ក្នុងប្រវត្តិសាស្ត្រអាមេរិកតាំងពីបង្កើតរដ្ឋដំបូងរហូតដល់សព្វថ្ងៃ នារីឈ្មោះFrances Cleveland នៅតែជាប់ឈ្មោះជាជំទាវទី១ដែលមានវ័យក្មេងជាងគេបំផុត ។ ស្វាមីរបស់លោកជំទាវក្មេងនេះគឺលោក Groves Cleveland ប្រធានាធិបតីទី២២ និងទី២៤ សហរដ្ឋអាមេរិក ដែលជាប់ឆ្នោតជាប្រធានាធិបតីអាណត្តិឆ្នាំ១៨៨៥ដល់ឆ្នាំ១៨៨៩ និងអាណត្តិឆ្នាំ១៨៩៣ ដល់១៨៩៧ ។
Frances Clara Folsom កើតថ្ងៃទី២១ កក្កដា ១៨៦៤ នៅប៊ុលហ្វាឡូ ញូវយ៉ក ។ លោក Oscar Folsom ឪពុករបស់នាងប្រកបមុខរបរមេធាវី ជាជនជាតិអង់គ្លេស ដំបូងៗដែលឆ្លងមហាសមុទ្រអាត្លង់ទិកទៅរស់នៅដែនដីអាមេរិកខាងជើងនាសតវត្សទី១៧ ។ ដោយហេតុប្អូនស្រីរបស់នាងបានបាត់បង់ជីវិតពេលទើបកើតបានមួយថ្ងៃ ហេតុនេះ Frances ត្រូវស្នងមរតកគ្រួសារតែម្នាក់ឯងគត់ ។ ប្រការគួរឱ្យអស់សំណើចមួយ គឺកុមារីអនាគតជំទាវរូបនេះកាលពីតូចគេហៅឈ្មោះជាប្រុសថា «FranKៗ»ដើម្បីរំលឹកដល់អនុស្សាវរីយ៍ឪពុកមារបស់នាង លុះក្រោយមកមួយរយៈទើបគ្រួសារដាក់ឈ្មោះ Frances ជាឈ្មោះស្រីវិញ ។
អនាគតស្វាមីរបស់Frances គឺGrover Cleveland កាលមិនទាន់ជាប់ឆ្នោតជាប្រធានាធិបតីប្រកបរបរមេធាវីដូចលោកOsar Folsom ឪពុករបស់នាងដែរ ហើយអ្នកទាំងពីរថែមទាំងជាមិត្តសិ្នទ្ធស្នាលនឹងគ្នាទៀត ។ ហេតុនេះទើបGrover Cleveland បានរួមចំណែកបីបមថែរក្សាអនាគតភរិយាខ្លួនតាំងពីពេលនាងទើបកើតក្រហមរងាល ប្រៀបបានឪពុកមាចិត្តល្អម្នាក់ជួយបីបាច់ក្មួយស្រីសម្លាញ់។ ជាចៃដន្យឆ្នាំ១៨៧៥ ស្រាប់តែលោកOsar Folsom ជួបគ្រោះថ្នាក់ចរាចរអស់ជីវិតដោយអត់បានបន្សល់ទុកបណ្ដាំមរតកអ្វីសោះ លោកGrover Cleveland ក៏សុំទទួលភារកិច្ចបីបាច់Frances ដោយខ្លួនឯងទាំងស្រុង ខណៈកុមារីរូបនេះក្លាយជាក្មេងស្រីកំព្រាឪពុកក្នុងអាយុ១១ឆ្នាំ។ ក្រោយមកម្ដាយរបស់Frances យកប្ដីទៀត តុលាការជំនាន់នោះសម្រេចឱ្យGrover Cleveldan គ្រប់គ្រងទ្រព្យសម្បត្តិរបស់អ្នកដែលបានបាត់បង់ជីវិតដើម្បីប្រគល់ឱ្យ Frances ពេលនាងធំពេញវ័យ ។
