អង្គការសិទ្ធិមនុស្សស៊ីរី OSDH ស្និទ្ធពួកប្រឆាំងគូសបញ្ជាក់ថា ពួកជីហាដនៃក្រុមរដ្ឋអ៊ិស្លាមកាលពីយប់ថ្ងៃទី២០ តុលា បានធ្វើការវាយលុកថ្មីមួយក្នុងទីក្រុងឃើតស៊ីរីកូបានេ ។ ការវាយលុកថ្មីនេះកើតមានក្រោយពីអង្គការរដ្ឋអ៊ិស្លាម ធ្វើការវាយប្រហារអត្តឃាត២ប្រើរថយន្តផ្ទុកគ្រឿងផ្ទុះនៅភាគខាងជើងទីក្រុងនេះ ។
លោករ៉ាមីអាប់ដែល រ៉ាហ៍ម៉ាន់ ប្រធានរបស់ OSDH ថ្លែងថា ពួកជីហាដបានធ្វើការវាយលុកលើគ្រប់រណសិរ្សទាំងអស់នៃទីក្រុងនេះសំដៅលើបណ្តាតំបន់ស្ថិតក្រោមការត្រួតត្រារបស់ពួកយុទ្ធឃើត ។ ការប្រយុទ្ធគ្នាដ៏សាហាវកើតមាននាពេលយប់ ។ OSDH ពុំអាចក្តាប់បានតុល្យការនៃការវាយប្រហារអត្តឃាតទាំងពីរនោះឡើយក្នុងពេលភ្លាមៗ ។
ក្រុងកូបានេ ជាទីលាននៃការប្រយុទ្ធគ្នាចាប់តាំងពីមួយខែមកហើយដោយសារការវាយលុករបស់ក្រុមរដ្ឋអ៊ិស្លាម ដែលចង់ដណ្តើមយកទីក្រុងនេះដើម្បីធានាការត្រួតត្រារបស់គេនូវដែនដីយ៉ាងវែងតាមបណ្តោយព្រំដែនស៊ីរី-តួកគី ។យោងតាម OSDH ថា ពួកជីហាដបានលុកចូលទីក្រុងនេះកាលពីថ្ងៃទី៦ តុលា ក៏ប៉ុន្តែសម្រាប់ពេលនេះអាចកាន់កាប់ទីក្រុងកូបានេ បានពាក់កណ្តាលបុ៉ណ្ណោះ ។ ពួកជីហាដប្រឈមមុខនឹងការតស៊ូទប់ទល់យ៉ាងស្វិតស្វាញរបស់ពួកយុទ្ធជនឃើត ដែលរយៈពេល២៤ម៉ោងចុងក្រោយនេះទទួលបានការទម្លាក់អាវុធ និងគ្រាប់រំសេវពីយន្តហោះអាមេរិក ។ ពួកយុទ្ធជនឃើតនៅទទួលបានការជួយវាយប្រហារតាមអាកាសពីក្រុមចម្រុះអន្តរជាតិ នាំមុខដោយអាមេរិកផងដែរ ៕
ចែករំលែកព័តមាននេះ