រាជធានីភ្នំពេញ ៖ ម្រេចជាដំណាំមួយប្រភេទទាមទារអាកាសធាតុមានលក្ខណៈអំណោយផលសម្រាប់ការលូតលាស់ ។ ប្រសិនបើអាកាសធាតុប្រែប្រួលដូចជាក្តៅខ្លាំង ធ្លាក់ភ្លៀងខ្លាំង ឬខ្យល់បោកបក់ខ្លាំង ពិតជាធ្វើឱ្យដំណាំនេះប្រឈមនឹងការជ្រុះផ្កាច្រើន ឬងាប់ដើមក៏ថាបាន។ ម្យ៉ាងទៀត ដំណាំម្រេចត្រូវការចំណាយទុនច្រើន ដោយក្នុងដី១ហិកតាអាចចំណាយទុនដល់រាប់ម៉ឺនដុល្លារ ទម្រាំតែយើងបានទទួលផលមកវិញ រីឯដីសម្រាប់ដាំម្រេច ក៏មានតម្លៃខ្ពស់ផងដែរ ។
លោកយិន សូផា នាយកប្រតិបត្តិនៃសហគមន៍អភិវឌ្ឍន៍កសិកម្មដំណាំម្រេចដារ មេមត់ បានឱ្យដឹងថា ម្រេចផ្តល់ផលច្រើននៅពេលអាកាសធាតុអំណោយផល ដូចជាមិនក្តៅខ្លាំង ឬត្រជាក់ខ្លាំងជាដើម ប៉ុន្តែប្រសិនបើអាកាសធាតុមិនអំណោយផលទេធ្វើឱ្យដំណាំនេះប្រឈមនឹងការងាប់ដើម ឬធ្លាក់ចុះបរិមាណទិន្នផលនៅពេលប្រមូលផលមិនខាន ។ ជាក់ស្តែងកាលពីខែសីហា និងខែកញ្ញាកន្លងទៅ ម្រេចនៅតំបន់ឃុំដារទាំងមូលបានងាប់ដើមប្រមាណជា៥០ហិកតាដោយសារតែភ្លៀងធ្លាក់ជោកជាំរាល់ថ្ងៃ ធ្វើកសិករដាំម្រេចទាំងអស់ព្រួយបារម្ភជាខ្លាំង ជាពិសេសក្រុមកសិករដែលទើបតែចាប់ផ្តើមដាំម្រេចជាលើកដំបូង ព្រោះដើមទុនរបស់ពួកគាត់ភាគច្រើនខ្ចីពីធនាគារ ។
លោកបន្តថា កាលពីឆ្នាំ២០១៣ សហគមន៍អភិវឌ្ឍន៍កសិកម្មដំណាំម្រេចដារ មេមត់ ប្រមូលផលសរុបបានចំនួនជាង៥ពាន់តោនលើផ្ទៃដីប្រមាណ១.១២២ហិកតា ។ នៅឆ្នាំ២០១៤នេះកសិករបានពង្រីកការដាំដុះប្រមាណ១៤០ហិកតាបន្ថែមទៀតដែលនឹងប្រមូលផលនៅឆ្នាំ២០១៥ ។ ក្នុងនោះលោកកំពុងព្រួយបារម្ភពីទិន្នផលម្រេច ព្រោះតែអាកាសធាតុប្រែប្រួលខ្លាំងពេកធ្វើឱ្យដើមម្រេចងាប់ជាបន្តបន្ទាប់ ។
លោកងួន ឡាយ ប្រធានសហគមន៍អភិវឌ្ឍន៍កសិកម្មម្រេចកំពតបានឱ្យដឹងថា ដំណាំម្រេចនៅខេត្តកំពតឆ្នាំនេះនៅតែរងការខូចខាតដោយសាតែធាតុអាកាសក្តៅពេក តួយ៉ាងដូចកាលពីខែសីហាកន្លងទៅ នៅពេលម្រេចចេញផ្ការចំពេលធាតុអាកាសក្តៅធ្វើឱ្យម្រេចក្នុងមួយជន្លង់ៗដែលមានផ្កាប្រហែល៦០% នោះត្រូវជ្រុះផ្កាអស់ពាក់កណ្តាល ហើយនៅចន្លោះពីខែមករាដល់ខែមីនា នៅពេលម្រេចចាប់ផ្តើមដាក់គ្រាប់ត្រូវជ្រុះម្តងទៀតដោយសារតែការផ្គត់ផ្គង់ទឹកមិនបានដិតដល់ ។
លោកបន្តថា តាមការប៉ាន់ស្មានម្រេចខូចខាតដោយសារអាកាសធាតុនៅពេលកន្លងមកមានដីប្រហែល៤ហិកតា ហើយសម្រាប់ការប្រមូលផលនៅឆ្នាំ២០១៥ លោកមិនអាចវាយតម្លៃបានទេ ព្រោះកន្លងមកសហគមន៍ធ្លាប់បានធានាកុងត្រាផ្គត់ផ្គង់ម្រេចចំនួន២៦តោនជូនអតិថិជន តែដល់ពេលប្រមូលផល យើងទទួលបានទិន្នផលក្នុងរង្វង់តែ១៣តោនប៉ុណ្ណោះ គឺខុសពីការរំពឹងទុកយ៉ាងខ្លាំង។
លោកបញ្ជាក់ថា គិតមកដល់ពេលនេះ ផ្ទៃដីដែលកំពុងដាំដុះម្រេចមានចំនួនជាង១៤០ហិកតា ក្នុងនោះ៦២ហិកតាជាសមាជិករបស់សហគមន៍ ចំណែកម្រេចដែលអាចប្រមូលផលបានសម្រាប់ឆ្នាំនេះ និងឆ្នាំ២០១៥ យើងមានប្រមាណ២៣ហិកតាបុ៉ណ្ណោះ ៕
ចែករំលែកព័តមាននេះ