ភ្លើងជិតចំបើង រវាងឪពុកមាចិញ្ចឹមនិងក្មួយស្រីកំពុងបែកសាច់ស្រស់ស្អាតចាប់ផ្ដើមមានក្លិនស្នេហាបក់ជ្រៀតជ្រែកចូលបន្តិចម្ដងដោយមិនដឹងខ្លួន ថ្វីបើអ្នកទាំងពីរនេះមានអាយុខុសគ្នាជិត៣០ឆ្នាំក៏ដោយ ។ ក្នុងរយៈពេលFrances ចូលរៀននៅសាលាWells Collge អនាគតប្រធានាធិបតីរូបនេះទ្រាំលែងបានក៏បញ្ចេញទឹកចិត្តស្នេហាតាមរយៈពន្លឺភ្នែកចំពោះក្មួយក្រមុំដែលធ្លាប់បីបាច់ថើប គ្រូកៗ ធ្លាប់ចិញ្ចឹមបីបាច់តាំងពីតូចដល់ធំ ។ ខែសីហា ១៨៨៥ (ពេលវេលាដែលGrover Cleveland បានធ្វើម្ចាស់សេតវិមាន) Franees កំពុងធ្វើដំណើរកម្សាន្តនៅទ្វីបអឺរ៉ុបជាមួយម្ដាយ ស្រាប់តែនាងទទួលសំបុត្រសុំរៀបការពីប្រធានាធិបតីទើបជាប់ឆ្នោតGrover Cleveland ។ ត្រឡប់មកដល់អាមេរិកវិញFranees យល់ព្រមធ្វើភរិយាប្រធានាធិបតីដោយគ្មានស្ទាក់ស្ទើរថ្វីបើប្រុសម្នាក់នេះធ្លាប់ហៅ«លោកមាៗ» ពេញមាត់តាំងពីទើបចេះនិយាយស្ដីរហូតដល់អាយុ២១ឆ្នាំក្ដី ។ អាពាហ៍ពិពាហ៍របស់អ្នកទាំងពីរប្រព្រឹត្តទៅពេញ៥ថ្ងៃ នៅបន្ទប់ខៀវរបស់សេតវិមាន ។ នេះជាពិធីរៀបអាពាហ៍ពិពាហ៍តែមួយគត់ដែលរៀបចំនៅសេតវិមាន ។ កាលមុនប្រធានាធិបតីទី១០របស់សហរដ្ឋអាមេរិកលោកJohn Tyler ក៏រៀបអាពាហ៍ពិពាហ៍ពេលកំពុងកាន់អំណាចអុីចឹងដែរ ព្រោះលោកជាបុរសពោះម៉ាយ តែពិធីរៀបអាពាហ៍ពិពាហ៍លើកទីពីរនេះរៀបចំនៅក្រុងញូវយ៉ក ។ ភរិយាក្រោយរបស់លោកអាយុតិចជាងលោក៣០ឆ្នាំ ។
ពិធីរៀបអាពាហ៍ពិពាហ៍របស់ប្រធានាធិបតី Grover Cleveland ប្រព្រឹត្តទៅនៅថ្ងៃទី២ មិថុនា ១៨៨៦ ។ ពេលនោះកូនក្រមុំទើបតែអាយុ២១ឆ្នាំ ឯកូនកំឡោះអាយុ៤៩ឆ្នាំ តែទើបការប្រពន្ធជាលើកដំបូង(ពីមុនគាត់តែងនៅលីវរហូតដោយហាក់ដូចជាអត់ចាប់ចិត្តស្រឡាញ់នារីណាសូម្បីម្នាក់សោះ លុះដល់ចេះចាប់ចិត្តស្រឡាញ់ស្រីក៏ស្រឡាញ់ចំនារីដែលធ្លាប់ហៅខ្លួនថា លោកមាៗតាំងពីតូចក្រូចឆ្មារតែម្ដង) ។
ភ្ញៀវដែលបានទទួលការអញ្ជើញចូលរួមក្នុងពិធីរៀបអាពាហ៍ពិពាហ៍នោះរួមមាន សាច់ញាតិជិតបំផុត មិត្តស្និទ្ធស្នាលបំផុត និងគណៈរដ្ឋមន្ត្រីព្រមទាំងភរិយា ។ គ្មានអ្នកសារព័ត៌មានណាម្នាក់បានចូលជិតពិធីរៀបអាពាហ៍ពិពាហ៍នោះឡើយ។ លោកប្រធានាធិបតី Grover Cleveland ដែលមានចរិតមិនចង់ឱ្យអ្នកណាលូកដៃក្នុងការងាររបស់ខ្លួនដែលខ្លួនយល់ថាជាការងារសំខាន់ បានក្រសោបស្ទើរគ្រប់កិច្ចការធ្វើខ្លួនឯង តាំងពីសរសេរឈ្មោះភ្ញៀវដែលត្រូវអញ្ជើញចូលរួមដោយកំណត់ត្រឹមតែ៤០នាក់ រហូតដល់ចេញមុខចង្អុលបង្ហាញឱ្យគេតុបតែងបន្ទប់ខៀវ ។ បញ្ជាឱ្យគេចាត់ចែងពិធីរៀបអាពាហ៍ពិពាហ៍យ៉ាងម៉េចខ្លះ សូម្បីតែសម្លៀកបំពាក់កូនក្រមុំ គ្រឿងអលង្ការរបស់កូនក្រមុំក៏គាត់ជាអ្នករៀបចំដែរ។ លោករៀបចំវង់ភ្លេង បញ្ជាវង់ភ្លេង រហូតដល់បញ្ជាអាចារ្យដែលត្រូវអញ្ជើញចូលរួមជាអធិបតីពិធីអាពាហ៍ទៀត… ។ អាពាហ៍ពិពាហ៍រវាងកូនកំលោះអាយុ៤៩ឆ្នាំ និងកូនក្រមុំអាយុ២១ឆ្នាំបញ្ចប់នៅថ្ងៃទី៥ ជាថ្ងៃចុងក្រោយតាមផែនការកំណត់ ។ បន្ទាប់មកដំណើរក្រេបចន្ទទឹកឃ្មុំរបស់គូស្វាមីភរិយាជាថ្នាក់ដឹកនាំនេះប្រព្រឹត្តទៅអស់រយៈពេល៥ថ្ងៃទៀតនៅតំបន់ព្រៃភ្នំភាគខាងលិចរដ្ឋម៉ារីលែន ។
ត្រឡប់មកទីក្រុងវ៉ាសីុនតោនក្រោយពីដំណើរក្រេបចន្ទទឹកឃ្មុំ Frances Cleveland ទទួលការប្រគល់ភារកិច្ចជំទាវទី១ពីប្អូនស្រីបង្កើតរបស់ប្រធានាធិបតី (ព្រោះលោក Grover Cleveland ពេលឡើងធ្វើជាប្រធានាធិបតីជាបុរសនៅលីវទើបប្អូនស្រីបង្កើតរបស់គាត់ជួយរ៉ាប់រង«កិច្ចការមេផ្ទះ» នៅសេតវិមាន)។
Frances Cleveland ជាមនុស្សរាក់ទាក់រួសរាយមិនប្រកាន់ខ្លួន ហេតុនេះនាងឱ្យស្វាមីទទួលបានមនោសញ្ចេតនាកាន់តែខ្លាំងពីសង្គម។ នាងចេញមុខជួយកម្មវិធីសង្គមជាច្រើនពាក់ព័ន្ធដល់ស្ត្រី ដូចយ៉ាងជួយសង់ផ្ទះឱ្យស្ត្រីស្បែកខ្មៅរស់នៅឯកោនៅទីក្រុងវ៉ាសីុនតោន ឬបង្កើតចលនាក្ដីសង្ឃឹមសម្រាប់ស្ត្រីជាដើម ។ រៀងរាល់សប្ដាហ៍ ជំទាវទីមួយរូបនេះដាក់កម្មវិធីជួយប្រជាពលរដ្ឋពីរដង ជាពិសេសនៅក្នុងសេតវិមានដើម្បីឈ្វេងយល់ពីគោលបំណង និងសំណូមពររបស់ពួកគេ ។ ប្រជាពលរដ្ឋកាន់តែរាប់អាន និងមករកលោកជំទាវទីមួយ ច្រើនឡើងៗធ្វើឱ្យប្រធានាធបតីGrover Cleveland ព្រួយបារម្ភចំពោះបញ្ហាសន្ដិសុខរបស់ភរិយា ។ ឆ្នាំ១៨៨៧ Frances Cleveland អមដំណើរស្វាមីទៅបំពេញទស្សនកិច្ច និងសួរសុខទុក្ខប្រជារាស្ត្រនៅតាមបណ្ដារដ្ឋភាគខាងត្បូងនិងភាគខាងលិចប្រទេស ។ សកម្មភាពនេះបានប្រជាពលរដ្ឋស្រឡាញ់លោកជំទាវខ្លាំងមួយកម្រិតទៀត ។ នារីអាមេរិកជំនាន់នោះសម្គាល់ការស្លៀកពាក់របស់Frances Cleveland ជាម៉ូដសម័យទំនើបក៏នាំគ្នាស្លៀកពាក់តាមនាងស្ទើរគ្រប់គ្នា ហើយសរសើរគ្នាទៅវិញទៅមកថាសមណាស់ ។
