រាជធានីភ្នំពេញ ៖ ផលិតកម្មសាន់ដេរ បានប្រមូលតារាសម្តែង តារាចម្រៀងល្បីៗប្រចាំផលិតកម្មរបស់ខ្លួនជាច្រើននាក់ មកផ្តុំគ្នាថតចម្រៀង MV ដើម្បីអបអរឱកាសបុណ្យអុំទូកខាងមុខនេះ បន្ទាប់ពីពិធីបុណ្យជាតិធំនេះ អាក់ខានចំនួន៣ឆ្នាំមកហើយនោះ។ ពិធីថតខារ៉ាអូខេរបស់ផលិតកម្មសាន់ដេ នេះ បានប្រារព្ធធ្វើឡើងកាលពីថ្ងៃទី២១ តុលា ២០១៤ រៀបចំថតទុកក្នុងបរិវេណស្ថានីយទូរទស្សន៍ប៉ុស្តិ៍លេខ៣ រាជធានីភ្នំពេញ ។
នាឱកាសថតខារ៉ាអូខេអបអរពិធីបុណ្យអុំទូក កាលពីពេលថ្មីៗនេះ មានការសម្គាល់ឃើញថា ឆ្នាំនេះផលិតកម្មសាន់ដេ ហាក់ប្រមូលសុទ្ធតែតារាសម្តែងដែលមានកេរ្តិ៍ឈ្មោះមកចូលរួមសម្តែងអមជាមួយតារាចម្រៀងប្រចាំសាន់ដេ ធ្វើឲ្យមហាជនគិតថា ឆ្នាំនេះពេលសាន់ដេ ចេញលក់ចម្រៀងអុំទូកច្បាស់ជាកក្រើក ព្រោះនាំមកសុទ្ធតែតារាៗល្បីល្បាញលើអាជីពសិល្បៈទាំងស្រី ទាំងប្រុសផ្តុំគ្នាបង្អូតសម្រស់យ៉ាងរីករាយ ។ លើសពីនេះទៅទៀត សិល្បករដែលបានបង្ហាញវត្តមានសម្រាប់ការថតចម្រៀងនេះម្នាក់ៗសុទ្ធតែពាំនាំនូវសម្លៀកបំពាក់ប្លែកៗដែលឆ្លុះបញ្ចាំងពីប្រពៃណី ទំនៀមទម្លាប់ប្រកបដោយរូបសម្រស់គួរឲ្យគយគន់នៅលើវេទិកាជាមួយនឹងកាយវិការរាំតាមចង្វាក់ភ្លេងខ្មែរជាមួយបទកន្ទ្រឹម ឡាំឡាវ យ៉ាងរស់រវើកថែមទៀតផង ។
តាមការឲ្យដឹងពីលោកឡាយ សុខចំរើន ជាអ្នកគ្រប់គ្រងប្រចាំផលិតកម្មសាន់ដេ បានឲ្យដឹងថា «ដើម្បីចូលរួមអបអរពិធីបុណ្យអុំទូក សំពះព្រះខែ ដែលឆ្នាំនេះប្រទេសជាតិយើងបានរៀបចំប្រារព្ធឡើងវិញ ក្រោយអាក់ខានចំនួន៣ឆ្នាំមកហើយ នោះ ផលិតកម្មសាន់ដេ បានរៀបចំសម្រិតសម្រាំងនូវបទចម្រៀងបែបប្រពៃណីខ្មែរចំនួនជាច្រើនបទ ដើម្បីចែកជូនប្រិយមិត្ត ទស្សនិកជនដែលគាំទ្រសាន់ដេ តាំងតែពីដើមមក និងសណ្តាប់កម្សាន្តនាថ្ងៃបុណ្យអុំទូកជិតមកដល់ខាងមុខនេះ ។ ក្រៅពីមានបទចម្រៀងថ្មីៗត្រូវចិត្តមហាជន យើងក៏ពាំនាំនូវតារាសម្តែងថ្មីចាស់ រូបសម្រស់ស្រស់សោភាជាច្រើននាក់មក សម្តែងឲ្យផលិតកម្មយើង ដើម្បីឲ្យកាន់តែពិសេសបន្ថែមទៀត ដោយតារាទាំងនោះ មានពាំនាំនូវឈុតសម្លៀកបំពាក់ស្រស់ស្អាតទាំងបុរាណ និងសម័យ ក្នុងន័យលើកតម្កើងវិស័យសិល្បៈឲ្យកាន់តែប្រសើរឡើង ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