រាជធានីភ្នំពេញ ៖ បុរសម្នាក់ផឹកស៊ីមិនប្រមាណខ្លួនរហូតស្រវឹង ធ្លាក់ភ្នែកហើយជិះម៉ូតូក្នុងល្បឿន លឿនបានផ្លាតចង្កូត បណ្ដាលឲ្យដួលម៉ូតូធ្លាក់ផ្លូវ ខ្ទាតចូលទៅក្នុងស្រែ ចំណែកបុរសនោះ បានខ្ទាតទៅលើផ្លូវ ដេកដួលសន្លប់ ស្ដូកស្ដឹងក្រោកមិនរួច ។ ហេតុការណ៍នេះបានកើតឡើងកាលពីវេលាម៉ោង៥និង៤៥នាទីល្ងាចថ្ងៃ ទី២១ ខែតុលា ឆ្នាំ២០១៤ នៅលើកំណាត់ផ្លូវបេតុងមួយកន្លែង ស្ថិតក្នុងភូមិសាមគ្គីទី៥ សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។
បុរសរងគ្រោះម្នាក់នោះត្រូវបានគេស្គាល់ឈ្មោះ សារ៉ន អាយុជាង២០ឆ្នាំ មានទីលំនៅក្នុងភូមិវាល សង្កាត់ត្រពាំងក្រសាំង ខណ្ឌពោធិ៍សែនជ័យ ។
តាមប្រភពព័ត៌មានបានឲ្យដឹងថាបុរសរងគ្រោះបានទៅផឹកស៊ីនៅក្នុងភូមិ កើតហេតុខាងលើនោះ តាំងពីព្រឹករហូតដល់ល្ងាចគឺផឹកពេញ១ថ្ងៃតែម្ដង ។ លុះដល់ពេលកើតហេតុ គេបានឃើញបុរសនោះ ជិះម៉ូតូ១គ្រឿង ម៉ាកហុងដាគុបជ្រុង ពណ៌ទឹកប៊ិច ពាក់ស្លាកលេខ ភ្នំពេញ1AA-1278 ។ ដោយបានបើកបរធ្វើ ដំណើរក្នុងទិសដៅពីលិចទៅកើតក្នុងល្បឿនលឿននិងរេពេញផ្លូវថែមទៀតផង ។ ប្រភពដដែលបានបន្តទៀតថា លុះពេលទីៅដល់ត្រង់ចំពុចកើតហេតុខាង លើក៍បានផ្លាតចង្កូត បណ្ដាលឲ្យដួល បោកទៅលើផ្លូវពេញទំហឹងតែម្ដង។
ខណៈនោះម៉ូតូ បានធ្លាក់ចូលទៅក្នុងទឹកស្រែ ចំណែកជនរងគ្រោះបានខ្ទាត រមៀលទៅកណ្ដាលផ្លូវ សន្លប់ស្ដូកស្ដឹងនៅនឹងកន្លែង ។ ក្រោយពេលកើតហេតុ ជន រងគ្រោះត្រូវបានក្រុមគ្រួសារដឹកតាមម៉ូតូនាំទៅកាន់មន្ទីរពេទ្យដើម្បីសង្គ្រោះ បន្ទាន់ចំណែកម៉ូតូយកទៅជួសជុលដោយខ្លួនឯង។
ចែករំលែកព័តមាននេះ