ខេត្តស្ទឹងត្រែង ៖ សមត្ថកិច្ចចម្រុះដឹកនាំដោយអ្នកស្រី ស៊ុន យ៉ឺត ព្រះរាជអាជ្ញារងអមសាលាដំបូងខេត្តស្ទឹងត្រែងកាលពីវេលាម៉ោង១២និង៣០នាទីថ្ងៃទី២២ តុលា ២០១៤ បានចុះបង្ក្រាបទីតាំងស្តុកឈើប្រណីតខុសច្បាប់ចំនួន២កន្លែងស្ថិតក្នុងភូមិកណ្តាល សង្កាត់ស្ទឹងត្រែង ក្រុងស្ទឹងត្រែង និងរឹបអូសបានឈើរាប់សិបដុំយកទៅរក្សាទុកនៅខណ្ឌរដ្ឋបាលព្រៃឈើ ។
ខេត្តស្ទឹងត្រែង ៖ សមត្ថកិច្ចចម្រុះដឹកនាំដោយអ្នកស្រី ស៊ុន យ៉ឺត ព្រះរាជអាជ្ញារងអមសាលាដំបូងខេត្តស្ទឹងត្រែងកាលពីវេលាម៉ោង១២និង៣០នាទីថ្ងៃទី២២ តុលា ២០១៤ បានចុះបង្ក្រាបទីតាំងស្តុកឈើប្រណីតខុសច្បាប់ចំនួន២កន្លែងស្ថិតក្នុងភូមិកណ្តាល សង្កាត់ស្ទឹងត្រែង ក្រុងស្ទឹងត្រែង និងរឹបអូសបានឈើរាប់សិបដុំយកទៅរក្សាទុកនៅខណ្ឌរដ្ឋបាលព្រៃឈើ ។
ប្រតិបត្តិការចុះបង្ក្រាបនេះគឺសមត្ថកិច្ចចម្រុះបានប្រើពេលអស់ប្រហែលជាង៤ម៉ោងដើម្បីសម្រេចជាលទ្ធផលផ្លូវការ ដោយកំលាំងចម្រុះ រួមមានជំនាញរដ្ឋបាលព្រៃឈើថ្នាក់កណ្តាល ផ្នែករដ្ឋបាលព្រៃឈើស្ទឹងត្រែង នគរបាលប៉ុស្តិ៍រដ្ឋបាល កម្លាំងកងរាជអាវុធហត្ថខេត្ត និងព្រះរាជអាជ្ញារងអមសាលាដំបូងខេត្ត បានរកឃើញឈើប្រណីតខុសច្បាប់ជាច្រើនដូចជា ប្រភេទឈើធ្នង់សន្លឹកតូចធំដែលកំពុងមានតម្លៃក្នុងទីផ្សារនាំចេញទៅកាន់ប្រទេសវៀតណាមនិងស្រុកចិន។ ដោយឡែកមួយចំនួនទៀតគេបានរកឃើញគំនរឈើគ្រញូងប្រមាណជិត៩៦ដុំផងដែរ។
យោងតាមការឱ្យដឹងពីកម្លាំងសមត្ថកិច្ចចុះបង្ក្រាបបានឱ្យដឹងថា ម្ចាស់ផ្ទះដែលជាប់ពាក់ព័ន្ធក្នុងជំនួញឈើខុសច្បាប់នេះមានឈ្មោះ យក់ សុខា និងឈ្មោះ គង់ ផល្លី។ ពេលចុះបង្ក្រាបសមត្ថកិច្ចមិនបានធ្វើការឃាត់ខ្លួនម្ចាស់ផ្ទះទាំងពីរនាក់ខាងលើនោះទេ គឺគ្រាន់តែសាកសួររកម្ចាស់ឈើតែប៉ុណ្ណោះ។ សមត្ថកិច្ចបន្តថា ឈើជាច្រើនសន្លឹកនិងជាច្រើនដុំនេះ ត្រូវបានក្រុមឈ្មួញលាក់ក្នុងអាងទឹក និងក្នុងបន្ទប់ ។ ផ្ទះឈ្មោះ យក់ សុខា ត្រូវបានសមត្ថកិច្ចរកឃើញ ប្រភេទឈើធ្នង់ចំនួន២០សន្លឹក និងផ្ទះឈ្មោះ គង់ ផល្លី សមត្ថកិច្ចរកឃើញឈើប្រភេទនាងនួន២៧ដុំ និងឈើធ្នង់ដុំនិងឈើធ្នង់សន្លឹកចំនួន១៥៣សន្លឹក។ ឈើទាំងនេះមានមុខកាត់ ចាប់ពី២តឹករហូតដល់៨តឹក កម្រាស់៥ហ៊ុនទៅមួយតឹក និងមានប្រវែងពី១ម៉ែត្ររហូតដល់២ទៅ៣ម៉ែត្រ។
ម្ចាស់ផ្ទះស្តុកឈើប្រណីតឈ្មោះ យក់ សុខា បានប្រាប់សមត្ថកិច្ចថា ឈើប្រណីតទាំងនេះម្ចាស់ឈើគឺជាជនជាតិវៀតណាមម្នាក់ឈ្មោះថាំង។ ឈ្មោះថាំងត្រូវបានគេស្គាល់គឺជាថៅកែឈើដុះស្លែម្នាក់នៅខេត្តស្ទឹងត្រែងហើយក៏ធ្លាប់បានសមត្ថកិច្ចចុះបង្ក្រាបក្នុងករណីស្តុកឈើជាញឹកញាប់ផងដែរក្នុងរយៈពេលកន្លងមក ៕
ចែករំលែកព័តមាននេះ