ពួកអ្នកជំនាញការវាយតម្លៃថា កងទ័ពស៊ីរីរយៈពេល៣ឆ្នាំកន្លងនៃសង្គ្រាម បានបាត់បង់ទាហានដល់ទៅជិតពាក់កណ្តាល ក្នុងការតស៊ូប្រឆាំងការបះបោរ ឬឧទ្ទាមកម្ម ក៏ប៉ុន្តែការបាត់បង់ទាហានយ៉ាងច្រើន អាចឱ្យកងទ័ពនោះក្លាយជា កងទ័ពចល័តកាន់តែរហ័សនិងកាន់តែមានប្រសិទ្ធភាព ។
ពួកអ្នកជំនាញការវាយតម្លៃថា កងទ័ពស៊ីរីរយៈពេល៣ឆ្នាំកន្លងនៃសង្គ្រាម បានបាត់បង់ទាហានដល់ទៅជិតពាក់កណ្តាល ក្នុងការតស៊ូប្រឆាំងការបះបោរ ឬឧទ្ទាមកម្ម ក៏ប៉ុន្តែការបាត់បង់ទាហានយ៉ាងច្រើន អាចឱ្យកងទ័ពនោះក្លាយជា កងទ័ពចល័តកាន់តែរហ័សនិងកាន់តែមានប្រសិទ្ធភាព ។
ទទួលរងការបាត់បង់ធ្ងន់បំផុតពេលចាប់ផ្តើមការបះបោរដោយអាវុធ គឺស្ទើរសន្លប់ស្តូក (KO) ខាងបច្ចេកទេស កងទ័ពស៊ីរីដែលកសាងតាមបែបរុស្ស៊ី ពេលនេះបានប្រែក្លាយទៅជាកងកម្លាំងប្រឆាំងការបះបោរមួយ ។ ដោយសារការជួយទ្រទ្រង់របស់រុស្ស៊ី និងអុីរ៉ង់ ហើយទទួលបានបទពិសោធន៍នានាខាងសង្គ្រាមទ័ពព្រៃពីសម្ព័ន្ធមិត្តស៊ីអុីត លីបង់ នៃក្រុមហេសប៊ុលឡាហ៍ កងទ័ពស៊ីរីអាចវាយដណ្តើមកាន់កាប់វិញនូវដែនដីមួយចំនួនដែលបាត់បង់ ។
លោក Aram Neguizlan អ្នកជំនាញការខាងយោធានៃមជ្ឈមណ្ឌលសិក្សាអន្តរជាតិ និងយុទ្ធសាស្ត្រ CSIS មានមូលដ្ឋាននៅក្រុងវ៉ាសុីនតោនអះអាងថា កងទ័ពស៊ីរីបាត់បង់ទាហានដល់ទៅពាក់កណ្តាលចាប់តាំងពីខែមីនា ឆ្នាំ២០១១ មក ។ លោកគូសបញ្ជាក់ប្រាប់ AFP ថា ការរត់ចោលជួរ និងការស្លាប់របស់កងទាហាន ធ្វើឱ្យចំនួនកងទ័ពស៊ីរីដែលកាលពីឆ្នាំ២០១១ មានដល់ទៅ៣២៥.០០០នាក់ មកនៅត្រឹម២៩៥.០០០នាក់ក្នុងឆ្នាំ២០១២ និងមកនៅត្រឹមប្រមាណ១៧៨.០០០នាក់ក្នុងឆ្នាំ២០១៣និង២០១៤ ។
លោកបន្តថា ប៉ុន្តែកងទាហានស៊ីរីពី១០០.០០០ទៅ១៥០.០០នាក់ ដែលធ្វើប្រតិបត្តិការនៅលើទីលានប្រយុទ្ធចាប់តាំងពី២ឆ្នាំមកនេះ ចេះសម្របខ្លួនទៅនឹងសង្គ្រាមទ័ពព្រៃ រហូតក្លាយជាកងកម្លាំងមួយដែលសកម្មប្រយុទ្ធបំផុតប្រសើរជាងទាហាន៣០០.០០០នាក់ ដែលពុំធ្លាប់ធ្វើអ្វីសោះចាប់តាំងពី៣០ឆ្នាំមកហើយ ។
បន្ទាប់ពីរយៈពេលជាច្រើនឆ្នាំមានភាពអសកម្ម ពេលនេះកងទ័ពស៊ីរីអាចប្រឈមមុខទល់នឹងពួកបះបោរក្រុមផ្សេងៗតាំងពីពួកបះបោរនិយមកណ្តាល គឺកងទ័ពស៊ីរីសេរី រហូតដល់ក្រុមអ៊ិស្លាមនិយមនៃរណសិរ្សអ៊ិស្លាម ពួកជីហាដនៃក្រុមរណសិរ្សអាល់នូស្ត្រា និងពួករ៉ាឌីកាល់ជ្រុលនៃក្រុមរដ្ឋអ៊ិស្លាម ។
យោងតាមអង្គការសិទ្ធិមនុស្សស៊ីរី OSDH ថា មនុស្សជាង១៩០.០០០នាក់ បានត្រូវស្លាប់តាំងពីចាប់ផ្តើមជម្លោះមក ក្នុងនោះមានទាហាន៤០.០០០នកា់ និងពួកជីវពលស្និទ្ធរបបស៊ីរី២៧.០០០នាក់ ព្រមទាំងពួកឧទ្ទាមនិងពួកជីហាដ៥៥.០០០នាក់ ។ អង្គការនេះយល់ថា តាមការពិតចំនួនអ្នកស្លាប់មានលើសពីនេះទៅទៀត ។
