រាជធានីភ្នំពេញ ៖ ក្រសួងអប់រំយុវជន និងកីឡា សហការជាមួយសហព័ន្ធកីឡាទ្រីយ៉ាត្លុងកម្ពុជា នឹងរៀបចំកម្មវិធីប្រកួតកីឡាអាគ័រត្លុងជ្រើសរើសជើងឯកប្រចាំឆ្នាំ២០១៤ នាថ្ងៃទី២៤ តុលា ស្អែកនេះហើយ ដើម្បីពង្រឹងសមត្ថភាពកីឡាករ-កីឡាការិនីរបស់សហព័ន្ធកីឡាទ្រីយ៉ាត្លុង ឱ្យមានការរីកចម្រើនថែមមួយកម្រិតទៀត មុនចូលរួមប្រកួតព្រឹត្តិការណ៍កីឡាស៊ីហ្គេមនៅប្រទេសសិង្ហបុរី នាឆ្នាំ២០១៥ខាងមុខនេះ ។
ការប្រកួតធ្វើឡើងរយៈពេល៣ថ្ងៃ ចាប់ពីថ្ងៃទី២៤ដល់២៦ ខែតុលា ឆ្នាំ២០១៤ វេលាម៉ោង៧ព្រឹក នៅអាងហែលទឹក និងបរិវេណនៃពហុកីឡដ្ឋានជាតិ ដោយមានកីឡាករ-កីឡាការិនីជាង១០០នាក់ចូលរួមប្រកួត ។ អគ្គលេខាធិការនៃសហព័ន្ធកីឡាទ្រីយ៉ាត្លុងកម្ពុជាលោក ងិន សុខបញ្ញា បានឱ្យដឹងថា នេះជាលើកទី២ហើយ ដែលក្រសួងអប់រំយុវជន និងកីឡាសហការជាមួយសហព័ន្ធកីឡាទ្រីយា៉ត្លុងកម្ពុជា រៀបចំព្រឹត្តិការណ៍នេះឡើងដើម្បីស្វែងរកអ្នកដែលមានទេពកោសល្យ និងសមត្ថភាពពិតប្រាកដដែលអាចក្លាយជាជើងខ្លាំងប្រចាំព្រឹត្តិការណ៍ និងជាឱកាសឱ្យយើងរកឃើញនូវថ្នាលជំនាន់ក្រោយសម្រាប់ប្រភេទកីឡាដែលមានប្រជាប្រិយនេះ ។
លោកអគ្គលេខាសហព័ន្ធកីឡាទ្រីយ៉ាត្លុងកម្ពុជារូបនេះ បានបន្ថែមទៀតថា ប្រភេទកីឡាមួយនេះគឺមានការពេញនិយមយ៉ាងខ្លាំងក្នុងប្រទេសកម្ពុជា បើទោះជាទើបនឹងចាប់ផ្តើមរយៈពេលខ្លីក៏ដោយ ជាពិសេសក៏មានការចូលចិត្តលេងពីសំណាក់ភ្ញៀវបរទេសទៀតផង ។ ប្រភេទកីឡាអាគ័រត្លុង (ហែលទឹក+រត់ប្រណាំង) នេះវាស្ថិតនៅក្នុងចំណោមកីឡា២ប្រភេទទៀតដូចជាកីឡាឌូអាត្លុង ដែលមាន២វិញ្ញាសា (រត់ប្រណាំង+ជិះកង់) និងកីឡាទ្រីយ៉ាត្លុងមាន៣វិញ្ញាសា (រត់ប្រណាំង+ជិះកង់+ហែលទឹក) ។
លោកបន្តថា នេះជាជោគជ័យដ៏ធំមួយរបស់សហព័ន្ធកីឡាទ្រីយ៉ាត្លុងកម្ពុជា ដែលត្រូវបានក្រសួងអប់រំយុវជន និងកីឡា បានដាក់វិញ្ញាសាដ៏កំពុងតែពេញនិយមនេះ ចូលទៅក្នុងការប្រកួតជ្រើសរើសជើងឯកប្រចាំឆ្នាំ ។ អ្វីដែលជាចំណុចសំខាន់ និងរឹតតែធ្វើឱ្យយើងខិតខំប្រឹងប្រែងបន្ថែមទៀតនោះ គឺនាឆ្នាំ២០១៥ខាងមុខ ប្រភេទកីឡានេះចាប់ផ្តើមមានវត្តមានជាលើកទី១ក្នុងព្រឹត្តិការណ៍កីឡាស៊ីហ្គេមលើកទី២៨នៅប្រទេសសិង្ហបុរី ។
គួរកត់សម្គាល់ផងដែរថា ចូលមកដល់ក្នុងខែតុលានេះក្រសួងអប់រំយុវជន និងកីឡា មានភាពមមាញឹកជាខ្លាំង ដោយបានរៀបចំព្រឹត្តិការណ៍ប្រកួតជ្រើសរើសជើងឯកលើប្រភេទកីឡាជាច្រើនដូចជា តេក្វាន់ដូ, ល្បុក្កតោ, ប្រដាល់ វាយសី និងកីឡាអាគ័រត្លុងនេះជាដើម ។ ដោយក្នុងនោះប្រភេទកីឡាខ្លះមិនទាន់បានបញ្ចប់ផង កីឡាមួយប្រភេទទៀតក៏ចាប់ផ្តើមបើកការប្រកួតជ្រើសរើសជើងខ្លាំងប្រចាំប្រភេទកីឡារបស់ខ្លួនតែម្តង ។ សូមបញ្ជាក់ថា វិញ្ញាសានៃការប្រកួតចែកចេញជា៣គឺ៖ ១-វិញ្ញាសាអាគ័រត្លុងប្រភេទអាយុក្រោម១៨ឆ្នាំ (បុរស-នារី) ៈ អត្តពលិកត្រូវហែលទឹកចម្ងាយ១៥០ម៉ែត្រ និងរត់ចម្ងាយ២.៦០០ម៉ែត្រ ។ ២-វិញ្ញាសាអាគ័រត្លុងប្រភេទអាយុ១៨ឆ្នាំឡើង (បុរស) ៈ អត្តពលិកត្រូវហែលទឹកចម្ងាយ២៥០ម៉ែត្រ និងរត់ចម្ងាយ៤.០០០ម៉ែត្រ និង៣-វិញ្ញាសាអាគ័រត្លុង មិនកំណត់អាយុ (បុរស) ៈ អត្តពលិកត្រូវហែលទឹកចម្ងាយ៧៥០ម៉ែត្រ និងរត់ចម្ងាយ៥.០០០ម៉ែត្រ ៕
ចែករំលែកព័តមាននេះ