ខេត្តកំពង់ឆ្នាំង ៖ ចោរប្លន់ប្រដាប់អាវុធ៣នាក់បានឆក់យកស្បោងមាសយ៉ាងព្រហើនពីអាជីវករ២នាក់ កាលពីវេលាម៉ោង៤និង៣០នាទីល្ងាច ថ្ងៃទី២១ តុលា បណ្តាលឱ្យយុវជនម្នាក់ជាអាជីវករលក់មាសដូរប្រាក់ស្លាប់ និងនារីម្នាក់ទៀតជាប្អូនរងរបួសយ៉ាងធ្ងន់ធ្ងរនៅមុខផ្សារព្រៃខ្មែរ ស្ថិតក្នុងភូមិព្រៃខ្មែរ ឃុំរលាប្អៀរ ស្រុករលាប្អៀរ ខណៈដែលម្ចាស់មាសប្រាក់ទាំង២នាក់បងប្អូន ស្ពាយកាបូបចំនួន៣វិលត្រឡប់ពីផ្សារមកផ្ទះវិញ ។
មន្ត្រីនគរបាលមូលដ្ឋានបានឱ្យដឹងថា ជនរងគ្រោះជាបងឈ្មោះ សួន រដ្ឋា អាយុ៣២ឆ្នាំ ចំណែកប្អូនស្រីឈ្មោះ សួន បូរិន អាយុ២៧ឆ្នាំ ទាំង២នាក់មានទីលំនៅភូមិ-ឃុំកន្លែងកើតហេតុ ខាងលើ ។ តាមសាក្សីបាននិយាយថា មុនពេលកើតហេតុ ២នាក់បងប្អូនបានស្ពាយកាបូបមាស និងប្រាក់ចំនួន៣ ចេញពីផ្សារព្រៃខ្មែរជាកន្លែងលក់ដូរ ដោយដើរឆ្លងផ្លូវជាតិលេខ៥ ត្រឡប់មកផ្ទះវិញដែលនៅទល់មុខផ្សារព្រៃខ្មែរនេះ ។ ពេលមកដល់មុខផ្ទះស្រាប់តែលេចមុខជនដៃដល់មានគ្នា៣នាក់ ប្រដាប់ដោយកាំភ្លើងអាកា១ដើម និងកាំភ្លើងខ្លីមួយដើម ជិះម៉ូតូធំពណ៌ក្រហមមួយគ្រឿងមកឈប់ភ្ជង់ប្លន់យកកាបូបមាសប្រាក់នោះ ។ ដោយសារពីរនាក់បងប្អូនព្យាយាមមិនឱ្យ ទើបក្រុមចោរបាញ់ចំនួន៥គ្រាប់ទៅលើអាជីវករទាំង២នាក់បងប្អូន បណ្តាលឱ្យដួលដេកក្នុងថ្លុកឈាម ហើយចោរឆក់យកកាបូបទាំង៣ ជិះម៉ូតូគេចចេញបាត់ដោយសុវត្ថិភាព ។
ជនរងគ្រោះត្រូវបានក្រុមគ្រួសារដឹកយកទៅមន្ទីរពេទ្យជាបន្ទាន់ ប៉ុន្តែគួរឱ្យសោកស្តាយ យុវជនជាបងបានស្លាប់ពេលដឹកទៅសង្គ្រោះនៅមន្ទីរពេទ្យ ។ ចំណែកនារីជាប្អូន ត្រូវគ្រូពេទ្យអះអាងថាធ្ងន់ធ្ងរណាស់ និងកំពុងស្ថិតក្នុងការសង្គ្រោះ ។
ពុំមាននរណាបានដឹងថា មាសប្រាក់ក្នុងកាបូបនោះមានប៉ុន្មាននោះទេ តែមានបុរសជាបងប្អូនជីដូនមួយជនរងគ្រោះម្នាក់បានប្រាប់ថា មាស ប្រាក់ខែ្មរ និងប្រាក់ដុលា្លរមានចំនួនច្រើនណាស់ ព្រោះគ្រួសារនេះមួយផ្សារព្រៃខ្មែរជាអ្នកលក់មាសប្តូរប្រាក់ធំជាងគេ ។ ក្នុងហេតុការណ៍នោះ ម៉ូតូណៃហតរបស់ម្ចាស់ផ្ទះត្រូវគ្រាប់កាំភ្លើងធ្លាយធុងសាំងផងដែរ ។ សមត្ថកិច្ចបានរកឃើញសម្បកគ្រាប់អាកាចំនួន៣ និងគ្រាប់កាំភ្លើងខ្លីកា៥៤ ចំនួន២គ្រាប់ ប៉ុន្តែតាមសាក្សីថា ជនដៃដល់បានបាញ់ច្រើនគ្រាប់ជាងចំនួននេះ ៕
ចែករំលែកព័តមាននេះ