* សេដ្ឋកិច្ចតំបន់អាស៊ី
ណៃពិដោ ៖ មន្ត្រីដឹកជញ្ជូនផ្នែកផ្លូវរថភ្លើងបានប្រាប់សារព័ត៌មានក្នុងស្រុកកាលពីថ្ងៃអង្គារនេះថា បណ្តាញផ្លូវរថភ្លើងដែលធ្វើចរាចរណ៍ក្នុងក្រុងរ៉ង់ហ្គូន កំពុងដំណើរការទាំងការខាតបង់១.៥០០ដុល្លារអាមេរិកក្នុងមួយថ្ងៃ ស្របពេលដែលប្រតិបត្តិករបង្ខំចិត្តយកថ្លៃឈ្នួលតិចដើម្បីឱ្យអ្នកដំណើរទទួលបានប្រយោជន៍ច្រើនក្នុងការប្រើប្រាស់សេវានេះ ។
ម៉ានីល ៖ កាលពីថ្ងៃពុធ ក្រុមអ្នកជំនួញជាច្រើនបានជំរុញឱ្យរដ្ឋាភិបាលប្រញាប់ដាក់ចេញជាបន្ទាន់នូវគោលនយោបាយដែលអាចនឹងត្រួសត្រាយផ្លូវសម្រាប់ការអភិវឌ្ឍទ្រង់ទ្រាយធំលើផ្នែកកសិកម្ម និងការយកពន្ធបន្ថែមលើតម្លៃទំនិញពីផ្នែកឧស្សាហកម្ម ។
ហូជីមិញ ៖ សន្ទស្សន៍តម្លៃទំនិញប្រើប្រាស់ក្នុងទីក្រុងហូជីមិញក្នុងខែតុលា បានថយចុះបន្តិចបន្តួច០,០៣% ធៀបនឹងខែមុន បុ៉ន្តែបើធៀបនឹងអំឡុងពេលដូចគ្នាកាលពីឆ្នាំ២០១៣ មានអត្រាកើនឡើង២,៩៦% ។ ក្នុងនោះតម្លៃទំនិញដែលធ្លាក់ចុះរួមមាន ផ្នែកដឹកជញ្ជូន (-១,១១%) ទំនិញ និងសេវាកម្មផ្សេងៗ (-០,១២%) របស់របរប្រើប្រាស់ប្រចាំថ្ងៃ ទឹក ភ្លើង និងគ្រឿងសំណង់ (-០,០៩%) ភោជនីយដ្ឋាន និងសេវាកម្ម (-០,០៨%) សម្លៀកបំពាក់ និងស្បែកជើងធ្លាក់ចុះ០,០២%។
* សេដ្ឋកិច្ចតំបន់អឺរុ៉ប
មូស្គូ ៖ តាមការចេញផ្សាយលើគេហទំព័ររបស់ខ្លួនបង្ហាញថា ក្រុមហ៊ុន MTS UKraine ដែលកាន់កាប់ទាំងស្រុងដោយក្រុមហ៊ុន OAO Mobile Tele Systems របស់រុស្ស៊ីបានលក់អចលនទ្រព្យរបស់ខ្លួននៅគ្រីមេ ក្នុងតម្លៃ២២,៣៥លានដុល្លារអាមេរិកដែលរាប់បញ្ចូលទាំងពន្ធបន្ថែមលើតម្លៃអចលនទ្រព្យនោះ ។
គៀវ ៖ រដ្ឋមន្ត្រីស្បៀងអាហារ និងគោលនយោបាយកសិកម្មអ៊ុយក្រែនបានថ្លែងកាលពីថ្ងៃពុធថា បណ្តាក្រុមហ៊ុនកសិកម្មជាច្រើនរបស់អ៊ុយក្រែនអាចនឹងខាតបង់១៧លានដុល្លារពីការដាក់បម្រាមមិនឱ្យនាំចូលផលិតផលរបស់ពួកគេពីរដ្ឋាភិបាលរុស្ស៊ីរហូតដល់ដំណាច់ឆ្នាំ២០១៤ នេះ ។
ប៊ែកឡាំង ៖ កាលពីថ្ងៃចន្ទ លោកស្រី Angela Merkel អធិការបតីអាល្លឺម៉ង់ បានថ្លែងអំពាវនាវដល់បណ្តាប្រទេសសម្ព័ន្ធមិត្តឱ្យជួយសងបំណុលថ្លៃឧស្ម័នដែលអ៊ុយក្រែនជំពាក់រុស្ស៊ី ដែលជាក្តីបារម្ភអំពីការផ្គត់ផ្គង់ឧស្ម័ននៅសិសិរដូវខាងមុខនេះ ។
ស្តុកខុល ៖ តាមស្ថិតិរបស់រដ្ឋាភិបាលបង្ហាញថា អត្រាអត់ការងារធ្វើក្នុងប្រទេសស៊ុយអែតធ្លាក់ចុះតិចតួចក្នុងខែកញ្ញា ជាមួយនឹងបរិមាណដែលចុះបញ្ជីចំនួន៣៧១.២០០នាក់ ថយចុះ០,៧% ធៀបនឹងខែកញ្ញា ឆ្នាំ២០១៣ ។