ទោះបីរងការបាត់បង់ធ្ងន់ធ្ងរ រហូតមកទល់ពេលនេះកងទ័ពស៊ីរីបើកធ្វើយុទ្ធនាការជ្រើសរើសកងទ័ព ដោយពឹងផ្អែកលើការចូលបម្រើទ័ពជាកាតព្វកិច្ចរបស់មនុស្សដែលមានអាយុចាប់ពិ១៩ឆ្នាំ ដល់៥០ឆ្នាំ រយៈពេល១៨ខែ ។កាលពីសប្តាហ៍មុនជារឿងពុំធ្លាប់មាន គណៈកម្មាធិការកណ្តាលបង្រួបបង្រួមប្រជាជនបានអំពាវនាវឱ្យមានការកេណ្ឌប្រមូលទ័ពជាទូទៅ ដោយស្នើដល់ប្រជាជនមានអាយុចន្លោះពី១៨ទៅ៥០ឆ្នាំ ឱ្យចូលបម្រើកងទ័ព ។
ក្នុងបណ្តាខែដំបូងនៃជម្លោះ កងទ័ពស៊ីរីបាត់បង់ការត្រួតត្រាដែនដីយ៉ាងធំ តែកងទ័ពនោះអាចវាយដណ្តើមយកវិញបានមួយផ្នែកកាលពីឆ្នាំទៅមិញ ពិសេសជុំវិញទីក្រុងដាម៉ាស់ និងទីក្រុងហូម ។ ការដណ្តើមបានជ័យជម្នះ ដោយសារសមត្ថភាពសម្របបាននឹងសង្គ្រាមបែបក្លាសុិក កំណត់តាមរយៈការទម្លាក់គ្រាប់បែក ឬការបាញ់ផ្លោងយ៉ាងខ្លាំង និងការសម្របបានជាមួយសង្គ្រាមក្នុងទីក្រុង ដែលពួកហេសប៊ុលឡាហ៍មានជំនាញបែបនោះ ផ្តល់បណ្តាបទពិសោធន៍ ។
លោក Neguizlan និយាយទៀតថា បណ្តាកងវរសេនាតូចរបស់កងទ័ពជើងគោកស៊ីរី ត្រូវបំបែកជាកងឯកភាពតូចៗងាយចល័ត ។ បណ្តាមេបញ្ជាការចំណាស់ៗដែលពុំមានប្រសិទ្ធភាពក្នុងការងារត្រូវដកចេញ ហើយបញ្ចូលបណ្តានាយទាហានវ័យក្មេងៗឱ្យទទួលខុសត្រូវលើបណ្តាប្រតិបត្តិការយោធា ។ វរសេនីយ៍ឯកជំនាន់ថ្មីម្នាក់ឈ្មោះ Souhail Al-Hassan មានរហស្សនាមថា «ខ្លា» ត្រូវបានគេឱ្យដឹងនាំកងទ័ពចំនួន៤.០០០នាក់ ធ្វើប្រតិបត្តិការយ៉ាងប្តូរផ្តាច់មួយ វាយបើកផ្លូវថ្នល់ទៅកាន់ក្រុងអាឡែប ដែលធ្លាក់ក្នុងការកាន់កាប់របស់ពួកឧទ្ទាម ហើយវាយដណ្តើមយកក្រុងធំទី២នោះ មកវិញ ។
ពួកឧទ្ទាមត្រួតត្រាដែនដីភាគច្រើននៃខេត្ត Idleb ពាក់កណ្តាលនៃក្រុងអាឡែប និងស្ទើរទាំងស្រុងនៃខេត្តមានឈ្មោះដូចគ្នានេះ មួយផ្នែកនៃជាយក្រុងដាម៉ាស់ និងក្រុងដីរ៉ាអា ។ ចំណែកពួករដ្ឋអ៊ិស្លាមវិញ កាន់កាប់ខេត្តរ៉ាកា ភាគខាងជើងស៊ីរី ព្រមទាំងមួយផ្នែកធំនៃខេត្តសំបូរប្រេងកាត Deir Ezzor ភាគខាងកើតប្រទេស ។ ក្នុងរយៈពេលឆាប់់ ឬរយៈពេលយូរមធ្យមមើលទៅលោកប្រធានាធិបតី បាចា អាល់អាសាដ ពុំទាន់អាចកម្ទេចការបះបោរ ហើយដណ្តើមយកបណ្តាដែនដីដែលពួកឧទ្ទាមកាន់កាប់បានវិញឡើយ ។ លោក Stephen Biddle អ្នកជំនាញការនៅក្នុងក្រុមប្រឹក្សាទំនាក់ទំនងអន្តរជាតិរបស់អាមេរិកព្យាករណ៍ថា សង្គ្រាមនៅស៊ីរីនឹងជាសង្គ្រាមរយៈពេលយ៉ាងយូរមួយ ព្រោះជម្លោះបែបនេះពុំងាយបញ្ចប់ ហើយអាចមានរយៈពេលយ៉ាងតិចពី៧ទៅ១០ឆ្នាំ ឬអាចមួយជំនាន់មនុស្សទៀតផង ៕
ចែករំលែកព័តមាននេះ