រាជធានីភ្នំពេញ ៖ សិក្ខាសាលាស្តីពីការយល់ដឹងការប្រឆាំងការប្រើប្រាស់សារធាតុដូប៉ាក្នុងវិស័យកីឡា ដែលរៀបចំឡើងដោយមជ្ឈមណ្ឌលជាតិហ្វឹកហ្វឺនកីឡានៃអគ្គនាយកដ្ឋានកីឡា ក្រោមកិច្ចសហការជាមួយអង្គការ UNESCO អង្គការ WADA SEARADO និងអង្គការ JADA នៅវិទ្យាស្ថានបច្ចេកវិទ្យាកម្ពុជា កាលពីព្រឹកថ្ងៃទី២១ តុលា កន្លងមកនោះបានបញ្ចប់ហើយកាលពីល្ងាចថ្ងៃទី២៣ តុលា ។
សិក្ខាសាលារយៈពេល៣ថ្ងៃនេះមានសិក្ខាកាម៣៧២នាក់ចូលរួម និងមានលោក Gobi Nathan Nair នាយកប្រតិបត្តិអង្គការ WADA SEARADA, លោក Yaya Yamamoto ប្រធានជាន់ខ្ពស់អង្គការ JADA លោកសាស្ត្រាចារ្យវេជ្ជបណ្ឌិត ស្តើង ជា មន្ត្រីវេជ្ជសាស្ត្រនៃគណៈកម្មាធិការជាតិអូឡាំពិកកម្ពុជា, លោកស្រីវេជ្ជបណ្ឌិត ហួត ចាន់ធានី អនុប្រធានមន្ទីរពេទ្យកុមារជាតិ និងលោកអិុត ឡេង ប្រធានការិយាល័យទីភ្នាក់ងារប្រឆាំងការប្រើប្រាស់សារធាតុដូប៉ាក្នុងវិស័យកីឡានៃមជ្ឈមណ្ឌលជាតិហ្វឹកហ្វឺនកីឡា ជាគ្រូឧទ្ទេសនាមធ្វើបទបង្ហាញ ។
បទបង្ហាញធ្វើឡើងក្រោមប្រធានបទ ការបង្កើតទីភ្នាក់ងារប្រឆាំងការប្រើប្រាស់សារធាតុដូប៉ាក្នុងវិស័យកីឡានៅកម្ពុជា, ទស្សនៈទូទៅ និងការអភិវឌ្ឍក្នុងតំបន់ចំពោះការប្រឆាំងដូប៉ា, គ្រោះថ្នាក់នៃការប្រើប្រាស់សារធាតុដូប៉ា, ការផ្តល់ព័ត៌មានឱ្យមានប្រសិទ្ធភាព និងច្បាប់ប្រឆាំងដូប៉ា, ការលើកលែងប្រើប្រាស់ចំពោះការព្យាបាល, ការពិនិត្យសារធាតុដូប៉ា, ការណែនាំអំពីការអប់រំ និងការផ្តល់ព័ត៌មាន WADA Webpage and NADO Webpage និងកម្មវិធីបែងចែកព័ត៌មាន និងការអប់រំរបស់ជប៉ុន ។
លោកប៉ុន សុខ ប្រធានមជ្ឈមណ្ឌលជាតិហ្វឹកហ្វឺនកីឡាបានឡើងរាយការណ៍ពីលទ្ធផលសិក្សារយៈពេល៣ថ្ងៃកន្លងមកនេះថា សិក្ខាកាមដែលបានចូលរួមក្នុងវគ្គសិក្សានេះ ពិតជាបានចូលរួមយ៉ាងផុសផុល និងយកចិត្តទុកដាក់ទទួលបាននូវចំណេះដឹងល្អពីគ្រូឧទ្ទេសនាម ជាពិសេសអ្នកដែលមានបទពិសោធបានធ្វើការចែករំលែកនូវចំណេះដឹង និងបទពិសោធពីគ្នាទៅវិញទៅមកដើម្បីឱ្យសិក្ខាកាមដែលចូលរួមបានគិតពីផលប៉ះពាល់នៃការប្រើប្រាស់សារធាតុដូប៉ា និងគ្រឿងញៀនដែលមានគ្រោះថ្នាក់ដល់សុខភាព ។