* សេដ្ឋកិច្ចមជ្ឈិមបូព៌៌ា
តេហេរ៉ង់ ៖ យោងតាមទីភ្នាក់ងារព័ត៌មាន Mehr ផ្សាយថា ប្រទេសអុីរ៉ង់ និងអុីរ៉ាក់កំពុងធ្វើការបញ្ចប់នូវឯកសារពាណិជ្ជកម្មដែលអាចនាំមកនូវទំហំពាណិជ្ជកម្មទ្វេភាគីមួយគុណនឹង៥ដង ឬ៣០ពាន់លានដុល្លារក្នុងមួយឆ្នាំ ។
ហ្សេរុយសាឡិម ៖ ការិយាល័យស្ថិតិកណ្តាលបានឱ្យដឹងថា សន្ទស្សន៍តម្លៃផ្ទះនៅក្នុងប្រទេសអុីស្រាអែលបានធ្លាក់ចុះ១% ក្នុងខែកញ្ញា ដែលជាលើកដំបូងចាប់តាំងពីខែវិច្ឆិកា ឆ្នាំ២០០៧ ។
គែរ ៖ លោក Ahmed Badrawi នាយកប្រតិបត្តិក្រុមហ៊ុនអភិវឌ្ឍន៍អចលនទ្រព្យ SODIC បានប្រាប់សារព័ត៌មានអេហ្ស៊ីបឱ្យដឹងថា ក្រុមហ៊ុនរបស់លោកនឹងបោះទុនចន្លោះពី២ពាន់លានទៅ២,៥ពាន់លានដុល្លារក្នុងការអភិវឌ្ឍវិស័យអលចនទ្រព្យក្នុងប្រទេសអេហ្ស៊ីបនាឆ្នាំ២០១៥ ខាងមុខ ។
Jeddah ៖ សារព័ត៌មានបរទេសផ្សាយថា តម្លៃទឹកប្រាក់នៃបំណុលដែលបូកបញ្ចូលនៅក្នុងតំបន់មជ្ឈិមបូព៌៌ានៅក្នុងអំឡុងត្រីមាសទី៣ ឆ្នាំ២០១៤ នេះមានចំនួន១១,៨ពាន់លានដុល្លារ ធ្លាក់ចុះ១៨% ធៀបនឹងបរិមាណដែលបានចុះបញ្ជីកាលពីត្រីមាសមុន ។
* សេដ្ឋកិច្ចតំបន់អាហ្វ្រិក
លូសាកា ៖ ថ្នាក់ដឹកនាំប្រទេសសំប៊ី លោក Nzamane បានថ្លែងប្រាប់ប្រជាជននៅខេត្តភាគខាងកើតប្រទេសថា ខ្លួននឹងជំរុញទីភ្នាក់ងារស្បៀងអាហារបម្រុងឱ្យជួយបង់ប្រាក់ដល់កសិករដែលជាអ្នកផ្គត់ផ្គង់ពោតលឿងដល់ខ្លួន ។
ប្រេតូរីយ៉ា ៖ រតនាគារជាតិបានទម្លាក់ការព្យាករនៃកំណើនសេដ្ឋកិច្ចរបស់ប្រទេសអាហ្វ្រិកខាងត្បូងសម្រាប់ឆ្នាំ២០១៤ ពី២,៧% មកត្រឹម១,៤% ដោយសារតែផលប៉ះពាល់នៃកម្រិតផ្គត់ផ្គង់ថាមពល និងតម្រូវការចុះខ្សោយ ។
អាឌីសអាបេបា ៖ ប្រទេសអារ៉ាប់រួមបានប្រកាសឱ្យដឹងថា នឹងបញ្ចុះតម្លៃពិសេសដល់អ្នកដំណើរជនជាតិអេត្យូពីប្រមាណជា២៥% ចំពោះការធ្វើដំណើរតាមជើងហោះហើរអារ៉ាប់ ចាប់ពីខែតុលា ដល់ខែមីនា ឆ្នាំ២០១៥ ។
អាក្រា ៖ អាជ្ញាធរផ្សព្វផ្សាយការនាំចេញរបស់ប្រទេសហ្គាណាបានផ្អាកនូវគម្រោងជាច្រើនក្នុងការតាំងបង្ហាញនូវមុខទំនិញជាច្រើន ដែលមិនមែនជាផលិតផលប្រពៃណីរបស់ប្រទេសលើផ្សារអាហ្វ្រិកខាងលិចដោយសារតែការផុសឡើងនូវជំងឺអេបូឡាកាលពីពេលថ្មីៗនេះ ដូច្នេះវាគឺជាសញ្ញាគំរាមកំហែងមួយនៃការរកចំណូលពីការនាំចេញរបស់ហ្គាណា ។
* សេដ្ឋកិច្ចបច្ចេកវិទ្យា
