រាជធានីភ្នំពេញ ៖ ការប្រកួតប្រដាល់ក្នុងកម្មវិធីកំពូលអ្នកប្រយុទ្ធគុនខ្មែរវគ្គ៣ នៅលើសង្វៀន CTN នាថ្ងៃអាទិត្យ ទី២៦ តុលា សប្តាហ៍នេះមានទាំងអស់៤គូ និង៣ប្រភេទទម្ងន់ ក្នុងនោះទម្ងន់៦៥គីឡូក្រាមមាន២គូ ទម្ងន់៦០គីឡូក្រាមមាន១គូ និងទម្ងន់៥៧គីឡូក្រាមមាន១គូ ។ ការប្រកួតនៅក្នុងសប្តាហ៍នេះ គូខ្លះធ្វើឡើងបង្គ្រប់កិច្ច ឯគូខ្លះទៀតធ្វើឡើងដើម្បីប្រជែងយកតំណែងលេខ១ ក្នុងប្រភេទទម្ងន់របស់ខ្លួនបុ៉ណ្ណោះដោយសារកីឡាករដែលជាបេក្ខភាពឡើងទៅប្រកួតនៅវគ្គបន្ត គេរកឃើញអស់ហើយ ។
ការប្រកួតក្នុងប្រភេទទម្ងន់៦៥គីឡូក្រាមដែលមាន២គូនោះតម្រូវទៅលើកីឡាករថៃ រិទ្ធី មកពីក្លិបនាគរាជគុនខ្មែរ ប្រកួតជាមួយកីឡាករយុ៉ន សំអាត មកពីក្លិបសំរោងកោងកីឡា ខេត្តបាត់ដំបង និងកីឡាករវុ៉ន ម៉ន មកពីក្លិបខេត្តព្រះវិហារ ប្រកួតជាមួយកីឡាកររ៉ាក់ វិឆ័យ មកពីក្លិបកងពលតូចលេខ៧០ ។ សម្រាប់ការប្រកួតក្នុងប្រភេទទម្ងន់៦៥គីឡូក្រាមមកដល់ពេលនេះ គេបានរកឃើញបេក្ខភាពឡើងទៅប្រកួតនៅវគ្គពាក់កណ្តាលផ្តាច់ព្រ័ត្រអស់ហើយ នោះគឺថៃ រិទ្ធី, រ៉ាក់ វិឆ័យ, ហ៊ុន គិរី (ក្លិបតាព្រហ្មមានជ័យបង្ក្រាបគ្រឿងញៀន) និងរិន សារដ្ឋ (ក្លិបខេត្តព្រៃវែង) ។ ដូច្នេះ យុ៉ន សំអាត និងវុ៉ន ម៉ន ដែលជាគូប្រកួតរបស់ពួកគេត្រូវធ្លាក់ដោយស្វ័យប្រវត្តិ ទោះប្រកួតឈ្នះលើកនេះក្តី ។
ការប្រកួតក្នុងប្រភេទទម្ងន់៦០គីឡូក្រាមតម្រូវទៅលើកីឡាករព្រីង ដារិន មកពីក្លិបខេត្តបាត់ដំបង ប្រកួតជាមួយកីឡាសុខ វាសនា មកពីក្លិបឃ្លាំងមឿងកីឡា ។ ព្រីង ដារិន ក្លាយជាបេក្ខភាព១រូបដែលមានសំណាងបានឡើងទៅប្រកួតនៅវគ្គពាក់កណ្តាលផ្តាច់ព្រ័ត្រជាមួយកីឡាករ៣រូបទៀត គឺចាន់ សំអាត មកពីក្លិបខេត្តព្រះវិហារ, ឈាន ហំ មកពីសមាគមកីឡាប្រដាល់ក្រសួងការពារជាតិ និងថៃ ប៊ុនតត មកពីក្លិបនាគរាជគុនខ្មែរ ។ ដូច្នេះ សុខ វាសនា ដែលជាគូប្រកួតរបស់គេ ក៏បានជ្រុះចេញត្រឹមវគ្គនេះដោយស្វ័យប្រវត្តិដែរ បើទោះជាប្រកួតឈ្នះលើកនេះក្តី ។
ចំណែកការប្រកួតក្នុងប្រភេតទម្ងន់៥៧គីឡូក្រាមដែលជាការជួបគ្នារវាងកីឡាករឡុង ប៊ុនយីម មកពីក្លិបសាលវ័ន្តកីឡា និងកីឡាករមុ៉ន រតនា មកពីក្លិបឃ្លាំងមឿងកីឡានោះ គឺធ្វើឡើងដើម្បីដណ្តើមតំណែងលេខ១ ក្នុងប្រភេទទម្ងន់របស់ពួកគេបុ៉ណ្ណោះ ។ កីឡាករទាំង២រូបបានក្លាយជាបេក្ខភាពឡើងទៅប្រកួតនៅវគ្គពាក់កណ្តាលផ្តាច់ព្រ័ត្រជាមួយកីឡាករ២រូបទៀត គឺស៊ឹម ប៊ុនស្រ៊ន់ មកពីក្លិបខេត្តកំពង់ចាម និងខុនបូឡា មកពីក្លិបកងពលធំអន្តរាគមន៍លេខ៣ ព្រះវិហារ ៕
ចែករំលែកព័តមាននេះ