រាជធានីភ្នំពេញ ៖ អង្គការសង្គមសីុវិលចំនួន១៦ បានចេញសេចក្ដីថ្លែងការណ៍រួមគ្នាមួយទាក់ទិននឹងសេចក្ដីព្រាងច្បាប់ថ្មីស្ដីពីចរាចរណ៍ផ្លូវគោក ។ សេចក្ដីថ្លែងការណ៍រួមនេះ បានជំរុញឱ្យរដ្ឋសភាធ្វើការពិភាក្សានិងអនុម័តឱ្យបានឆាប់ដើម្បីយកមកអនុវត្តជួយសង្គ្រោះជីវិតមនុស្សដែលកំពុងទទួលរងការស្លាប់ របួស ពិការ ជារៀងរាល់ថ្ងៃ ពិសេសអ្នកប្រឈមនឹងគ្រោះថ្នាក់នោះគឺជាបុរសហើយបន្ទុកគ្រួសារដ៏ធ្ងន់ធ្ងរបានធ្លាក់លើស្ត្រី ។
សេចក្ដីថ្លែងការណ៍រួមមានខ្លឹមសារថា យើងខ្ញុំតំណាងឱ្យអង្គការសង្គមសីុវិល និងដៃគូពាក់ព័ន្ធដែលបានចូលរួមក្នុងវេទិកាពិគ្រោះយោបល់ស្ដីពី«សេចក្ដីព្រាងច្បាប់ថ្មី ស្ដីពីចរាចរណ៍ផ្លូវគោកនៅកម្ពុជា» នាថ្ងៃទី២០ ខែតុលា ឆ្នាំ២០១៤ នៅមជ្ឈមណ្ឌលសហប្រតិបត្តិការកម្ពុជា-ជប៉ុន បានពិភាក្សាស្វែងយល់ ទទួលស្គាល់អំពីបញ្ហាគ្រោះថ្នាក់ចរាចរណ៍ និងខ្លឹមសារនៃសេចក្ដីព្រាងច្បាប់ថ្មីស្ដីពីចរាចរណ៍ផ្លូវគោកនៅកម្ពុជាដូចខាងក្រោម៖
ស្ថានភាពគ្រោះថ្នាក់ចរាចរណ៍នៅកម្ពុជា នៅតែជាគ្រោះមហន្តរាយដ៏ធ្ងន់ធ្ងរដែលបណ្ដាលឱ្យមានអ្នកស្លាប់និងរបួសបន្តកើនឡើងគួរឱ្យព្រួយបារម្ភ ។ យោងតាមរបាយការណ៍របស់នាយកដ្ឋានសណ្ដាប់ធ្នាប់នៃក្រសួងមហាផ្ទៃ នាឆមាសទី១ ក្នុងឆ្នាំ២០១៤ ចំនួនគ្រោះថ្នាក់ចរាចរណ៍បានកើនឡើង២៩១លើក (១៣%) ចំនួនអ្នកស្លាប់កើនឡើង១០៥នាក់(១០%) និងចំនួនអ្នករបួសកើនឡើង៣៦០នាក់(៩%) បើធៀបនឹងឆមាសទី១ក្នុងឆ្នាំ២០១៣ ។ ក្នុងរយៈពេល៥ឆ្នាំកន្លងទៅនេះ គ្រោះមហន្តរាយដ៏អាក្រក់នេះបានធ្វើឱ្យមានអ្នកស្លាប់ចំនួន៩.៣៥៤នាក់ និងអ្នករបួសចំនួន៨៨.៣០២នាក់ ដែលបណ្ដាលឱ្យប្រទេសកម្ពុជាទទួលរងនូវការខាតបង់ជាថវិកាប្រមាណ
១.៥០០លានដុល្លារអាមេរិក ។ ភាគច្រើននៃជនរងគ្រោះដែលស្លាប់ របួស និងពិការដោយគ្រោះថ្នាក់ចរាចរណ៍គឺជាបុរស ហើយបានបន្សល់នូវបន្ទុកបញ្ហាដ៏សែនធ្ងន់ចំពោះស្ត្រីគ្រប់រូបជាប្រពន្ធ កូន និងញាតិសន្ដាន ។
