រាជធានីភ្នំពេញ ៖ ជនសង្ស័យចែកចាយគ្រឿងញៀនមានកាំភ្លើងជាប់នឹងខ្លួន៥នាក់ ត្រូវកម្លាំងព្រហ្មទណ្ឌក្រសួងមហាផ្ទៃ ចុះបង្ក្រាបបាន កាលពីវេលាម៉ោង៦ល្ងាចថ្ងៃទី២៣ តុលា នៅតាមផ្លូវលេខ២០២ ម្តុំមជ្ឈមណ្ឌលម៉ុងឌីយ៉ាល់ សង្កាត់ទឹកល្អក់ទី៣ ខណ្ឌទួលគោក ។
តាមការបង្ហើបពីសមត្ថកិច្ចបានឲ្យដឹងថា ជនសង្ស័យចែកចាយគ្រឿងញៀនយ៉ាងសកម្ម នៅក្នុងរាជធានីភ្នំពេញហើយមានកាំភ្លើងខ្លីជាប់នឹងខ្លួនទៀតនោះត្រូវបានសមត្ថកិច្ចតាមដានយូរមកហើយដឹងថា ជនសង្ស័យមានរថយន្តកាមរីឆ្លាម ពណ៌ស្ករ អត់ស្លាកលេខមួយគ្រឿងសម្រាប់ជិះធ្វើសកម្មភាពចែកចាយរួចហើយតែងតែយករថយន្តខាងលើទៅបញ្ចាំនៅហាងយីហោ ប្រាក់ ម៉ាលី ហៅថារតន៍ ដែលមានទីតាំងនៅតាមផ្លូវលេខ២០២ សង្កាត់ទឹកល្អក់ទី៣ ខណ្ឌទួលគោក លុះដល់ពេលដែលគេចេញធ្វើសកម្មភាពទើបយកប្រាក់ទៅលោះ ។ មុនពេលឃាត់ខ្លួនសមត្ថកិច្ចតាមដានដឹងថា ជនសង្ស័យ២នាក់ជិះម៉ូតូមួយគ្រឿង បម្រុងទៅលោះយករថយន្តទើបសមត្ថកិច្ចកាក់បាញ់៣គ្រាប់ឡើងទៅឃាត់ខ្លួនបានហើយ យកទៅឆែកឆេររថយន្តនៅកន្លែងបញ្ចាំ ប៉ុន្តែពេលទៅដល់កន្លែងទទួលបញ្ចាំរថយន្តខាងលើបែរជាថៅកែក្រុមហ៊ុនមិនសហការជាមួយសមត្ថកិច្ចទេអាងមានខ្សែអ្នកធំ មិនព្រមឲ្យសមត្ថកិច្ចចូលទៅមើលរថយន្ត និងពិនិត្យឯកសារដាក់បញ្ចាំជាដាច់ខាត ។
សមត្ថកិច្ចបង្ហើបឲ្យដឹងទៀតថា ទីតាំងទទួលបញ្ចាំខាងលើនេះគេមានខ្នងបង្អែកជាមន្ត្រីថ្នាក់ធំម្នាក់ ទើបគេមិនខ្លាចសមត្ថកិច្ចតូចតាចដែលចុះបំពេញការងារ ទីបំផុតសមត្ថកិច្ចបានត្រឹមឃាត់ខ្លួនជនសង្ស័យយកទៅសាកសួរនៅព្រហ្មទណ្ឌក្រសួងមហាផ្ទៃរង់ចាំដោះស្រាយបន្តទៀត ៕
ចែករំលែកព័តមាននេះ