ខេត្តកំពង់ឆ្នាំង ៖ នេះជាឈ្មោះទូកមួយដែលពុំធ្លាប់ចាញ់ និងឈរក្នុងលំដាប់ថ្នាក់លេខ១ ជារៀងរាល់ឆ្នាំក្នុងឱកាសបុណ្យអំទូក អកអំបុក សំពះព្រះខែដែលជាបុណ្យប្រពៃណីជាតិ តែងតែគោរពធ្វើឡើងជារៀងរាល់ឆ្នាំ នៅមុខព្រះបរមរាជវាំង រាជធានីភ្នំពេញ។
ទូកងប្រណាំងដ៏ល្បីល្បាញមួយនេះ បន្ទាប់ពីជួសជុល និងលាបថ្នាំថ្មីរួចមក ត្រូវបានគណៈកម្មការទូក បានធ្វើពិធីក្រុងពាលីដើម្បីដាក់ចុះពីបង្គង ក្នុងវត្តវិហារហ្លួង ហៅវត្តផ្សារ ស្ថិតក្នុងឃុំផ្សារ ស្រុកបរិបូរណ៏ខេត្តកំពង់ឆ្នាំង កាលពីថ្ងៃទី២២ តុលា ឆ្នាំ២០១៤ រួចបានដង្ហែរតាមដងផ្លូវជាតិលេខ៥ ចុះទៅកំពង់ទឹកឃុំឆ្នុកទ្រូ និងបានចេញទៅសំចត នៅភូមិកំពង់ព្រះគគី ដើម្បីឱ្យក្រុមកីឡាករស្នាក់នៅ និងធ្វើការហ្វឹតហាត់នៅទីនោះមុននឹងចេញទៅធ្វើការប្រកួត ។
លោក សេង ប៊ុនហេង ប្រធានគណៈកម្មការដឹកនាំទូកប្រណាំងខាងលើនេះ បានប្រាប់ថា ទូក ឈ្មោះ «ព្រះទីនាំងសារ៉ាយអណ្តែតចង្ហាន់ហុយ» ធ្លាប់បានទទួលចំណាត់ថ្នាក់លេខ១ចំនួន៣លើកនិងចំណាត់ថ្នាក់លើសោភ័ណភាពលេខ១ចំនួន១លើក ។ ទូកនេះមានចំណុះកីឡាករ៤៨នាក់ដែលនឹងត្រូវហ្វឹកហាត់នៅក្នុងភូមិកំពង់ព្រះគគី ឃុំឆ្នុកទ្រូ រហូតដល់ថ្ងៃទី០៣ វិច្ឆិកា ទើបទៅចូលរួមការប្រកួតសាកល្បងជាមួយទូកក្នុងខេត្តដទៃទៀតនៅស្រុកកំពង់ត្រឡាច មុននឹងចេញដំណើរទៅចូលរួមប្រកួតនៅរាជធានីភ្នំពេញ ដែលនឹងប្រព្រឹត្តឡើងពីថ្ងៃទី៥ ដល់ ថ្ងៃទី៧ វិច្ឆិកា ខាងមុខននេះ ៕
ព័ត៌មានលម្អិតនឹងមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