រាជធានីភ្នំពេញ ៖ ជនរងគ្រោះដោយសារគ្រាប់មីន និងសំណល់ជាតិផ្ទុះ ក្នុងរយៈពេល៦ខែ ឆ្នាំ២០១៤ នៅទូទាំងប្រទេសសរុបចំនួន១០១នាក់ នេះបើយោងតាមរបាយការណ៍លទ្ធផលនៃការបោសសំអាតមីន និងសំណល់ជាតិផ្ទុះពីសង្គ្រាម ដែលអគ្គអាជ្ញាធរមីនចែកឱ្យអ្នកសារព័ត៌មាននៅក្នុងពិធីផ្ទេរ និងចូលកាន់តំណែងអគ្គលេខាធិការអាជ្ញាធរមីន កាលពីវេលាព្រឹកថ្ងៃទី២២ តុលា ២០១៤ ដែលរៀបចំនៅសាលប្រជុំអាជ្ញាធរមីន ។
យោងតាមរបាយការណ៍លទ្ធផលនៃការបោសសំអាតមីន និងសំណល់ជាតិផ្ទុះពីសង្គ្រាមបានឱ្យដឹងថា ជនរងគ្រោះដោយសារមីននិងសំណល់ជាតិផ្ទុះនេះ គិតពីខែមករា ដល់ដំណាច់ខែមិថុនា ឆ្នាំ២០១៤ មានចំនួន១០១នាក់ បើប្រៀបធៀបនិងរយៈពេលដូចគ្នាឆ្នាំមុន មាន៦៥នាក់ កើនឡើង៣៦នាក់ ត្រូវជា៥៥% ។
ក្នុងនោះរបួសដោយសារសំណល់ជាតិផ្ទុះពីសង្គ្រាមចំនួន៣៩នាក់ របួសដោយសារមីនចំនួន២៣នាក់ ពិការដោយសារគ្រាប់មីនចំនួន១៤នាក់ ពិការដោយសារសំណល់ជាតិផ្ទុះពីសង្គ្រាមចំនួន១១នាក់ ស្លាប់ដោយសារមីនចំនួន០៥នាក់ ស្លាប់ដោយសារសំណល់ជាតិផ្ទុះពីសង្គ្រាមចំនួន០៩នាក់ សរុបស្លាប់១៤នាក់ បើរប្រៀបធៀបនិងរយៈពេលដូចគ្នាឆ្នាំមុន មានមនុស្សស្លាប់០៨នាក់កើនឡើង០៦នាក់ត្រូវជា៧៥% ។
របាយការណ៍ដដែលបានឱ្យដឹងទៀតថា គិតពីឆ្នាំ១៩៩២ មកដល់ដំណាច់ខែមិថុនា ឆ្នាំ២០១៤ បានធ្វើការបោសសំអាតមីនសម្រេចលើផ្ទៃដី១.១២៣.៩៤៣.៥៨០ម៉ែត្រក្រឡា រកឃើញមីនប្រឆាំងមនុស្ស៩៩៧.០០៣គ្រាប់ មីនប្រឆាំងរថក្រោះ២៣.៣៣៨គ្រាប់,សំណល់ជាតិផ្ទុះពីសង្គ្រាម២.៥០៤.០៨២គ្រាប់ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