ខេត្តកំពង់ឆ្នាំង ៖ មណ្ឌលសុខភាពស្រុកបរិបូរណ៍ ខេត្តកំពង់ឆ្នាំង បានរងការចោទប្រកាន់ពីសំណាក់ក្រុមគ្រួសារស្ត្រីរងគ្រោះដែលត្រូវសត្វឪម៉ាល់ទិចស្លាប់ថា មានការធ្វេសប្រហែសបណ្តោយទុកអ្នករងគ្រោះរហូតធ្ងន់ធ្ងរ ដោយមិនព្រមឱ្យដឹកមកមន្ទីរពេទ្យខេត្ត តាមសំណូមពររបស់ក្រុមគ្រួសារទេ ធ្វើឱ្យអ្នកជំងឺជ្រុលពេល ទើបម្នីម្នាកយកមកពេទ្យខេត្ត តែជាអកុសល ស្ត្រីរងគ្រោះបានស្លាប់តាមផ្លូវទៅហើយ ។
បុរសឈ្មោះលាង គឹមឡុង ជាប្តីរបស់ស្ត្រីរងគ្រោះ រស់នៅក្នុងភូមិឆ្នុកទ្រូ ឃុំឆ្នុកទ្រូ ស្រុកបរិបូរណ៍ បានឱ្យដឹងថា ប្រពន្ធរបស់គាត់រងគ្រោះដោយសត្វឪម៉ាលទិចឈ្មោះគី ចំរើន អាយុ២៧ឆ្នាំ គ្រួសារគាត់មានកូន៣នាក់ មានមុខរបរជាអ្នកនេសាទត្រី ។
ប្រភពបានឱ្យដឹងថា នៅមុនពេលកើតហេតុ ពួកគាត់ទាំង២នាក់ប្តីប្រពន្ធបាននាំគ្នាទៅដាក់មងនៅចំណុចខាងលើ ពេលនោះក៏បានបើកកាណូតទៅក្នុងព្រៃលិចទឹក ក៏បានបុកសំបុកឪម៉ាល់មួយសំបុកធំ ហើយសត្វឪម៉ាល់ក៏ផ្អើលមកទិចប្រពន្ធរបស់គាត់ជាច្រើនមេ ចំណែកគាត់បានហក់ចូលទឹកគេចផុតពីគ្រោះថ្នាក់ ។
ប្រភពដដែលបានបន្តថា ក្រោយពេលកើតហេតុ រូបគាត់បានដឹកប្រពន្ធមកដល់មណ្ឌលសុខភាពស្រុកបរិបូរណ៍នៅវេលាម៉ោង៨យប់ ដើម្បីឱ្យក្រុមគ្រូពេទ្យជួយសង្គ្រោះជីវិត ។ ក្នុងពេលនោះដែរ គាត់ឃើញប្រពន្ធគាត់មានសភាពធ្ងន់ធ្ងរ គាត់និងបងថ្លៃបានសំណូមគ្រូពេទ្យជួយដឹកបញ្ជូនមកកាន់មន្ទីរពេទ្យខេត្ត ប៉ុន្តែត្រូវគ្រូពេទ្យដែលនៅប្រចាំការឆ្លើយថា មិនអីទេ ចាំមើលបន្តិចសិន។រហូតស្អែកឡើងម៉ោង៧ព្រឹកថ្ងៃទី២៣ តុលា ២០១៤ ប្រពន្ធគាត់កាន់តែមានសភាពធ្ងន់ធ្ងរមែនទែន ទើបក្រុមគ្រូពេទ្យរបស់មណ្ឌលសុខភាពស្រុកបរិបូរណ៍បញ្ជូនប្រពន្ធរបស់គាត់មកកាន់មន្ទីរពេទ្យខេត្តកំពង់ឆ្នាំង តែអកុសលប្រពន្ធគាត់បានដាច់ខ្យល់ស្លាប់នៅលើ រថយន្តសង្គ្រោះតែម្តង ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