រាជធានីភ្នំពេញ ៖ រលកបាតុកម្មរបស់កម្មកររោងចក្របានផ្ទុះខ្លាំងព្រមៗគ្នានាព្រឹកថ្ងៃទី២១ តុលា ដោយឈរទាមទារមុខរោងចក្រប្រៀបដូចមានចលនាជំរុញគួរឱ្យព្រួយបារម្ភបំផុតពីអនាគតនៃរោងចក្រទាំងនេះ ។ កម្មករ-កម្មការិនីប្រមាណជាង៨.០០០នាក់ ដែលបម្រើការងារនៅរោងចក្រកាត់ដេរចំនួន៥មានទីតាំងនៅក្នុងខណ្ឌពោធិ៍សែនជ័យ បានផ្ទុះកូដកម្មតវ៉ាទាមទារលក្ខខណ្ឌការងារព្រមៗគ្នាកាលពីព្រឹកថ្ងៃទី២១ តុលា ។
រោងចក្រកាត់ដេរដែលបានផ្ទុះកូដកម្មតវ៉ានាព្រឹកនោះមាន ៖
១-រោងចក្រកាត់ដេរហុងវ៉ាទី១និងទី២ដែលមានទីតាំងស្ថិតនៅក្នុងភូមិត្រពាំងថ្លឹង សង្កាត់ចោមចៅ មានកម្មករ-កម្មការិនីចំនួន២.៩៦០នាក់ បានធ្វើការទាមទារលក្ខខណ្ឌការងារចំនួន៥ចំណុចក្នុងនោះមាន៖
ទី១-សុំឱ្យក្រុមហ៊ុនផ្តល់ប្រាក់២០ដុល្លារសម្រាប់អ្នកដែលទៅធ្វើការទៀងទាត់ ។
ទី២-ស្នើសុំឲ្យក្រុមហ៊ុនផ្តល់ប្រាក់សម្រាប់ការធ្វើដំណើរ និងស្នាក់នៅចំនួន១៥ដុល្លារក្នុង១ខែដល់កម្មករ ។
ទី៣-ស្នើសុំឲ្យក្រុមហ៊ុនផ្តល់ប្រាក់២០ដុល្លារសម្រាប់ផ្នែកអនាម័យ និងអ្នកដេរអត់ស៊ីបុង ។
ទី៤-ស្នើសុំឲ្យក្រុមហ៊ុនបើកប្រាក់នៅថ្ងែទី៤ វិច្ឆិកា ឆ្នាំ២០១៤ ។
ទី៥-សុំឲ្យក្រុមហ៊ុនផ្តល់ប្រាក់ថ្លៃទឹកដោះគោសម្រាប់កម្មការិនីដែលទើបសម្រាលកូន ។
២-រោងចក្រកាត់ដេរហ្រេ្គនធ្វីង(ឃ្យូអឹមអាយចាស់) មានទីតាំងស្ថិតនៅក្នុងភូមិត្រពាំងពោធិ៍ សង្កាត់ចោមចៅ មានកម្មករជាង៥.០០០នាក់ ដឹកនាំដោយ«សហជីពកម្ពុជាគាំទ្រកម្មករ»បានធ្វើកូដកម្មតវ៉ាទាមទារលក្ខខណ្ឌការងារ ចំនួន១៣ចំណុចពីថៅកែ ។ ការតវ៉ានោះមានរយៈពេល២ថ្ងៃជាប់គ្នាមកហើយនិងបាន ទាមទារនូវលក្ខខណ្ឌមួយចំនួនក្នុងនោះមាន៥ចំណុចសំខាន់គឺ ៖
ទី១-សុំឲ្យក្រុមហ៊ុនផ្តល់ប្រាក់បាយថ្ងែត្រង់៥.០០០រៀល ។
ទី២-សុំឲ្យក្រុមហ៊ុនដំឡើងលុយថ្លៃបាយ ធ្វើការថែមម៉ោងក្នុង១ម៉ោងចំនួន២.០០០រៀល ។
ទី៣-សុំឲ្យក្រុមហ៊ុនផ្តល់ប្រាក់បាយធ្វើការថែមម៉ោងនៅថ្ងៃបុណ្យនិងថ្ងែអាទិត្យក្នុង១ម៉ោង២.០០០រៀល ។