ទោះបីមានមនោសញ្ចេតនាពីមហាជនចំពោះលោកជំទាវទីមួយច្រើនយ៉ាងនេះក្ដីក៏ទីបំផុតលោកជំទាវនៅតែមិនអាចជួយស្វាមីឱ្យជាប់ឆ្នោតម្ដងទៀតបាន ព្រោះគូប្រជែងរកឃើញចំណុចខ្សោយក្នុងប្រវត្តិរូបផ្ទាល់ខ្លួនរបស់ស្វាមីនាងធ្វើឱ្យឥទ្ធិពលគាត់ធ្លាក់ចុះពេលឃោសនារកសំឡេងឆ្នោត ។ ក្រោយចាញ់ឆ្នោតFrances និងស្វាមីផ្លាស់ទៅនៅញូវយ៉កជាមួយការសន្យាត្រឡប់មកធ្វើម្ចាស់សេតវិមានជាថ្មីបន្ទាប់ពីចប់អាណត្តិ៤ឆ្នាំនេះ ហើយការណ៍ពិតក៏បានដូចការសន្យាមែន ។ ឆ្នាំ១៨៨៧ Grover Clevedand បានជាប់ឆ្នោតធ្វើជាប្រធានាធិបតីលើកទីពីរ Frances Cleveland ក៏ក្លាយជាជំទាវទី១ម្ដងទៀត ។
ទោះបីមានការខ្សឹបខ្សៀវច្រើបពីស្ថានភាពប្ដីចាស់ប្រពន្ធក្មេង តែFrances អត់ខ្វល់អ្វីទាំងអស់ នៅតែស្រឡាញ់ស្វាមី ថ្នាក់ថ្នមស្វាមីធ្វើឱ្យប្ដីប្រពន្ធមួយគូនេះរស់នៅជាមួយគ្នាមានសុភមង្គលរហូត ។ អ្នកទាំងពីរមានកូនជាមួយគ្នា៥នាក់ ស្រី៣នាក់ ប្រុស២នាក់ ។ ក្រៅតែពីកូនស្រីច្បងឈ្មោះRuth ស្លាប់ក្នុងឆ្នាំ១៩០៤ ដោយជំងឺមហារីក កូន៤នាក់ទៀតទទួលបានហ្សែនពីម្ដាយច្រើនរស់នៅសុខសប្បាយរហូតដល់ចាស់ ។
ខែមិថុនា ១៩០៨ អតីតប្រធានាធិបតី Grover Cleveland អនិច្ចកម្មដោយសារជំងឺមហារីក។ ក្រោយពេលស្វាមីលាចាកលោក Frances Cleveland ផ្លាស់ទៅនៅPrinceton រដ្ឋញូវចឺសីុនៅពេលកូនប្រុសពៅទើបតែមានអាយុ៥ឆ្នាំ។ ខែកុម្ភៈ ឆ្នាំ១៩១៣ Frances ក្នុងវ័យ៤៩ឆ្នាំ បានរៀបការម្ដងទៀតជាមួយសាស្ត្រាចារ្យបុរាណវិទ្យានៅមហាវិទ្យាល័យPrinceton ។ ពេលសង្គ្រាមលើកទី១ផ្ទុះឡើងក្នុងឆ្នាំ១៩១៤ Frances និង កូនៗកំពុងធ្វើដំណើរកម្សាន្តនៅប្រទេសស្វ៊ីស ។ ពេលនោះដោយសារអឺរ៉ុបច្របូកច្របល់ខ្លាំង Frances ចំណាយពេលជិត២ខែទម្រាំត្រឡប់ទៅអាមេរិកវិញបាន ។ ថ្ងៃទី២៩ តុលា១៩៤៧ Frances លាចាកលោកក្នុងវ័យ៨៣ឆ្នាំ នៅBaletimore ។ សពរបស់Frances ត្រូវបានបញ្ចុះនៅទីស្មសានពិសេសក្បែរផ្នូរស្វាមីមុនគឺអតីតប្រធានាធិបតី Gorver Cleveland ៕
តាមឯកសារបរទេស
ចែករំលែកព័តមាននេះ