រាជធានីភ្នំពេញ ៖ គ្មានអ្នកណាមិនដឹងនោះទេថា ភរិយារបស់លោក អេ ភូថង និងលោក អេ ភូថង ផ្ទាល់បានប្រកាសឲ្យកូនស្រីរបស់ខ្លួន គឺ អេ យ៉ានុត ឈប់ប្រដាល់ ។ ប៉ុន្តែផ្ទុយពីជំហរនេះ អ្នកស្រីបានស្នើឲ្យមានការលើកស្ទួយដល់នារីដែលចង់ប្រដាល់ និងទទូចឲ្យយុវតីដែលមានចំណូលចិត្តចូលហ្វឹកហាត់ ក្លាហានហ៊ានបង្ហាញសមត្ថភាពទៅវិញ ។
រាជធានីភ្នំពេញ ៖ គ្មានអ្នកណាមិនដឹងនោះទេថា ភរិយារបស់លោក អេ ភូថង និងលោក អេ ភូថង ផ្ទាល់បានប្រកាសឲ្យកូនស្រីរបស់ខ្លួន គឺ អេ យ៉ានុត ឈប់ប្រដាល់ ។ ប៉ុន្តែផ្ទុយពីជំហរនេះ អ្នកស្រីបានស្នើឲ្យមានការលើកស្ទួយដល់នារីដែលចង់ប្រដាល់ និងទទូចឲ្យយុវតីដែលមានចំណូលចិត្តចូលហ្វឹកហាត់ ក្លាហានហ៊ានបង្ហាញសមត្ថភាពទៅវិញ ។
អ្នកស្រី សាំង សុម៉ាលី ភរិយារបស់លោកអេ ភូថង និយាយថា ស្ថានភាពប្រដាល់របស់នារីនាពេលបច្ចុប្បន្ន ធ្វើឲ្យអ្នកស្រីក៏ដូចជាគណៈកម្មការព្រួយបារម្ភកាន់តែខ្លាំង ព្រោះតែគ្មានកីឡាការិនីចូលថ្មី ហើយអ្នកចាស់ចេះតែបន្តលាឈប់ ។ បើទោះជាពេលនេះ កីឡាការិនី សម សំណាង បានសម្រេចចិត្តវិលវិញ ប៉ុន្តែស្ថានភាពប្រដាល់របស់នាង ក៏ប្រហែលមិនអាចរីកចម្រើនបានដែរ ក្នុងពេលដែលនាង ក៏ពិបាកស្វែងរកដៃគូឡើងប្រកួត ដើម្បីទទួលកម្រៃអាចចិញ្ចឹមជីវិតបាននោះ ។ ក្រោយការលាឈប់របស់អ្នកប្រដាល់ផ្នែកនារីប្រមាណជាង១០រូបបន្តបន្ទាប់ អ្នកស្រីប្រាប់ថា ការប្រដាល់របស់នារី គឺស្ទើរតែរកកីឡាការិនីឡើងរេញលែងឃើញ ។
លោក នាង ស៊ីវត្ថា ប្រធានគ្រប់គ្រងកម្មវិធីប្រដាល់ប្រចាំស្ថានីយទូរទស្សន៍បាយ័ននិយាយថា លោកនៅតែមានបំណងលើកស្ទួយការប្រដាល់របស់នារីឲ្យរីកចម្រើនដូចការប្រដាល់របស់បុរស ប៉ុន្តែមកពីកីឡាការិនីខ្លួនឯងមានចំនួនកាន់តែតិច ហើយមិនអាចឲ្យលោកផ្គូផ្គងកីឡាការិនីដដែលៗ ទើបយូរៗម្ដងបានអាចរៀបចំផ្គូផ្គង ។ យ៉ាងណាក៏ដោយ លោកនៅតែបានរំលេចឲ្យមានការប្រកួតដណ្ដើមពានរវាងនារីនិងនារី ដើម្បីលើកទឹកចិត្តដល់អ្នកសេសសល់ ឲ្យមានកម្លាំងចិត្តក្នុងអាជីពម្ដងម្កាល បើទោះមិនអាចញឹកញាប់ ។ លោកទទួលស្គាល់ថា ស្ថានភាពលាឈប់របស់កីឡាការិនីនឹងធ្វើឲ្យការប្រដាល់ផ្នែកនារីចុះខ្សោយ ប៉ុន្តែលោកមិនជឿថា អាជីពនេះនឹងត្រូវស្លាប់នោះទេ ដរាបណាលោកក៏នៅតែមានផែនការលើកស្ទួយ ឯនារីដែលនៅបន្ត ក៏មានឆន្ទៈឡើងរេញ ។ លោកធ្លាប់ទទូចឲ្យគ្រូបង្វឹក បំប៉ន ថែទាំកីឡាការិនីរបស់ខ្លួន និងប្រមូលអ្នកថ្មីបន្ថែមឲ្យបានច្រើនប៉ុន្តែអាចមកពីបរិបទក្នុងសង្គមកម្ពុជា មិនទាន់ឲ្យតម្លៃលើនារីដែលចូលប្រដាល់ ទើបកើតជាបញ្ហា ។
អ្នកស្រីសាំង សុម៉ាលី បញ្ជាក់ថា នៅក្នុងក្លិបអេភូថងកីឡា ស្ទើរតែអស់កីឡាការិនីទៅហើយ បន្ទាប់ពីកីឡាការិនី វី អុិច និង អេ យ៉ានុត ជាកូនស្រីលាឈប់ ខណៈកីឡាការិនី សម ថារ័ត្ន ដែលទើបកសាងកេរ្តិ៍ឈ្មោះ ក៏ចង់សម្រាក។ អ្នកស្រីទទូចឲ្យមានសិស្សស្រីមកហ្វឹកហាត់ច្រើនលើកមកហើយ ប៉ុន្តែលទ្ធផលនៅតែមិនអាចទាក់ទាញពួកនាងបានច្រើនដដែល ទើបអ្នកស្រីនៅតែយល់ថា បើគ្មានការចូលរួមពីនារីក្មេងៗជំនាន់ក្រោយ គឺពិតជាធ្វើឲ្យអាជីពប្រដាល់របស់នារីបាត់ឈ្មោះ ។
ទោះបីយ៉ាងណា អ្នកស្រីនៅតែមានសង្ឃឹមថា អាជីពនេះនឹងរស់រវើកឡើងវិញ បន្ទាប់ពីផ្នត់គំនិតរបស់មហាជនខ្មែរ កាត់បន្ថយការរើសអើងចំពោះនារីវ័យក្មេង ដែលចូលប្រឡូកការប្រដាល់ខុសប្លែកពីមុនផងដែរ ។
អ្នកស្រីនិយាយថា ការប្រដាល់របស់នារីវាមិនមានគ្រោះថ្នាក់នោះទេ ព្រោះនារីប្រដាល់មិនមានកម្លាំងដៃ ឬកម្លាំងជើងបង្កឲ្យមានបញ្ហាធ្ងន់ធ្ងរនោះទេ សំខាន់ឲ្យតែចេះស្នៀតការពារ និងទប់ទល់ដៃគូពីការវាយលុកចំកន្លែងគ្រោះថ្នាក់ក្នុងពេលប្រកួតបានហើយ ។ អ្នកស្រីស្នើឲ្យនារីដែលស្រឡាញ់ការប្រដាល់ បង្ហាញជំហរចូលហ្វឹកហាត់ ហើយឡើងរេញកុំខ្លាចដើម្បីលើកស្ទួយក្នុងអាជីពនេះ ។ អ្នកស្រីបង្ហាញអារម្មណ៍សោកស្ដាយយ៉ាងខ្លាំងដែល អេ យ៉ានុត កូនស្រីត្រូវបានស្វាមីសម្រេចឲ្យឈប់។ អ្នកស្រីប្រាប់ថា មិនចង់ឲ្យ អេ យ៉ានុតឈប់ប្រដាល់ទេ ព្រោះមើលឃើញថា នោះជាអាជីពមិនពិបាករកលុយ ហើយក៏មិនមែនវ៉ៃគ្នាដល់ថ្នាក់បែកមុខ បែកមាត់ដូចកម្លាំងដៃបុរស ប៉ុន្តែមកពីមិនចង់ប្រឆាំងសម្ពាធពីចាស់ទុំ ក៏ដូចជាការរិះគន់ថា ខ្លួនមានកូនស្រីតែម្នាក់ ហើយចិញ្ចឹមកូនស្រីមិនបានល្អ ទើបព្រមឲ្យឈប់ ។ អ្នកស្រីសម្ដែងការព្រួយបារម្ភ ប្រសិនបើផ្នត់គំនិតរបស់សង្គមគ្រួសារខ្មែរ នៅតែរាំងស្ទះភាពក្លាហានរបស់នារីនៅក្នុងវិស័យប្រដាល់ ៕
ចែករំលែកព័តមាននេះ