ទី៤-សុំឲ្យក្រុមហ៊ុនផ្តល់ប្រាក់លើកទឹកចិត្តដល់កម្មករណាដែលបំពេញការងារបានពេញចំនួន២៦ថ្ងែមិនដែលឈប់សោះចំនួន១០ដុល្លារក្នុង១ខែ ។
ទី៥-ស្នើសុំឲ្យក្រុមហ៊ុនដំឡើងប្រាក់សោហ៊ុយថ្លៃស្នាក់នៅក្នុង១ខែ១៥ដុល្លារ ។
៣-រោងចក្រស៊ីរ៉ាតិច មានទីតាំងស្ថិតនៅក្នុងភូមិចំការឱឡឹក សង្កាត់កាកាប មានកម្មករកម្មការិនីប្រមាណជាង៤០០នាក់ បានធ្វើកូដកម្មតវ៉ាទាមទារ១១ចំណុច ហើយមាន៣ចំណុចសំខាន់ៗគឺ ៖
ទី១-សុំឲ្យក្រុមហ៊ុនផ្តល់ប្រាក់ថ្លៃទឹកដោះគោចំនួន១៥ដុល្លារក្នុង១ខែដល់កម្មការិនី ដែលទើបសម្រាលកូន ។
ទី២-សុំឱ្យក្រុមហ៊ុនផ្តល់ប្រាក់៩ដុល្លារសម្រាប់កម្មករធ្វើការថ្ងែអាទិត្យ ។
ទី៣-ស្នើសុំឱ្យក្រុមហ៊ុនបញ្ជាក់ឲ្យបានច្បាស់ចំពោះករណីដែលក្រុមហ៊ុនបានចោទប្រកាន់ថា សហព័ន្ធសហជីពកម្មករកម្ពុជាបានយកប្រាក់ចំនួន៣.៥០០ដុល្លារ ហើយក្រុមហ៊ុនត្រូវសងនូវភាពស្អាតស្អំជូនដល់តំណាងសហជីពវិញ ។
៤-រោងចក្រកាត់ដេរ ស៊ីដាប់ប៊ែលយូ ខេ អេជ មានទីតាំងស្ថិតនៅក្នុងភូមិជង្រុក សង្កាត់ត្រពាំងក្រសាំង មានកម្មករកម្មការិនី ជាង៤០០នាក់បានប្រមូលផ្ដុំគ្នាធ្វើការតវ៉ាទាមទារឲ្យថៅកែដោះស្រាយនូវលក្ខខណ្ឌការងារមួយចំនួន ។ រោងចក្រមួយនេះ បានធ្វើការតវ៉ាយា៉ងរ៉ាំរ៉ៃមកហើយ និងមានពេលខ្លះបានលើកគ្នាទៅកាន់ក្រសួងការងារដើម្បីរកដំណោះស្រាយថែមទៀតផង តែវិវាទនេះនៅតែបន្តអូសបន្លាយ ។ ៥-សិប្បកម្មបង្ហើយការ«ស៊ីងហុង» មានទីតាំងស្ថិតនៅក្នុងភូមិទួលកី សង្កាត់ភ្លើងឆេះរទេះ មានកម្មករ-កម្មការិនីចំនួន៤៥នាក់ ក្នុងចំណោមចំនួនសរុបជាង១០០នាក់បានធ្វើការតវ៉ាទាមទារលក្ខខណ្ឌការងារមួយចំនួនដែរ ។
ទាក់ទិនទៅនឹងហេតុការណ៍នោះ មិនមានអំពើហិង្សាកើតឡើងនោះឡើយដោយកម្មករនាំគ្នាឈប់ធ្វើការនិងនាំគ្នាចេញពីក្នុងរោងចក្រមកឈរត្រៀបត្រានៅខាងមុខរោងចក្រស្រែកតាមមេក្រូទាមទារឲ្យថៅកែដោះស្រាយហើយអាជ្ញាធរពាក់ព័ន្ធនានាបានចុះទៅធ្វើការដោះស្រាយ ប៉ុន្តែមិនទាន់ដឹងថា ត្រូវគ្នាបានប៉ុន្មានរោងចក្រនៅឡើយទេ ៕
ចែករំលែកព័តមាននេះ