AFP កាលពីពេល ថ្មីៗនេះផ្សាយថា នាងម៉ូនីកា ឡេវិនស្គី អតីតបុគ្គលិកហាត់ការនៅសេតវិមាន បានឡើងលើវេទិកាជាលើកដំបូងកាលពីថ្ងៃទី២០ តុលា ២០១៤ រៀបរាប់ពីរឿងរ៉ាវស្នេហារបស់នាងជាមួយលោកប៊ីល គ្លីនតុន ។ ម៉ូនីកា ឡេវិនស្គី រៀបរាប់ថា នាងរងការសើចចំអក និងគំរាមតាមប្រព័ន្ធអនឡាញ រួមទាំងក្លាយជា «អ្នកជំងឺស្នេហាដំបូង» ក្រោយពីលង់ស្នេហ៍មេដឹកនាំអាមេរិកមក ។
ក្នុងពេលឡើងថ្លែងលើវេទិកាប្រជុំ «Inaugural Forbes Under 30 Summit» នៅក្រុងហ្វ៊ីឡាដែលហ្វ៊ីយ៉ា សហរដ្ឋអាមេរិក នាងម៉ូនីកា ឡេវិនស្គី អាយុ៤១ឆ្នាំ បានបង្ហាញពីភាពសោកសៅដែលរូបនាងត្រូវប្រឈមមុខ បន្ទាប់ពីមានរឿងអាស្រូវស្នេហាជាមួយលោកប្រធានាធិបតី ប៊ីល គ្លីនតុន កាលពីឆ្នាំ១៩៩៨ រួមទាំងប្រកាសថា នាងជាអ្នកឃោសនាប្រឆាំងលើការគំរាមតាមប្រព័ន្ធអនឡាញ ។
ម៉ូនីកា ឡេវិនស្គី បានថ្លែងថា «នាងខ្ញុំជាបុគ្គលដំបូងដែលរងការបំផ្លាញកេរ្តិ៍ឈ្មោះពីអ្នកប្រើប្រព័ន្ធអីុនធើរណេតនៅទូទាំងពិភពលោក។ នាងខ្ញុំជាអ្នកជំងឺដំបូង (Patient Zero) ដោយក្នុងសម័យនោះមិនទាន់មានហ្វេសប៊ុក និងគេហទំព័រផ្ទាល់ខ្លួន ប៉ុន្តែមានប្រព័ន្ធវេបសាយ ដើម្បីឱ្យពលរដ្ឋបានបង្ហាញពីការយល់ឃើញ ឬបានផ្ញើអីុម៉េលដោយបាតុភូតទាំងនេះត្រូវបញ្ជូនបន្តតាមប្រព័ន្ធអីុនធើរណេត និងតភ្ជាប់តាមទូរស័ព្ទរហូតបង្កឱ្យកើតការរាតត្បាតនៅក្នុងសង្គម» ។
ដោយសារអាម៉ាស់រឿងនោះ ម៉ូនីកា ឡេវិនស្គី អះអាងថា នាងតប់ប្រមល់ក្នុងចិត្ត និងចង់ «សម្លាប់ខ្លួន» ជាច្រើនលើក ។ មានថ្ងៃមួយនាងបានអង្គុយនៅមុខអេក្រង់កុំព្យូទ័រ និងស្រែកថា «ព្រះអើយ!មិនគួរឱ្យជឿសោះដែលពួកគេនិយាយបែបនោះ គឺគ្មានអ្វីពាក់ព័ន្ធសោះ» ។នាងម៉ូនីកា ឡេវិនស្គី បញ្ជាក់ថា នាងបានទទួលកម្លាំងចិត្តក្រោកឡើងតស៊ូពីការគំរាមតាមប្រព័ន្ធអនឡាញ ក្រោយពីលេចឮដំណឹងនៃការធ្វើអត្តឃាតរបស់និស្សិតប្រុសឆ្នាំទី១ អាយុ១៩ឆ្នាំម្នាក់(អ្នកស្រលាញ់ភេទដូចគ្នា) នៅរដ្ឋញូវចឺស៊ី ព្រោះតែខ្មាសអៀនដែលគេលួចថតវីដេអូឃ្លីប ខណៈពេលកំពុង «ថើប» មិត្តប្រុសរបស់ខ្លួន ។
ម៉ូនីកា ឡេវិនស្គី និយាយថា «ហេតុការណ៍ទាំងនេះ ខ្លួនខ្ញុំផ្ទាល់បានឆ្លងកាត់រួចមកហើយ។ អ្វីដែលខ្ញុំចង់ប្រតិបត្តិបន្តទៀត គឺជួយជនរងគ្រោះដទៃទៀតដែលរងការខ្មាសអៀនឱ្យមានជីវិតរស់នៅបន្ត ។ នាងខ្ញុំបានប្រើទុក្ខវេទនាដែលធ្លាប់ទទួលកន្លងមក ឱ្យក្លាយជាប្រយោជន៍ដល់ខ្លួនឯង និងធ្វើឱ្យអតីតកាលកាន់តែមានន័យ» ។ កាលពីដើមឆ្នាំកន្លងមក ម៉ូនីកា ឡេវិនស្គី បានផ្តល់បទសម្ភាសន៍តាមទស្សនាវដ្តី «VANITY FAIR» ទាក់ទិននឹងសម្ព័ន្ធភាពដ៏ជ្រាលជ្រៅរវាងនាងជាមួយលោកប៊ីល គ្លីនតុន ដោយបញ្ជាក់ថា «ខ្ញុំតាំងចិត្តធ្វើឱ្យរឿងនេះចប់ ។ ខ្ញុំសម្រេចចិត្តថា នឹងបង្ហាញមុខនៅលើវេទិកានានាដើម្បីមានឱកាសបាននិយាយ និងធ្វើឱ្យអតីតកាលរបស់ខ្ញុំមានន័យ» ។
ស្នេហាលួចលាក់នោះធ្វើឱ្យលោកប្រធានាធិបតីប៊ីល គ្លីនតុន ត្រូវសភាអាមេរិកបណ្តេញចេញពីតំណែងនៅក្នុងខែធ្នូ ១៩៩៨ ប៉ុន្តែក្រោយមកព្រឹទ្ធសភា មានមតិយល់ស្របថា លោកគ្មានកំហុស ។ ចំណែកលោកស្រី ហីុលឡារី គ្លីនតុន អតីតរដ្ឋមន្ត្រីក្រសួងការបរទេសសហរដ្ឋអាមេរិក រំពឹងទុកថា នឹងប្រជែងយកតំណែងប្រធានាធិបតីអាមេរិកជាថ្មីនៅក្នុងឆ្នាំ២០១៦ ដោយបញ្ជាក់ថា លោកស្រីបាន «ដើរឆ្លង» រឿងអាស្រូវរបស់ប្តីអស់រយៈពេលជាយូរមកហើយ ៕
ចែករំលែកព័តមាននេះ