លើសពីនេះទៀត គ្រោះថ្នាក់ចរាចរណ៍បានកែប្រែវាសនាសមាជិកនៃគ្រួសាររាប់ពាន់នាក់ឱ្យក្លាយជាស្ត្រីមេម៉ាយ កូនកំព្រា និងរស់នៅក្នុងសភាពលំបាកក្រីក្រជារៀងរាល់ឆ្នាំ ។ នេះបង្ហាញយ៉ាងច្បាស់ថា គ្រោះថ្នាក់ចរាចរណ៍គឺជាឧបសគ្គដ៏ធំរបស់រាជរដ្ឋាភិបាលកម្ពុជា ក្នុងការអភិវឌ្ឍសេដ្ឋកិច្ចជាតិ ពិសេសការអនុវត្តគោលនយោបាយកាត់បន្ថយភាពក្រីក្រនៅកម្ពុជា ។ ទោះបីយ៉ាងណា គ្រោះថ្នាក់ចរាចរណ៍គឺជាបញ្ហាដែលអាចទប់ស្កាត់ និងកាត់បន្ថយបានតាមរយៈយន្តការចូលរួមយ៉ាងសកម្ម និងប្រកបដោយការទទួលខុសត្រូវពីផ្នែកដែលពាក់ព័ន្ធនិងអ្នកប្រើប្រាស់ផ្លូវថ្នល់ ។ យោងតាមរបាយការណ៍ស្ដីពីជនរងគ្រោះនិងគ្រោះថ្នាក់ចរាចរណ៍ផ្លូវគោក(RCVIS) មូលហេតុចម្បងដែលបង្កឱ្យមានចំនួនគ្រោះថ្នាក់ អ្នកស្លាប់ និងអ្នករងរបួសធ្ងន់ធ្ងរច្រើនសន្ធឹកសន្ធាប់នោះគឺ៖ការបើកបរហួសល្បឿនកំណត់ ការបើកបរក្រោមឥទ្ធិពលនៃគ្រឿងស្រវឹង ការមិនពាក់មួកសុវត្ថិភាព និងកត្ដាផ្សេងៗទៀត ។
សេចក្ដីថ្លែងការណ៍រួមដដែលបានបន្តថា តាមរយៈកិច្ចប្រឹងប្រែងរបស់គណៈកម្មាធិការជាតិសុវត្ថិភាពចរាចរណ៍ផ្លូវគោក ជាពិសេសក្រសួងសាធារណការ និងដឹកជញ្ជូន ក្រសួងមហាផ្ទៃ និងក្រសួងពាក់ព័ន្ធមួយចំនួនទៀត រួមទាំងអង្គការសង្គមសីុវិល ដែលកំពុងបម្រើការក្នុងវិស័យសុវត្ថិភាពចរាចរណ៍ សេចក្ដីព្រាងច្បាប់ថ្មីស្ដីពីចរាចរណ៍ផ្លូវគោក បានបំពេញបន្ថែមនូវចំណុចខ្វះខាត ដែលមាននៅក្នុងច្បាប់ស្ដីពីចរាចរណ៍ផ្លូវគោកបច្ចុប្បន្ន ។ ចំណុចបន្ថែមសំខាន់ៗទាំងនោះរួមមាន ៖
១-កំណត់ល្បឿនបើកបរសម្រាប់យានជំនិះគ្រប់ប្រភេទ ដើម្បីឱ្យសម្របស្ថានភាពអភិវឌ្ឍន៍ផ្លូវថ្នល់ ។
២-បង្កើនប្រាក់ពិន័យនិងទោសទណ្ឌចំពោះអ្នកបើកបរយានយន្តស្ថិតក្រោមឥទ្ធិពលគ្រឿងស្រវឹង និងល្មើសទៅនឹងមាត្រាផ្សេងទៀតដែលបានចែងក្នុងច្បាប់នេះ ។
៣-តម្រូវឱ្យអ្នករួមដំណើរនិងកុមារដែលមានអាយុចាប់ពី៣ឆ្នាំឡើង ពាក់មួកសុវត្ថិភាព ។
៤-តម្រូវឱ្យអ្នកបើកបរនិងអ្នករួមដំណើរតាមរថយន្តដែលមានចំណុះមិនលើសពី៩នាក់ ពាក់ខ្សែក្រវាត់សុវត្ថិភាពនៅពេលបើកបរក្រៅទីប្រជុំជន ។ ល។
យោងតាមចំណុចបន្ថែមសំខាន់ៗទាំងអស់នេះ យើងខ្ញុំជាអង្គការសង្គមសីុវិលនិងដៃគូពាក់ព័ន្ធជឿជាក់ថា សេចក្ដីព្រាងច្បាប់ថ្មីនេះនឹងជួយជំរុញឱ្យការអនុវត្តច្បាប់ ពិសេសពាក់ព័ន្ធទៅនឹងមូលហេតុបង្កចម្បងៗខាងលើ ទទួលបានប្រសិទ្ធភាពខ្ពស់ ហើយចូលរួមសង្គ្រោះជីវិតមនុស្សពីសេចក្ដីស្លាប់បាន៧.៣៥០នាក់ និងបង្ការជនរងគ្រោះដោយរបួសក្បាលបាន១០.៥៧២នាក់ ត្រឹមរយៈពេល៥ឆ្នាំខាងមុខ ។
