រាជធានីភ្នំពេញ ៖ ផ្លូវមួយខ្សែជាប់ផ្សារធំទួលសង្កែ ហៅផ្សារសាំហាន់ ស្ថិតនៅភូមិទួលសង្កែ សង្កាត់ទួលសង្កែ ខណ្ឌឫស្សីកែវ ត្រូវបានអាជីវករនាំគ្នាលក់ដូរបិទផ្លូវបង្កឱ្យកកស្ទះចរាចរជារៀងរាលថ្ងៃធ្វើឱ្យប្រជាពលរដ្ឋក៏ដូចជាម្ចាស់រោងចក្រកាត់ដេរមានការថ្នាំងថ្នាក់យ៉ាងខ្លាំងហើយទទូចសុំឱ្យអាជ្ញាធរសង្កាត់ ខណ្ឌជួយអន្តរាគមន៍បើកផ្លូវនេះឡើងវិញផង។
រាជធានីភ្នំពេញ ៖ ផ្លូវមួយខ្សែជាប់ផ្សារធំទួលសង្កែ ហៅផ្សារសាំហាន់ ស្ថិតនៅភូមិទួលសង្កែ សង្កាត់ទួលសង្កែ ខណ្ឌឫស្សីកែវ ត្រូវបានអាជីវករនាំគ្នាលក់ដូរបិទផ្លូវបង្កឱ្យកកស្ទះចរាចរជារៀងរាលថ្ងៃធ្វើឱ្យប្រជាពលរដ្ឋក៏ដូចជាម្ចាស់រោងចក្រកាត់ដេរមានការថ្នាំងថ្នាក់យ៉ាងខ្លាំងហើយទទូចសុំឱ្យអាជ្ញាធរសង្កាត់ ខណ្ឌជួយអន្តរាគមន៍បើកផ្លូវនេះឡើងវិញផង។
តាមប្រជាពលរដ្ឋឱ្យដឹងថា កំណាត់ផ្លូវនៅជាប់ផ្សារធំទួលសង្កែផ្នែកខាងលិចនេះ ត្រូវបានអាជីវករធ្វើរោងនិងដាក់តាំងទំនិញលក់ដូរ ហើយហៀរបិទជិតផ្លូវស្ទើរតែទាំងស្រុងតាំងពីព្រឹករហូតដល់យប់ ជាហេតុធ្វើឱ្យអ្នកដំណើរជាពិសេសអ្នកដែលមានលំនៅក្បែរនោះមានការលំបាកចេញចូលជាខ្លាំង ព្រោះតែការយកទ្រូងផ្លូវធ្វើអាជីវកម្ម។
ទន្ទឹមការយកចិញ្ចើម និងដងផ្លូវធ្វើអាជីវកម្មនេះត្រូវបានគេចោទប្រកាន់ថា អាជ្ញាធរសង្កាត់គឺលោកចៅសង្កាត់រង២នាក់ វាស់វែងចិញ្ចើមផ្លូវឱ្យអាជីវករលក់ដូរជាថ្នូរនឹងប្រាក់ទើបជាហេតុឱ្យអាជីវករលក់ដូរលើដងផ្លូវបែបនេះ ហើយសូម្បីតែលោកចៅសង្កាត់ទួលសង្កែក៏បានដឹងដែរតែនិយាយមិនចេញ។ ប្រជាពលរដ្ឋក៏បានសំណូមពរដល់លោកអភិបាលខណ្ឌឫស្សីកែវ មេត្ដាពិនិត្យ និងរៀបចំសណ្ដាប់ធ្នាប់និងជួយរុះរើរោងលក់ដូរលើចិញ្ចើមផ្លូវចេញពីលើដងផ្លូវ ដើម្បីឱ្យអ្នកដំណើរចេញចូលផង។
គួរបញ្ជាក់ថា កំណាត់ផ្លូវនេះត្រូវបានគេធ្វើរោងលក់ដូរជាយូរឆ្នាំមកហើយ ដែលកាលពីលោក ឃ្លាំង ហួត នៅជាអភិបាលខណ្ឌ បានចុះទៅរុះរើតូច និងរោងលក់ដូរទាំងនេះម្តងមកហើយ តែក្រោយមកត្រូវបានអាជ្ញាធរមូលដ្ឋាន ជាអ្នកអនុញ្ញាតនិងបណ្តែតបណ្តោយឱ្យអាជីវករលក់ដូរឡើងវិញជាហេតុធ្វើឱ្យបិទផ្លូវតែម្តង៕
ចែករំលែកព័តមាននេះ