ បើទោះជាជីករកកំណប់ ឬមិនរកកំណប់ក្ដី ។ ព្រោះតំបន់សំណង់អាងកំពីងពួយទាំងមូលជាតំបន់ទេសចរណ៍ដ៏ល្បីផង នោះ គឺស្ថិតក្រោមការអភិរក្សនិងការទទូលខុសត្រូវរបស់មន្ទីរធនធានទឹក និងឧតុនិយមខេត្ត។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