រាជធានីភ្នំពេញ ៖ ក្រុមហ៊ុនប្រមាណជាង១៥០ដែលមកពីប្រទេស ចិន អាឡឺម៉ង់ ជប៉ុន តៃវ៉ាន់ ម៉ាឡេស៊ី ថៃ សហរដ្ឋអាមេរិក និងប្រទេសសិង្ហបុរីគ្រោងចូលរួមតាំង
ពិព័រណ៍វិស័យរថយន្ត គ្រឿងបន្លាស់ សំភារៈ និងសេវាកម្មជួសជុលរថយន្តខ្នាតអន្តរជាតិដ៏ធំបំផុតនៅកម្ពុជា ដែលនឹងប្រព្រឹត្តទៅចាប់ពីថ្ងៃទី៣០ តុលា ដល់ថ្ងៃទី២ វិច្ឆិកា ២០១៤ នៅមជ្ឈមណ្ឌលពិព័រណ៍ និងសន្និបាតកោះពេជ្រ។
យោងតាមសេចក្តីប្រកាសព័ត៌មានបានឲ្យដឹងថា ពិព័រណ៍ខាងលើកនេះរៀបចំដោយក្រុមហ៊ុន AMB Group គាំទ្រដោយក្រសួងពាណិជកម្ម និងឧស្សាហកម្មរថយន្តនៅកម្ពុជាក្នុងគោលបំណងបង្ហាញនូវផលិតផលចុងក្រោយបំផុត និងផ្តល់ឱកាសឲ្យអ្នកចូលរួមបានជួបផ្ទាល់ជាមួយសហគ្រិនអន្តរជាតិ និងអ្នកផ្គត់ផ្គង់ដើម្បីបង្កើតឱកាសសម្រាប់អ្នកជំនាញ និងអ្នកជំនួញ។
សេចក្តីប្រកាសដដែលក៍បានបញ្ជាក់ទៀតថា ពិព័រណ៍នេះធ្វើឡើងស្របពេលដែលឧស្សាហកម្មរថយន្តនៅប្រទេសកម្ពុជាបាននិងកំពុងផ្លាស់ប្តូរ ដោយនៅពេលនេះមានមនុស្សកាន់តែច្រើនកំពុងទិញរថយន្តថ្មី ខណៈពេលដែលរថយន្តក្រុង និងរថយន្តដឹកទំនិញកំពុងតែមានភាពរីកចំរើន និងសំបូរបែប។ ពិព័រណ៍នេះក៏ជាឱកាសពង្រីកក្នុងការផ្គត់ផ្គង់ឧបករណ៍គ្រឿងបន្លាស់ និងសេវាកម្មជួសជុលដែលមានគុណភាពដើម្បីបំពេញតម្រូវការអ្នកប្រើប្រាស់នាពេលបច្ចុប្បន្នផងដែរ៕
ចែករំលែកព័តមាននេះ