សេចក្ដីថ្លែងការណ៍រួមបានស្នើសូមឱ្យសភាមេត្ដាពិនិត្យ និងអនុម័តសេចក្ដីព្រាងច្បាប់ថ្មីនេះឱ្យបានឆាប់រហ័សដើម្បីយកមកអនុវត្ត និងសង្គ្រោះជីវិតមនុស្សនៅកម្ពុជាឱ្យបានចៀសផុតពីគ្រោះមហន្តរាយដ៏ធ្ងន់ធ្ងរនេះ ។ ជាមួយគ្នានេះដែរ យើងខ្ញុំសូមផ្ដល់អនុសាសន៍មួយចំនួនដូចខាងក្រោម៖
-បង្កើនថវិកាដើម្បីអនុវត្តផែនការសកម្មភាពសុវត្ថិភាពចរាចរណ៍ សំដៅកាត់បន្ថយចំនួនអ្នកស្លាប់ របួស និងពិការភាពឱ្យបានជាអតិបរមា ។
-សូមឱ្យក្រសួង ស្ថាប័នទទួលបន្ទុករៀបចំអនុក្រឹត្យ និងបទដ្ឋានច្បាប់នានាដែលមានចែងក្នុងច្បាប់នេះឱ្យបានឆាប់បន្ទាប់ពីច្បាប់ថ្មីបានអនុម័ត ដើម្បីយកមកអនុវត្តប្រកបដោយប្រសិទ្ធភាព ។ -សូមឱ្យមានផែនការ និងរឹតបន្ដឹងការអនុវត្តច្បាប់ចរាចរណ៍ទាំងថ្នាក់ជាតិ និងថ្នាក់ក្រោមជាតិ ពិសេសលើកត្ដាហានិភ័យសំខាន់ៗ មួយចំនួនដូចជា ៖ ការបើកបរហួសល្បឿនកំណត់ ការបើកបរក្រោមឥទ្ធិពលគ្រៀងស្រវឹង និងការមិនពាក់មួកសុវត្ថិភាព ឬខ្សែក្រវាត់សុត្ថិភាព ។
-សូមឱ្យក្រសួង ស្ថាប័នពាក់ព័ន្ធ និងរដ្ឋបាលថ្នាក់ក្រោមជាតិធ្វើការពិនិត្យ និងរៀបចំផែនការសកម្មភាពអាទិភាពរបស់ខ្លួន ដោយយោងតាមផែនការសកម្មភាពចរាចរណ៍ថ្នាក់ជាតិ ឆ្នាំ២០១១-២០២០ ឱ្យបានឆាប់រហ័ស និងអនុវត្តប្រកបដោយប្រសិទ្ធភាព ។
-បង្កើនការអប់រំផ្សព្វផ្សាយស្ដីពីសុវត្ថិភាពចរាចរណ៍តាមបណ្ដាញសារព័ត៌មាន គ្រឹះស្ថានអប់រំ និងសហគមន៍ឱ្យបានទូលំទូលាយ ។
-កែសម្រួលសេវាសង្គ្រោះបន្ទាន់ និងសេវាស្ដារលទ្ធភាពពលកម្មដំបូងដល់ជនរងគ្រោះ និងក្រុមគ្រួសារជនរងគ្រោះដោយសារគ្រោះថ្នាក់ចរាចរណ៍ ។
-ពង្រឹងការអប់រំនៅតាមសាលាបង្រៀនបើកបរ ការប្រឡងយកប័ណ្ណបើកបរ និងការត្រួតពិនិត្យបច្ចេកទេសយានយន្តឱ្យបានតឹងរុឹង ។
-បង្កើតក្រុមសវនកម្មសុវត្ថិភាពផ្លូវថ្នល់ ដើម្បីធ្វើការត្រួតពិនិត្យគុណភាពសុវត្ថិភាពផ្លូវថ្នល់បន្ទាប់ពីការកសាងផ្លូវរួចរាល់ និងធ្វើការសិក្សាលើទីតាំងដែលមានគ្រោះថ្នាក់ញឹកញាប់ដើម្បីការធ្វើការកែសម្រួលឡើងវិញ ។
-បង្កើនសេវាដឹកជញ្ជូនសាធារណៈដែលមានគុណភាព សុវត្ថិភាព និងតម្លៃសមរម្យ ដើម្បីការពារអ្នកប្រើប្រាស់ផ្លូវដែលងាយរងគ្រោះគ្រប់រូប ពិសេសកាត់បន្ថយការកកស្ទះចរាចរណ៍ និងការបំពុលបរិស្ថាន ដោយសារការបំភាយឧស្ម័នចេញពីយានយន្តដ៏ច្រើនលើសលប់ក្នុងតំបន់ទីប្រជុំជន ជាពិសេសរាជធានីភ្នំពេញ ៕
ចែករំលែកព័តមាននេះ