រាជធានីភ្នំពេញ ៖ ថ្លែងក្នុងកម្មវិធីបិទមហាសន្និបាទបូកសរុបលទ្ធផលការងារអណត្តិទី១របស់គណៈវិស្វករកម្ពុជា នាថ្ងៃទី២២ តុលា ២០១៤ នៅសណ្ឋាគាអ៊ីនធើរខុន លោកបណ្ឌិតសភាចារ្យ សុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តីបានអះអាងថា វិស័យវិស្វកម្មដើរតួនាទីយ៉ាងសំខាន់ក្នុងការអភិវឌ្ឍន៏ប្រទេសតាមរយៈការបង្កើតមូលដ្ឋានសម្ភារ និងហេដ្ឋារចនាសម្ព័ន្ធរូបវ័ន្តនានា។
លោកបណ្ឌិតសភាចារ្យ សុខ អាន បានបញ្ជាក់ថា តាមរយៈអត្ថន័យខាងលើនេះវិស្វករអាជីពម្នាក់មិនត្រឹមតែត្រូវមានសមត្ថភាពតាមរយៈការអប់រំ និងការបណ្ដុះបណ្ដាលច្បាស់លាស់លើវិស័យវិស្វកម្មប៉ុណ្ណោះទេ ប៉ុន្តែថែមទាំងត្រូវមានសីលធម៌វិជ្ជាជីវៈខ្ពស់ ហើយដើម្បីលើកកម្ពស់នូវវិជ្ជាជីវៈរបស់ខ្លួនថែមទៀត វិស្វករគួរធ្វើការសិក្សាស្រាវជ្រាវនូវបច្ចេកវិទ្យាថ្មីៗសំដៅឆ្លើយតបទៅនឹងតម្រូវការ និងការវិវត្តផ្នែកវិស្វកម្មនេះ។
លោកបន្ថែមថា វិស្វកម្ម គឺជាវិជ្ជាជីវៈមួយដែលតម្រូវឱ្យមានគោលការណ៍វាយតម្លៃ និងការកំណត់លើវិធីសាស្រ្តច្បាស់លាស់។ វិស្វករអាជីពកម្ពុជាគួរខិតខំបំពេញលក្ខខណ្ឌចាំបាច់នានាដើម្បីធ្វើឱ្យវិស័យវិស្វកម្មកម្ពុជាមានតម្លៃសមមូលនឹងវិស្វកម្មអាស៊ានក៏ដូចជាវិស្វកម្មពិភពលោក។ ក្នុងន័យនេះ កិច្ចខិតខំប្រឹងប្រែងជំរុញសមត្ថភាពវិស្វករជាតិ គឺពិតជាមានសារសំខាន់សម្រាប់ដំណើរការពង្រឹងវិស័យនេះ ដើម្បីឆ្លើយតបទៅនឹងចរន្តសមាហរណកម្ម និងសាកលភាវូបនីយកម្មសេដ្ឋកិច្ចតំបន់ និងពិភពលោក។
ជាងនេះទៅទៀតចាំបាច់ត្រូវមានការផ្លាស់ប្ដូរយោបល់បទពិសោធន៍ជាក់ស្ដែងគំនិត និងបច្ចេកវិទ្យាថ្មីៗ ព្រមទាំងរបកគំហើញនៃការសិក្សាស្រាវជ្រាវឱ្យកាន់តែទូលំទូលាយនៅក្នុងចំណោមសហគមន៍វិស្វករជាតិ និងអន្តរជាតិ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