កីឡាករស្វ៊ីសរ៉ូជើ ហ្វេដឺរ័រ បានចាប់ផ្តើមយុទ្ធនាការដណ្តើមយកពានជើងឯកកម្មវិធី Swiss Indoors ជាលើកទី៦ របស់ខ្លួនជាមួយនឹងជ័យជម្នះលើកីឡាករលុចសំបួ Gilles Muller កាលពីថ្ងៃពុធ ទី២២ តុលា ។ ការប្រកួតក្នុងជុំទី១ នេះត្រូវបានរៀបចំធ្វើនៅទីក្រុង Basel ប្រទេសស្វ៊ីស ។ ហ្វេដឺរ័រ បានយកឈ្នះ Muller ក្នុងលទ្ធផល ៦-២ និង៦-១ ឈានចូលដល់ជុំទី២ ដោយក្តីរីករាយ ។ ជើងឯក៥សម័យកាលរូបនេះបានប្រើពេលអស់៤៦នាទី ។
ថ្លែងក្រោយពីទទួលបានជ័យជម្នះ ហ្វេដឺរ័របានបញ្ជាក់ថា ៖ «ខ្ញុំមិនបានគិតថា ការប្រកួតបញ្ចប់ទៅយ៉ាងឆាប់រហ័សបែបនេះសោះ ។ វាគួរជាការប្រកួតដ៏តានតឹង ។ ចាប់ផ្តើមភ្លាម ខ្ញុំមិនយល់ពីបច្ចេកទេសវាយសឺវីសរបស់គេនោះទេ ហើយពេលនោះ ខ្ញុំហាក់មានសម្ពាធខ្លះៗដែរ» ។ ចាប់ពីការបើករដូវកាលរហូតទល់នឹងពេលនេះ ហ្វេដឺរ័រ បានយកឈ្នះពានជើងឯកចំនួន៤លើករួចមកហើយ។
គេបានបន្តថា ៖ «វាជារឿងប្រពៃបំផុតដែលបានមកប្រកួតនៅលើទឹកដីកំណើតរបស់ខ្លួនក្នុងនាមជាកីឡាករលំដាប់ទី២ ពិភពលោក ហើយវាក៏ជាអារម្មណ៍ដ៏អស្ចារ្យមួយផងដែរដែលបានប្រកួតនៅទីនេះក្នុងខណៈកម្រិតបច្ចេកទេសរបស់ខ្ញុំកំពុងឈានដល់កំពូល»។
គួរកត់សម្គាល់ថា នេះគឺជាការចេញមុខលើកទី១៤ របស់គេហើយក្នុងកម្មវិធី Swiss Indoors។ នៅជុំបន្ទាប់ គេនឹងប៉ះជាមួយកីឡាករអ៊ូសបេគីស្ថាន Denis Istomin ដែលបានបំបាក់កីឡាករប៉ូឡូញ Jerzy Janowicz ក្នុងលទ្ធផល៦-១ និង៦-១ ។
ចំណែកលទ្ធផលនៃការប្រកួតគូផ្សេងទៀត គឺ កីឡាករប៊ុលហ្គារី Grigor Dimitrov យកឈ្នះកីឡាករអាល្លឺម៉ង់ Alexander Zverevក្នុងលទ្ធផល២-៦, ៦-៤និង៦-២ ខណៈកីឡាករក្រូអាស៊ី Borna Coric យកឈ្នះកីឡាករឡេតូនី Ernests Gulbisក្នុងលទ្ធផល៧-៦ និង៦-៣។ ឯកីឡាករកាហ្សាក់ស្ថាន Andrey Golubev យកឈ្នះកីឡាកររុស្ស៊ី Teimuraz Gabashvili ក្នុងលទ្ធផល៦-៣ និង៦-៣ ខណៈកីឡាករបែលហ្ស៊ិក David Goffin ផ្តួលកីឡាករក្រូអាស៊ី Ivan Dodig ក្នុងលទ្ធផល៧-៦ និង៦-៤៕
ចែករំលែកព័តមាននេះ