ការប្រឆាំងសារធាតុដូប៉ា និងគ្រឿងញៀនត្រូវតែទទួលបាននូវការគាំទ្រពីអាជ្ញាធរជាតិ និងអន្តរជាតិនៅគ្រប់កម្រិត ពីសំណាក់ឪពុកម្តាយ អ្នកអប់រំ គ្រូពេទ្យ ប្រព័ន្ធផ្សព្វផ្សាយ គ្រូបង្វឹក អ្នកគ្រប់គ្រងអត្តពលិក និងខ្លួនពួកគេផ្ទាល់ដើម្បីធានាបានថា ពួកគេទាំងអស់នឹងគោរពតាមគោលការណ៍ដែលមានស្រាប់ និងធម្មនុញ្ញអូឡាំពិកអន្តរជាតិប្រឆាំងសារធាតុដូប៉ា និងគ្រឿងញៀន ។
លោកស៊ាន បូរ៉ាត រដ្ឋលេខាធិការក្រសួងអប់រំ យុវជន និងកីឡា ដែលបានអញ្ជើញជាអធិបតីក្នុងពិធីបិទសិក្ខាសាលានេះ បានមានប្រសាសន៍ថា យើងទាំងអស់គ្នាបានដឹងហើយថា ការប្រើប្រាស់សារធាតុលើកកម្លាំងក្នុងវិស័យកីឡា ត្រូវបានអង្គការរដ្ឋកីឡា និងអង្គការសង្គមកីឡាដែលគ្រប់គ្រងការប្រកួតកំណត់ថា គឺជាការប្រើប្រាស់សារធាតុញៀន ហើយចាត់ទុកថា គ្មានក្រមសីលធម៌ ព្រោះជាទង្វើដែលអាចធ្វើឱ្យការប្រកួតប្រជែង និងការសម្តែងរបស់ដៃគូទទួលបាននូវភាពអយុត្តិធម៌ ជាពិសេសបង្កើតហានិភ័យផ្នែកសុខភាព និងការអនុវត្តការលើកកម្ពស់សមភាពនៃឱកាសសម្រាប់អត្តពលិក ហើយក៏ជាទង្វើមួយដែលអាចចាត់ទុកថា ជាការប្រឆាំងទៅនឹងវិញ្ញាណនៃកីឡាផងដែរ។ លោកបន្តថា ក្រោយពីបានបញ្ចប់វគ្គសិក្សាក្នុងអង្គសិក្ខាសាលានេះ លោកសង្ឃឹមយ៉ាងមុតមាំថា មន្ត្រីជំនាញ កីឡាករ-កីឡាការិនីរបស់យើងនឹងទទួលបាននូវចំណេះដឹងបន្ថែមទៀតអំពីវិទ្យាសាស្ត្រកីឡា គោលការណ៍ Fair Play ការប្រើប្រាស់សមត្ថភាព ទេពកោសល្យ និងបច្ចេកទេសយ៉ាងពិតប្រាកដ ពោលគឺគ្មានការប្រើប្រាស់សារធាតុបំប៉ន (ដូប៉ា) ឬសេពគ្រឿងញៀនដើម្បីទទួលបាននូវប្រៀបឈ្នះលើគូប្រកួតនោះឡើយ ។ ការប្រើប្រាស់សារធាតុដូប៉ាធ្វើឱ្យប៉ះពាល់យ៉ាងធ្ងន់ធ្ងរដល់សុខភាព និងសុវត្ថិភាពនៃការប្រកួតជាពិសេស គឺបាត់បង់នូវកិត្តិយសសង្គមជាតិទាំងមូល ៕
ចែករំលែកព័តមាននេះ