រាជធានីភ្នំពេញ ៖ ការប្រកួតកីឡាវាយសីជ្រើសរើសជើងឯកប្រចាំឆ្នាំ២០១៤ ដែលធ្វើឡើងអស់រយៈពេល៥ថ្ងៃនៅពហុកីឡដ្ឋានជាតិអូឡាំពិក មកដល់ថ្ងៃទី២២ តុលា បានបញ្ចប់ជាស្ថាពរ ហើយពិធីបិទការប្រកួតត្រូវបានគេរៀបចំធ្វើក្រោមអធិបតីភាពលោកប៊ូ ជុំសេរី អនុរដ្ឋលេខាធិការក្រសួងអប់រំ យុវជន និងកីឡា ។លោកប៊ូ ជុំសេរី បានមានប្រសាសន៍ថា ការរៀបចំប្រកួតកីឡាវាយសីនេះបានផ្តល់ឱ្យកីឡាករ-កីឡាការិនីបញ្ចេញនូវសមត្ថភាព ទេពកោសល្យដែលបានហ្វឹកហាត់កន្លងមក និងជាបទពិសោធដើម្បីដកស្រង់នូវចំណុចខ្លាំងយកមកកែប្រែដុសខាត់នូវចំណុចខ្វះខាត ។
លោកបន្តទៀតថា ការអភិវឌ្ឍវិស័យអប់រំកាយ និងកីឡា គឺជាទស្សនវិស័យថ្មីមួយដែលតម្រង់ទិសវិស័យកីឡាជាតិឈានទៅរកការធ្វើទំនើបកម្ម ដើម្បីសុខុមាលភាពរបស់ប្រជាពលរដ្ឋគ្រប់រូប និងដើម្បីលើកកម្ពស់សេដ្ឋកិច្ចគ្រួសារ ក៏ដូចជាសេដ្ឋកិច្ចជាតិទាំងមូល ។ ចំពោះលទ្ធផលចំណាត់ថ្នាក់មានដូចខាងក្រោម ៖
វិញ្ញាសាវាយទោលកុមារអាយុក្រោម១៣ឆ្នាំ លេខ១ បានទៅកីឡាករវ៉ាត វ៉ាន់ធន់ លេខ២ កីឡាករលឹម ប៉េងយីង និងលេខ៣ កីឡាករហេង ម៉េងលី ទាំង៣នាក់មកពីក្លិបខេត្តកំពង់ឆ្នាំង ។ វិញ្ញាសាវាយគូកុមារអាយុក្រោម១៣ឆ្នាំ លេខ១ បានទៅកីឡាករហេង ម៉េងលី និងកីឡាករវ៉ាត វ៉ាន់ធន់ មកពីក្លិបខេត្តកំពង់ឆ្នាំង ។ វិញ្ញាសាវាយទោលយុវជនអាយុក្រោម១៦ឆ្នាំ លេខ១ បានទៅកីឡាករសោម ឌីណា មកពីក្លិបត្រពាំងស្រែ ។ វិញ្ញាសាវាយគូយុវជនអាយុក្រោម១៦ឆ្នាំ លេខ១ បានទៅកីឡាកររស់ សម្បត្តិ និងសោម ឌីណា មកពីក្លិបត្រពាំងស្រែ ។
វិញ្ញាសាវាយទោលបុរស ក្របខ័ណ្ឌក១ លេខ១ បានទៅកីឡាករទេព ចាន់ម៉ារ៉ា មកពីក្លិបខេត្តកំពង់ឆ្នាំង ។ វិញ្ញាសាវាយគូបុរសក្របខ័ណ្ឌក១ លេខ១ បានទៅកីឡាករទាវ យុ៉ងវណ្ណៈ និងកីឡាករងួន កាណូរ៉ា មកពីក្លិបត្រពាំងស្រែ ។ វិញ្ញាសាវាយទោលបុរសក្របខ័ណ្ឌក២ អាយុក្រោម១៩ឆ្នាំ លេខ១ បានទៅកីឡាករលឹម ប៉េងហេង មកពីក្លិបខេត្តកំពង់ឆ្នាំង ។ វិញ្ញាសាវាយគូបុរសក្របខ័ណ្ឌក២ អាយុក្រោម១៩ឆ្នាំ លេខ១ បានទៅកីឡាករឡេង វណ្ណៈ និងកន ចាន់ថន មកពីក្លិបត្រពាំងស្រែ ។
វិញ្ញាសាវាយទោលនារី លេខ១ បានទៅកីឡាការិនី កែវពេជ្រ ឆរ៉ាវី មកពីក្លិបខេត្តស្វាយរៀង រីឯវិញ្ញាសាវាយគូនារី លេខ១ បានទៅកីឡាការិនី អ៊ុង វលក្ខ័ទេវី និងកីឡាការិនី នួន សុភ័ក្រ មកពីក្លិបខេមរៈ ។
វិញ្ញាសាវាយគូវ័យចាស់ អាយុ៤០ឆ្នាំឡើង លេខ១ បានទៅកីឡាករលឹម កៅ និងកីឡាកររស់ អិនសុផល មកពីក្លិបព្រះខ័នរាជ ។ វិញ្ញាសាវាយជាក្រុមបុរសលេខ១ បានទៅក្លិបត្រពាំងស្រែ, លេខ២ ក្លិបខេត្តកំពង់ចាម និងលេខ៣ ក្លិបមុន្នីឋាបនា ។ សូមបញ្ជាក់ថា ការប្រកួតជ្រើសរើសជើងឯកប្រចាំឆ្នាំ២០១៤នេះ គឺបានចាប់ផ្តើមតាំងពីថ្ងៃទី១៨ តុលា មកម្ល៉េះ ដោយមាន១៤ក្លិប និងកីឡាករ-កីឡារិនីសរុបចំនួន២១៨នាក់ ក្នុងនោះកីឡាការិនីមានចំនួន១៨នាក់ចូលរួម ៕
ចែករំលែកព័តមាននេះ