ខេត្តបន្ទាយមានជ័យ ៖ យុវជនម្នាក់ត្រូវសមត្ថកិច្ចចាប់ខ្លួនតាមបណ្តឹងពីម្តាយក្មេងស្រី ដោយចោទប្រកាន់ថា បានបង្ខំចាប់រំលោភកូនស្រីគាត់ ដែលមានអាយុ១៤ឆ្នាំ ជាអនីតិជន ។ យុវជនរូបនេះ ត្រូវកងរាជអាវុធហត្ថចាប់ខ្លួនបញ្ជូនទៅសាលាដំបូងខេត្ត នាព្រឹកថ្ងៃទី២២ តុលា ។
លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ឱ្យដឹងថា យុវជនរូបនេះឈ្មោះ អ៊ុច អេម អាយុ១៩ឆ្នាំ ស្នាក់នៅភូមិ១ សង្កាត់ព្រះពន្លា ក្រុងសិរីសោភ័ណ។ ការចាប់ខ្លួននេះ ធ្វើទ្បើងបន្ទាប់ពីទទួលពាក្យបណ្តឹងពីម្តាយក្មេងស្រី ដោយបានប្តឹងចោទយុវជននេះថា បាននាំកូនស្រីគាត់ ដែលទើបមានអាយុ១៤ឆ្នាំ យកទៅរំលោភបានសម្រេចនៅផ្ទះសំណាក់ជាយក្រុង កាលពីយប់ថ្ងៃទី១៩ តុលា ស្ថិតនៅភូមិសូភី សង្កាត់កំពង់ស្វាយ ក្រុងសិរីសោភ័ណ ។
លោកវរសេនីយ៍ឯកបន្តថា ក្រោយពេលទទួលពាក្យបណ្តឹងហើយ កម្លាំងកងរាជអាវុធហត្ថខេត្ត បានឃាត់ខ្លួនយុវជននេះ នៅថ្ងៃទី២០ តុលា នៅផ្ទះជនជាប់ចោទតែម្តង ។ តាមចម្លើយជនជាប់ចោទបានសារភាពថា គេបានស្គាល់នាងតាមរយៈមិត្តភក្តិ ហើយបាននាំនាងដើរលេង និងនាំទៅដេកផ្ទះសំណាក់ ដោយមានការយល់ព្រមពីនាង គឺមិនបានបង្ខំទេ ។ ទោះបីជាបែបណា ក្មេងស្រីជាអនីតិជន ទោះបីព្រមព្រៀងគ្នាក្តី ក៏ច្បាប់មិនអនុញ្ញាតដែរ ។ គួរឱ្យស្តាយដែលយុវជនរូបនេះភ្លើតភ្លើនស្នេហាផ្តេសផ្តាសបែបនេះ ៕
ចែករំលែកព័តមាននេះ