រាជធានីភ្នំពេញ ៖ នៅថ្ងៃអាទិត្យ ទី២៦ តុលា ស្អែកនេះ ស្ថានីយទូរទស្សន៍រាជធានីភ្នំពេញ ប៉ុស្តិ៍លេខ៣ នឹងរៀបចំការប្រកួតប្រដាល់ជាលក្ខណៈអន្តរជាតិជូនទស្សនិកជនទស្សនាកម្សាន្តនាថ្ងៃសម្រាកចុងសប្តាហ៍ ។ ចំណែកបេក្ខភាពកីឡាករដែលជាគូអន្តរជាតិត្រូវឡើងសង្វៀនប្រកួតនៅថ្ងៃនោះមាន កីឡាករអាំង សំអាត មកពីក្លិបតាព្រហ្មមានជ័យបង្ក្រាបគ្រឿងញៀន ជួបប្រកួតជាមួយកីឡាករថៃ Moohin Look sakeow ក្នុងប្រភេទទម្ងន់៥៤គីឡូក្រាម ចំណែកពេជ្រ ម្ទេសខ្មាំង មកពីក្លិបអរុណរះ ជួបប្រកួតជាមួយកីឡាករថៃ Bran Tamin ក្នុងប្រភេទទម្ងន់៥៥គីឡូក្រាម ។
ចំពោះកីឡាករថៃទាំង២រូបនេះមិនធ្លាប់មកប្រកួតនៅស្រុកខ្មែរទេ ដូច្នេះអត់មានអ្នកណាដឹងពីសមត្ថភាពពួកគេថា ខ្លាំងឬខ្សោយនោះឡើយ។ ប៉ុន្តែលោកទី រ៉ាណាត អ្នកគ្រប់គ្រងកម្មវិធីប្រដាល់ប្រចាំស្ថានីយទូរទស្សន៍ប៉ុស្តិ៍លេខ៣ បានអះអាងថា អ្នកប្រដាល់ថៃទាំង២រូបនេះមិនមែនជាជើងអន់នោះទេ ជាពិសេស Moohin តែម្តងមិនដឹងថា អាំង សំអាត អាចទប់ទល់បានឬអត់នោះទេ ។ រីឯ អាំង សំអាត ក៏មិនមែនជាជើងអន់នោះដែរ ថ្វីដៃប្រកួតនៅលើសង្វៀនរបស់គេខ្លាំងគ្រាន់បើ ទាំងស្នៀតកែង និងជង្គង់អាចប្រើការបានយ៉ាងស្ទាត់ជំនាញ ។ លោកមាស សុខគ្រី ដែលជាគ្រូបង្វឹក ក៏មានការជឿជាក់លើ អាំង សំអាត ខ្លាំងណាស់ដែរ ។ លោកថា ក្នុងចំណោមអ្នកប្រដាល់ក្នុងប្រភេទទម្ងន់នេះ បើចង់ផ្តួល អាំង សំអាត បែបមិនមែនជាការងាយស្រួលប៉ុន្មានឡើយ ។ ទោះបីយ៉ាងណា លោកមិនហ៊ានមើលស្រាលលើកីឡាករថៃរូបនេះទេ ដូច្នេះមានតែរង់ចាំមើលការប្រកួតជាក់ស្តែងប៉ុណ្ណោះ ខ្លាំងឬខ្សោយ គង់តែដឹងទេ ។
ពេជ្រ ម្ទេសខ្មាំង ជួបកីឡាករថៃលើកនេះ ក៏មិនដឹងថា យ៉ាងណានោះដែរ ទោះបីរូបគេជាអ្នកប្រដាល់វ័យក្មេងមានចិត្តសឿងមិនងាយចាញ់សម្លុតអ្នកណា ប៉ុន្តែគេមិនហ៊ានអួតទុកមុនថា អាចយកឈ្នះ Tamin បាននោះដែរ ។ គេគ្រាន់តែសន្យាថា នឹងប្រឹងឱ្យអស់ពីសមត្ថភាពមិនបណ្តោយឱ្យអ្នកប្រដាល់ថៃរូបនេះធ្វើអ្វីមកលើរូបគេតាមតែអំពើចិត្តបុ៉ណ្ណោះ ។ សម្រាប់អ្នកធ្លាប់តាមដានការប្រកួតភាគច្រើន គេមានជំនឿចិត្តលើ ពេជ្រ ម្ទេសខ្មាំង ច្រើន ជាពិសេសការប្រកួតលើកនេះតែម្តង បើគេតាំងចិត្តប្រកួតអស់ពីសមត្ថភាពជ័យជម្នះនឹងធ្លាក់ក្នុងកណ្តាប់ដៃគេជាក់ជាមិនខាន ៕
ចែករំលែកព័តមាននេះ