ស៊េរីណា វីលៀម បានទទួលរងនូវការបរាជ័យដ៏អាម៉ាស់ក្នុងអាជីពរបស់ខ្លួនរយៈពេល១៦ឆ្នាំចុងក្រោយនេះ ខណៈកាលពីថ្ងៃពុធ ទី២២ តុលា ក្នុងកម្មវិធី WTA Championships នាប្រទេសសិង្ហបុរី នាងបានចាញ់ក្រោមថ្វីដៃកីឡាការិនីជើងខ្លាំងរបស់រូម៉ានី គឺនាង Simona Halep ក្នុងលទ្ធផល២សិតជាប់ៗគ្នា ។
Halep បានយកឈ្នះនាងស៊េរីណា ដែលជាម្ចាស់ជើងឯកព្រឹត្តិការណ៍នេះ៥ជំនាន់ក្នុងលទ្ធផល៦-០ និង៦-២ ឆ្លងផុតវគ្គ២ នៃការប្រកួតជម្រុះក្នុងពូលដោយក្តីរីករាយ ។ លទ្ធផលនេះបានធ្វើឱ្យកីឡាការិនីរូម៉ានី Halep រូបនេះខិតចូលកាន់តែកៀកនឹងវគ្គពាក់កណ្តាលផ្តាច់ព្រ័ត្រ ។
ក្នុងពេលប្រកួត ស៊េរីណា បានធ្វើឱ្យមានកំហុស double-faults ចំនួន៦លើក ។ នាងបានថ្លែងថា ៖ «សឺវីសខ្ញុំមិនសូវជាដូចបំណងទេ។ គ្រប់ពេលដែលខ្ញុំវាយសឺវីសទី១ គឺខ្ញុំពិតជារំភើប និងភ្ញាក់ផ្អើលខ្លាំងណាស់ ។ តែយ៉ាងណា លទ្ធផលលើកនេះពិតជាធ្វើឱ្យខ្ញុំខ្មាសអៀនខ្លួនឯងយ៉ាងខ្លាំង ។ ខ្ញុំបានមើលការប្រកួតរបស់នាង Halep រាប់មិនអស់ ហើយដូចជាខ្ញុំបាននិយាយអញ្ចឹងពីមុនមកនាងមិនដែលលេងបានល្អដូច្នេះទេ» ។
បន្ទាប់ពីជ័យជម្នះ២២ប្រកួតបន្តបន្ទាប់គ្នា ស៊េរីណា ហាក់ដូចជាសំណាងមិនល្អ ខណៈនាងចាញ់ដល់ទៅ៤លើក ។ បើប្រៀបធៀបនឹង២ឆ្នាំមុន២៩ប្រកួត គឺនាងចាញ់តែ១លើកប៉ុណ្ណោះ។ ឯជ័យជម្នះក្នុងក្របខ័ណ្ឌធំវិញ ឆ្នាំនេះគឺនាងឈ្នះបានតែ១លើកប៉ុណ្ណោះលើទឹកដីកំណើតរបស់ខ្លួន ។
ចំពោះនាង Halep វិញ លទ្ធផលលើកនេះអាចនិយាយបានថា ល្អជាងពេលណាៗទាំងអស់ក្នុងអាជីព ។ វាជាលើកទី១ ហើយរយៈពេល២ឆ្នាំ ដែលកីឡាការិនីលំដាប់ទី៤៧ ពិភពលោករូបនេះយកឈ្នះកីឡាការិនីលំដាប់ទី១ ពិភពលោក។ នាងបានថ្លែងថា ៖ «នេះជាការប្រកួតល្អជាងគេក្នុងជីវិតរបស់ខ្ញុំ ។ កម្លាំងវាយសឺវីសរបស់ខ្ញុំពិតជាខ្លាំងមិនគួរឱ្យជឿ ។ ដូច្នេះ ការប្រកួតលើកនេះពិតជាមានន័យខ្លាំងណាស់»។
ដោយឡែកនាងអាណា អុីវ៉ាណូវិច ទទួលបានឱកាសឈានទៅវគ្គបន្តផងដែរ បន្ទាប់ពីនាងផ្តួលកីឡាការិនីកាណាដា Eugenie Bouchard ក្នុងលទ្ធផល៦-១ និង៦-៣ ។ កីឡាការិនីវ័យ២៧ឆ្នាំរបស់ស៊ែប៊ីរូបនេះថ្លែងថា ៖ «នេះជាប្រព័ន្ធប្រកួតជម្រុះក្នុងពូលដ៏ល្អដែលខ្ញុំនៅតែមានឱកាស» ៕
ចែករំលែកព័តមាននេះ