ខេត្តសៀមរាប ៖ជនសង្ស័យ២នាក់ត្រូវសមត្ថកិច្ចការិយាល័យប្រឆាំងគ្រឿងញៀនកងរាជអាវុធហត្ថខេត្តឃាត់ខ្លួនកាលពីវេលាម៉ោង៦ល្ងាច ថ្ងៃទី២២ តុលា ២០១៤ ខណៈពួកគេកំពុងជួញដូរគ្រឿងញៀននៅក្នុងភោជនីយដ្ឋានដឹហ្គ្រីន ស្ថិតក្នុងភូមិវត្តដំណាក់ សង្កាត់សាលាកំរើក ក្រុងសៀមរាប ។
លោកវរសេនីយ៍ឯក ស្រី យូរ៉ា មេបញ្ជាការរងកងរាជអាវុធហត្ថខេត្តបានឱ្យដឹងថា ជនសង្ស័យទាំង២នាក់ ម្នាក់ឈ្មោះយ៉ាត ជី ភេទប្រុស អាយុ២១ឆ្នាំ មុខរបរមិនពិតប្រាកដ ស្នាក់នៅភូមិ-សង្កាត់ខាងលើ និងម្នាក់ទៀតឈ្មោះហ៊ិន ផល្លា ភេទប្រុស អាយុ២៣ឆ្នាំ មុខរបរមិនពិតប្រាកដ រស់នៅភូមិសាលាកំរើក សង្កាត់សាលាកំរើក ក្រុងសៀមរាប។
លោកមេបញ្ជាការរងបានឱ្យដឹងទៀតថា ក្រោយពីចាប់ខ្លួនជនសង្ស័យ កម្លាំងជំនាញនៃការិយាល័យប្រឆាំងគ្រឿងញៀនបានធ្វើការឆែកឆេររកឃើញថ្នាំញៀនប្រភេទម្សៅគ្រើម១កញ្ចប់ ទម្ងន់១០,៧៥ក្រាម និងទូរស័ព្ទដៃចំនួន៣គ្រឿង បញ្ជូនមកកាន់ការិយាល័យប្រឆាំងគ្រឿងញៀន។
បច្ចុប្បន្នជនសង្ស័យ និងវត្ថុតាងត្រូវកម្លាំងជំនាញការិយាល័យប្រឆាំងគ្រឿងញៀនបញ្ជូនទៅតុលាការដើម្បីចាត់ការតាមច្បាប់៕
ចែករំលែកព័តមាននេះ