Facebook ៖ ស្ថាបនិកបណ្តាញព័ត៌មានសង្គម Facebook លោក Mark Zuckerberg បានថ្លែងកាលពីថ្ងៃពុធថា ក្រុមហុ៊ន Facebook នឹងជ្រើសរើសបុគ្គលិកជនជាតិចិនបន្ថែមក្នុងឆ្នាំ២០១៥ ដើម្បីជួយក្រុមហ៊ុនក្នុងស្រុកពង្រីកជំនួញក្រៅប្រទេសរបស់ពួកគេ បើទោះជាបណ្តាញសង្គមនេះមិនអាចប្រើប្រាស់ជាប្រយោជន៍ក្នុងទឹកដីចិនក៏ដោយ ។
Apple ៖ នាយកប្រតិបត្តិក្រុមហ៊ុន Apple ថ្លែងថា ប្រាក់ចំណូលដ៏ច្រើនបំផុតប្រចាំត្រីមាសទី៤ គិតមកត្រឹមថ្ងៃ២៧ កញ្ញា គឺទទួលបានមកពីការលក់ទូរស័ព្ទ iPhone បន្ទាប់ពីការបង្ហាញខ្លួនរបស់ iPhone និង iPhone 6 Plus។ ក្នុងនោះចំណូលពីទូរស័ព្ទ iPhone ចំនួន២៣,៦៨ពាន់លានដុល្លារ, iPad ចំនួន៥,៣២ពាន់លានដុល្លារ, Mac ៦,៦ពាន់លានដុល្លារ, iPod ទាបជាងគេ៤១០លានដុល្លារ ឯចំណូលពីការលក់គ្រឿងបន្លាស់១,៤៩ពាន់លានដុល្លារ និងចំណូលពី iTunes / Software និងសេវាកម្មផ្សេងៗចំនួន៤,៦១ពាន់លានដុល្លារ ។
Yahoo ៖ ក្រុមហ៊ុន Yahoo បានបង្ហើបឱ្យដឹងថា ប្រាក់ចំណូលរបស់ខ្លួនកើនឡើង១% ក្នុងត្រីមាសទី៣ ឆ្នាំនេះ បើធៀបនឹងអំឡុងពេលដូចគ្នាកាលពីឆ្នាំទៅ នោះក៏ព្រោះតែការកើនឡើងនៃការលក់របស់ខ្លួន និងកម្រៃនៃការផ្សាយពាណិជ្ជកម្មផ្សេងៗ ។ ចំណែកប្រាក់ចំណេញសុទ្ធវិញ Yahoo បង្កើនផលចំណេញពី២៩៦,៧លានដុល្លារទៅ៦,៧៧ពាន់លានដុល្លារក្នុងត្រីមាសទី៣ ឆ្នាំ២០១៤ នេះ ។
* សេដ្ឋកិច្ចមហាអំណាចពិភពលោក
IMF ៖ តាមការវាយតម្លៃរបស់អង្គការរូបិយវត្ថុអន្តរជាតិ (IMF) ដោយគិតទាំងវិធាន GDP ក្នុងអំឡុងពេលនៃការដោះដូរទំនិញលើទីផ្សារ និងនៅក្នុងផ្នែកនៃអំណាចបញ្ជាទិញបានបញ្ជាក់យ៉ាងច្បាស់ថា បច្ចុប្បន្នប្រទេសចិនកំពុងវ៉ាដាច់ ឬតាមទាន់សហរដ្ឋអាមេរិកក្លាយជាប្រទេសដែលមានសេដ្ឋកិច្ចធំជាងគេបំផុតលើពិភពលោក ។ ក្នុងនោះនៅដំណាច់ឆ្នាំនេះ ចិននឹងសម្រេចបាននូវអំណាចទិញ១៦,៤៨% លើពិភពលោកដែលកែប្រែ GDP របស់ខ្លួនឡើងដល់១៧.៦៣២សែនកោដិដុល្លារ ខណៈសហរដ្ឋអាមេរិកបញ្ជាទិញត្រឹមតែ១៦,២៨% ឬ១៧.៤១៦សែនកោដិដុល្លារ ។
ចិន ៖ គណៈវិនិច្ឆ័យរបស់គេហទំព័រសេដ្ឋកិច្ចពិភពលោកសម្លឹងឃើញពីកំណើន GDP របស់ចិននឹងពង្រីកបាន៧,៤% ក្នុងឆ្នាំ២០១៤ ខណៈឆ្នាំក្រោយថយចុះបន្តិច គឺកើនឡើងត្រឹមតែ៧,២% បុ៉ណ្ណោះ ។
សហរដ្ឋអាមេរិក ៖ គណៈវិនិច្ឆ័យរបស់គេហទំព័រសេដ្ឋកិច្ចពិភពលោកមានក្តីរំពឹងថា កំណើន GDP នឹងកើនឡើង២,១% ក្នុងឆ្នាំ២០១៤ និងមានសន្ទុះ៣,០% នៅឆ្នាំ២០១៥ ៕
ចែករំលែកព័តមាននេះ