រាជធានីភ្នំពេញ ៖ ការប្រកួតកីឡាប្រដាល់ជ្រើសរើសជើងឯកថ្នាក់ជាតិប្រចាំឆ្នាំ២០១៤ បានធ្វើពិធីបើកជាផ្លូវការហើយកាលពីល្ងាចថ្ងៃទី២០ តុលា នៅសាលដំបូលទូក ស្ថិតនៅក្នុងពហុកីឡដ្ឋានជាតិ ក្រោយពីដំណើរការប្រកួតអស់រយៈពេល៤ថ្ងៃតាំងពីថ្ងៃទី១៦ តុលា កន្លងមកនោះ ។ លោកឧត្តមសេនីយ៍ឯក តែម ម៉ឺន ប្រធានសហព័ន្ធកីឡាប្រដាល់កម្ពុជា បានឱ្យដឹងថា សម្រាប់ការប្រកួតប្រដាល់ជ្រើសរើសជើងឯកថ្នាក់ជាតិឆ្នាំ២០១៤នេះ មានស្ថាប័ន ក្រសួង អង្គភាព សមាគម ក្លិបមកពីរាជធានី-ខេត្ត ចូលរួមចំនួន១៧ រួមមាន ៖
សមាគមក្រសួងការពារជាតិ, ក្រសួងមហាផ្ទៃ រាជធានីភ្នំពេញ, ខេត្តកំពង់ឆ្នាំង, ខេត្តសៀមរាប, ខេត្តឧត្តរមានជ័យ, ខេត្តកំពត, ខេត្តតាកែវ, ខេត្តបាត់ដំបង, ខេត្តពោធិ៍សាត់, ខេត្តព្រៃវែង, ខេត្តរតនគិរី សមាគមដែនសមុទ្រមានរិទ្ធ, ក្រសួងឧស្សាហកម្ម និងសិប្បកម្ម, កងរាជអាវុធហត្ថខេត្តកំពង់ស្ពឺ សមាគមព្រះខ័នរាជ និងមជ្ឈមណ្ឌលសកម្មភាពកំចាត់មីនកម្ពុជា ។ កីឡាករចូលរួមទាំងប្រដាល់សាកល និងក្បាច់បុរាណខ្មែរសរុបមានចំនួន៤៦៧នាក់ ក្នុងនោះប្រដាល់សាកល១៨៦នាក់ និងក្បាច់បុរាណខ្មែរ២៨៦នាក់ ។
លោកមុិល កាដូ អគ្គលេខាធិការសហព័ន្ធកីឡាប្រដាល់បានឱ្យដឹងថា សម្រាប់ការចាប់ផ្តើមប្រកួតដំបូងនៅថ្ងៃទី១៦ តុលា មានចំនួន៣៣គូ, ថ្ងៃទី១៧ តុលា មាន៤៨គូ, ថ្ងៃទី១៨ តុលា មាន៥៦គូ, ថ្ងៃទី១៩ តុលា មាន២៤គូ និងនៅថ្ងៃបើកកម្មវិធីផ្លូវការនេះមាន៥៤គូ ។ លោកបន្ថែមទៀតថា នៅថ្ងៃទី២១ តុលា ការប្រកួតមានច្រើនគូ គឺរហូតដល់៦៥គូ បុ៉ន្តែបន្ទាប់ពីនោះមកនឹងត្រូវចុះជាបន្តបន្ទាប់ រហូតដល់ថ្ងៃបិទកម្មវិធីប្រកួតថ្ងៃទី២៦ តុលា នឹងនៅសល់តែ៧គូបុ៉ណ្ណោះ ។ លោកប៊ូ ជុំសេរី អនុរដ្ឋលេខាធិការក្រសួងអប់រំ យុវជន និងកីឡា បានថ្លែងឱ្យដឹងថា ជាមួយនឹងការរីកចម្រើនក្នុងតំបន់យើងត្រូវពង្រឹងការអនុវត្តគោលនយោបាយជាតិស្តីពីការអភិវឌ្ឍវិស័យអប់រំកាយ និងកីឡា ឱ្យមានប្រសិទ្ធភាពខ្ពស់ សំដៅរួមចំណែកលើកកម្ពស់សុខភាពប្រជាជន ពង្រឹងសាមគ្គីភាព និងត្រៀមលក្ខណៈឱ្យបានល្អដើម្បីចូលរួម និងទទួលរៀបចំព្រឹត្តិការណ៍កីឡាធំៗជាលក្ខណៈអន្តរជាតិនានា ក៏ដូចជាកីឡាអាស៊ីអាគ្នេយ៍ជាដើម ។
លោកអនុរដ្ឋលេខាធិការបានសំណូមពរដល់កីឡាករទាំងអស់ត្រូវគោរពបទបញ្ជាការប្រកួត គោលការណ៍ Fair Play មិត្តភាព និងសាមគ្គីភាពឱ្យបានល្អ។ ចំពោះគណៈកម្មការបច្ចេកទេស ត្រូវប្រកាន់ខ្ជាប់នូវបទបញ្ជាប្រកួត កាត់សេចក្តីឱ្យបានត្រឹមត្រូវ មានតម្លាភាព និងយុត្តិធម៌ប្រកបដោយវិជ្ជាជីវៈ ។ គួរបញ្ជាក់ថា ឆ្នាំនេះក៏ដូចជារាល់ឆ្នាំដែរ ការប្រកួតប្រដាល់ជ្រើសរើសជើងឯកថ្នាក់ជាតិនេះ គឺបានប្រើប្រាស់សង្វៀនពីរ ដែលមួយនៅក្នុងសាលដំបូលទូក និងមួយទៀតនៅសាលហ្វឹកហាត់ប្រដាល់ជម្រើសជាតិ ។ ការប្រកួតចែកចេញជា២ក្របខ័ណ្ឌគឺ ក១ និងក២ ទាំងប្រដាល់សាកល ទាំងប្រដាល់ក្បាច់បុរាណខ្មែរ ដោយប្រកួតតាមរូបមន្តជម្រុះចាញ់ធ្លាក់ៗតែម្តង ៕
ចែករំលែកព័តមាននេះ